Read Khoekhoegowab Saxariab 12 Bible Online

Saxariab 12 - Khoekhoegowab bible

Saxariab 12

¹ǃKhanab ǃKhūb mîs dib Israeli ǂama. ǃKhūb ra ǃhoa, ǁnāb ǀhomma ra ǃāǂuib tsî ǃhūbaiba ra ǃgaoǃgaob tsî khoeb di gagasa ǁîb ǃnāb ǃnâ ra kuruba:

²Mû, tita ge Jerusalemsa āǀgabis somge-ais dis ase ǁîs ǂnamipe hâ ǁaedi hoade nîra ǂnûiba, ā Judab on ge ǁîs xa nîra hāǂamhe ǃnamiǂgās Jerusalems dis ǃnâ.

³Tsî i ge ǁnātsē nîra ī, Jerusalemsa ta nî tita ǁaedi hoade ǃgom ǀuise ǂnûiba ǃkhaisa, ǁnān ǁîsa ga ūkhâin hoan ge ǂanǂansase nîra tsûtsûsen, tsî ǁaedi ǃhūbaib didi hoadi ge ǁîs ǃoagu nîra ǀhû.

⁴ǁNātsē ta ge tita mâ hāb hoaba ǃao kai, tsî ǁîgu di ǃgapi-aoga nîra ǃkhau kai, tib ra ǃKhūba mî. Xawe Judab ommi ǂama ta ge tita ti mûra nîra khowa, tsî hān ǁaedi din hoana ta ge nîra ǂgī kai.

⁵ǃNubai gu ge ǂgaeǂgui-aogu Judab diga ǁîgu di ǂgaob ǃnâ nîra mî: ǁAnsaben Jerusalems din ge tita ǀgaise nîra ība, ǃKhūb ǂnubidi dib ǁîn Elob ǃnâ.

⁶ǁNātsē ta ge tita ǂgaeǂgui-aogu Judab diga ǀaexa ǀaekhorose nîra ǂnûi ǀaen ǃnâ tsî ǀaexa ǃamamǀaese ǃgaeǀkhādadi ǃnâ, o gu ge amǀkhābǀîs kas ǁareǀkhābǀîs kas hoasa ǁîgu ǂnamipe hâ ǁaedi hoade nîra hapu, os ge Jerusalemsa ǁkhāti ǃaruǀî Jerusalems ǂûs ǃnâ nîra ǁanǃnâhe.

⁷Tsî ǃKhūb ge ǂgurose tentomdi Judab dide nîra ore, ǂkhaisib Davib ommi dib tsî ǂkhaisib Jerusalems ǁansaben dib tsîn Judab ǃoa-ai kaikaisen tidega.

⁸ǁNātsēb ge ǃKhūba ǁansaben Jerusalems dina nîra sâu, tsî ǁnā-i ǁîn ǁaegu ga ǃnôa-i, ǁî-i ge ǁnātsē Davib khami nîra ī, tsî ommi Davib dib ge elogu khami nîra ī, tsî ǀhomǃgāb ǃKhūb dib khami ǁîn di ais aiǃâ.

⁹Tsî i ge ǁnātsē nîra ī, tita nî ǁnā ǃhaodi, Jerusalems ǃoagu ra hādi hoade ǃgamsa ôa-am ǃkhaisa.

¹⁰Xawe ommi Davib dib ǂama tsî ǁansaben Jerusalems din ǂama ta ge tita Gagab ǀkhommi tsî ǀgoredi tsîn diba nîra ǁhōǂui. On ge ǁîna tita, ǃkhāǃganun ge ta, nîra kōǀî on ge ǁî ta ǂama ǃgae-āsa nîra dī ǀguise ǃnae hâ ǀgôab ǂamas khami; on ge ǁî ta ǂama ause nîra ǃgae, sats khoets ra ǂguroǃnaesab ǂama ǃgae khami.

¹¹ǁNā tsēs ge ǃgae-āsa nîra kai Jerusalems tawa, ǁnā ǃgae-ās Hadab Rimons dis ge ǃgoaǃnāb Megidos dib ǃnâ ī i khami.

¹²Ob ge ǃhūba nîra ǃgae-ā, mâ ǃhaos hoasa ǀguri hâse; ǃhaos Davib ommi disa ǀguri hâse tsî ǁîn tarade ǀguri hâse; ǃhaos Natanni disa ǀguri hâse tsî ǁîn tarade ǀguri hâse,

¹³ǃhaos Levib ommi disa ǀguri hâse tsî ǁîn tarade ǀguri hâse; ǃhaos Simeib disa ǀguri hâse tsî ǁîn tarade ǀguri hâse,

¹⁴ǁnās ǁkhās xase nau ǃhaodi hoade, mâ ǃhaos hoasa ǀguri hâse tsî ǁîn tarade ǀguri hâse.