Read Khoekhoegowab Saxariab 10 Bible Online

Saxariab 10 - Khoekhoegowab bible

Saxariab 10

¹ǀApiba ǂganbasen re ǃKhūb tawa ǃnaresib di ǁaeb ai; ǃKhūb ge ǁnāb, napaga ra dība, ob ge ǁîba mâ ǁhao-i ǃaub ai hâ-i hoa-e ǂâuba hâs kōse ǀapiba nîra mā.

²ǁGôa-elogu ge ǁau xūna ra ǃhoa. Tsî aimûǀgaru-aogu ge ǂkhabasina ra mû, tsî gu ge ǁau ǁhapode ra ǃhoa. ǁÎgu ge ǁausib ǀkha ra ǁkhaeǂgao. ǁNā-amagan ge ǁnāǀî gere ǃgû gūn khami, ǁîn ge ge ǁgâiǀāhe, ǃûi-ao-i xare-i a ǀkhai xui-ao.

³ǃÛi-aogu ǂamas ge ti ǁaib go ǂhubisa, tsî ǂgaeǂgui-aogu ǂamas ge ôaǃnâ ta gosa, xawe ǃKhūb ǂnubidi dib ge gūn âba nîra ǃûiǃgâ, Judab ommi dina, tsî ǁîb ge ǁîna nîra ǁāǁā hāb, ǁîb anusib dib khami ǃkhams ǃnâ.

⁴ǁÎba xub ge ǁhôaǀuiba nîra ǀkhī, ǁîba xub ge tentǀuriba nîra ǀkhī, ǁîba xus ge khās ǃkhams disa nîra ǀkhī, ǀhûpe gu ge doeǁga-aogu hoaga ǁîba xu nîra ǀkhī.

⁵Tsî gu ge ǁē-aogu ǃās daogu di ǂgoaba ǃkhams ǃnâ ra dāǂkhūgu khami nîra ī, nēti gu ge nîra ǃkham, ǃKhūb ǁîgu ǀkha nîra hâ xui-ao, tsî gu ge ǁnāgu hāgu ai ra ǃgapiga nîra taotao.

⁶Tsî tita ge ommi Judab diba ǀgaiǀgai tsî ommi Joseb diba nîra sâu. Tsî tita ge ǁîna ǁkhawa nîra ǂnûiǂgā, tita ge ǁîna ǀkhom xui-ao. Tsî ta ge ǁîna ǂhāxū tama hâse nîra ība, tita ge ǃKhūta, ǁîn di Elota tsî tita ge ǁîna nîra ǁnâu-am.

⁷Ob ge Efraimma ǁē-aob khami nîra ī, ob ge ǂgaob âna nîra ǃgâiaǂgao, ǂauxûib xas khami. On ge ǁîn ôana ǁîsa mû, tsî nîra ǃgâiaǂgao; ob ge ǂgaob âna nîra dâ ǃKhūb ǃnâ.

⁸Tita ge ǁîna nîra ǂnamba on ge nîra ǀhû, tita ǁîna nîra ore xui-ao; on ge nîra ǂguiǂguisen, ǂguron ge ǂgui i khami.

⁹Tsî tita ge ǁîna ǁaedi ǃnâ nîra tsoro, on ge tita xa ǃnū ǃkhaidi on ǃnâ nîra ǂâi. On ge ǁîn ôan ǀkha ûi, tsî ǁkhawa nîra oaǀkhī.

¹⁰Tita ge ǁîna Egipte ǃhūba xu ǁkhawa nîra ūhā, tsî tita ǁîna Asiriaba xu nîra ǀhaoǀhao xui-ao. Tita ge ǁîna ǃhūb Gileadi tsî Libanonni tsîkha dib ǃnâ nîra ūhā, xawe ǁî ǃhūb ge ǁîna ǂâuba tide.

¹¹Tsî ǁîb ge ǂōǂōsib huriba nî ǃgâu; tsî ǁîb ge ǃgabigu hurib diga nîra ǂnau, o gu ge ǃgamsigu Nylǃāb digu hoaga nîra ǂnâ. ǃNubaib ge ǃgurisib Asiriab diba nîra aoǁguihe, os ge gaohais Egipteb disa nîra kā.

¹²Tsî tita ge ǁîna ǃKhūb ǃnâ nîra ǀgaiǀgai on ge ǁîb ǀons ǃnâ nîra ǃgû, tib ǃKhūba ra mî.