Read Khoekhoegowab Saxariab 11 Bible Online

Saxariab 11 - Khoekhoegowab bible

Saxariab 11

¹ǁKhowa-am re sa ǁāga, sats Libanontse, îs ǀaesa sederhaidi âtsa hapu!

²Ā so re, saso denehaiso, sederhaidi go ǁnā xuige; ǂkhaisa haidi go hîkākāhe xuige! Ā so re, saso Basanni di aik-haiso; ǀgaisa haiǀgoms go ǁhāǂuihe xuige!

³Dommi ǃûi-aogu ās dib ge hâ; ǁîgu ǂkhaisib hîǀhuruhe hâ amaga! Dommi ǂkham xamgu ǃoros dib ge hâ; ǃgurib Jordanǃāb dib hîkākāhe hâ amaga!

⁴Nētib ra ǃKhūb ti Eloba mî: ǃÛi re nē ǂāgūna.

⁵ǁÎna ra ǁama khoen xa ra ǂāhena, tsîn ge ǁî ǃkhais ǃnâ ǀhapixa tama hâ, tsî mâ-i ǁîna ra ǁamaxū-i hoa-i ge: Ab ǃKhūba koahe, titab ge ǃkhū kai ǃkhais ǃaroma, ti ra mî. Tsî ǁnāgu ǁîna ra ǁamaxūgu ge ǁîna ǀkhom tama hâ.

⁶O ta ge tita ǁansaben nē ǃhūb din ona ǀkhom tide, tib ra ǃKhūba mî. Îts mû, tita ge khoena nîra māǁnâ, mâ-i hoa-e ǁî-i ǀgūkhoeb ǃomǁae tsî ǁî-i gao-aob ǃomǁae, tsî gu ge ǁîga nē ǃhūba nîra ǂnauǂkhūǂkhū, tsî tita ge ǁîna ǁîgu ǃomǁaeba xu ore tide.

⁷O ta ge tita nē ǂāgūna gere ǃûi, ǀkhomǀkhomsa gūn ge i amaga. Tsî tita ge haira ge ū, ǀguisa ta ge ǀNamǀnamsasis ti ge ǂgai, tsî nausa ta ge ǃGaeǀhaosis ti ge ǂgai, tsî tita ge ǁnā gūna gere ǃûi.

⁸Tsî tita ge ǃnona ǃûi-aoga ǀgui ǁkhâb ǀguib ǃnâ ge ǃgaoǁnâ. Ti ǀoms ge ǁîgu ǂama ǁaixa, tsî ǁîgu ǀoms on ge tita ǂhara xui-ao.

⁹O ta ge tita ge mî: Tita ge sado ǃaruǀî ǃûi tide. ǁŌ ka-e a-i ǁō, tsî ǃgaoǁnâhe ga hâ-e, a-i ǃgaoǁnâhe, în ǃgau kan xa nē-e nau-i di ǁgansa hapu.

¹⁰O ta ge tita ti hais ǀNamǀnamsasisa ū tsî ǁîsa ge khôaǃā, ti ǃgaeǀhaosa ra dīǁauǁauǃâ, nē ǁaedi hoadi ǀkha ta ge dīsa.

¹¹Nētis ge ǁîsa ǁnātsē ge dīǁauǁauhe, tsî nētimîn ge ǀkhomǀkhomsaben gūn din, tita ǃâubasen hâna, ge mûǂan, ǃKhūb di mîs a ǁî ǃkhaisa.

¹²Tita ge ǁîna ǃoa mî xui-ao: Sadu mûǁae i ga ǃgâi io, ǁnâi ti amǃnâsa ūhā, tsî ǃgâi tama i ka io, ǁnâi xū. On ge ti amǃnâsa ge ǃgôaǁnâ: ǃNonadisi ǀhaiǀurimaride.

¹³Xawe ǃKhūb ge tita ǁga: ǁÎna sūǂnubi-aoba aoba, ǁnā ǂkhaisa ǀgaus ǁîn xa ta ge anubahesa, ti ge mî. O ta ge tita ǁnā ǃnonadisi ǀhaiǀurimaride ū tsî ǁîde ǃKhūb ommi ǃnâ ge aoǂgā, sūǂnubi-aob aiǃâ.

¹⁴ǃNubai ta ge tita ǀgamǁî hais, ǃGaeǀhaosisa, ge khôaǃā, khoeǃgâgusisa ra dīǁauǁause Judab tsî Israeli tsîkha ǁaegu.

¹⁵ǃAruǀîb ge ǃKhūba tita ǁga ge mî: Îts ǁkhawa ū gâre ǃûi-aob di sîsenūdasa.

¹⁶Mû, tita ge ǃûi-ao-e nîra ǂkhaiǂkhaikhâi nē ǃhūb ǃnâ, kāǁō ra i tamas ka io, kā hâ-eb ge ǁîba ôa tide, ǀgaruǀgaruhe hâ-eb ge ǁîba ǀhaoǀhao tide, tsî khôa hâ-eb ge ǁîba ǂgauǂgau tide, tsî ǂuruse mâ-eb ge ǁîba ǃkhōǂhomi tide, xawe ǁgan-i kausa-i di-eb ge nîra ǂû tsî ǁî-i di ǁkhoradeb ge nîra tsuruǁnâ.

¹⁷Tsūba ǁnā tsū ǃûi-aob, gūna ra ǁnāxūba! Gôaba ab ǁôab âb ǂama hā tsî amǀkhāb mûs âb ǂama! ǁÎb di ǁôab ge hoaragase nîra ǂnâ, tsî ǁîb amǀkhāb mûs ge nîra ǂgīǃari!