Read Khoekhoegowab Saxariab 13 Bible Online

Saxariab 13 - Khoekhoegowab bible

Saxariab 13

¹ǁNā tsē-i ge ǀau-e ommi Davib dib tsî ǁansaben Jerusalems dina nîra ǁkhowa-ambahe, ǁoreb ǃaroma tsî ǃanuoǃnâsib ǃaroma.

²Tsî i ge ǁnātsē nîra ī o ta ge tita ǀondi ǁgôa-elogu dide ǃhūba xu nîra ǀariǂui, tib ra ǃKhūba mî, ǁîdi ǃaruǀî ǂâihe tides kōse; ā kēbo-aogu on tsî ǃanuoǃnâ gagas ona ta ge tita ǃhūba xu nîra dībē.

³Tsî i ge nîra ī, khoe-i ga ǃaruǀî kēbo ǃnubai i nî ǁgûb kas, ǁgûs ǁî-e ge ǁoras kas hoasa ǁî-i ǃoa mî ǃkhaisa: Sats ge ûi tide, ǂkhabasets ǃKhūb di ǀons ǃnâ goro kēbo amaga. O ra ge ǁgûb tsî ǁgûs tsîra, ǁî-e ge ǁorara, ǁî-e nîra ǃkhāǃganu, ǁî-i ga kēbo ǃnubai.

⁴Tsî i ge ǁnātsē nîra ī, kēbo-aogu nîra tao ǃkhaisa, mâb hoaba ǁîb di ais ǃaroma, kēbob ka ǃnubai; tsî gu ge ǀûxa ǂamsaraba ǂgaeǂgā tide, ǂhumi nîse.

⁵Tsîb ge nîra mî: Tita ge kēbo-ao tama ta. Tita ge aota ǃhanaba ra sîsen ta, khoe-i ge sîsenna ge ǃgaeba te ti ǂkhamsisa xu.

⁶Tsî khoe-i ga ǁîb ǃoa: Tare ǀhapina kha nēn, sa ǃomǁae hâna? ti mîo, ob ge ǁîba nîra mî: Nēn ge ǁnā ǀhapin ti horesan di oms ǃnâ ta ge ǂnauhena.

⁷Gôatse ǃnoaǂkhai ti ǃûi-aob ǃoagu, tsî ǁnā aob, ti horesab ǃoagu! tib ra ǃKhūb ǂnubidi diba mî. ǂNau ǁnā ǃûi-aoba, on ge gūna nîra ǀgaruǀgaruhe, o ta ge tita ti ǃomma ǂkharinǀî nîra unu.

⁸Tsî i ge ǃhūb hoaragab ǃnâ nîra ī, tib ra ǃKhūba mî, ǀgam ǃnonaǁî ǃâra nî ǁîb ǃnâ hîkākāhe tsî ǁō ǃkhaisa; xawe ǀgui ǃnonaǁî ǃâs ge ǁîb ǃnâ nîra ǃgau.

⁹Tsî tita ge ǁnā ǃnonaǁî ǃâsa ǀaes ǃnâ ūǂgā tsî ǁîsa nîra tsunitsuni ǀhaiǀurib ra tsunitsunihe khami, tsî tita ge ǁîsa nîra ǃâitsâ, sats khoets ra ǃhuniǀuriba ǃâitsâ khami, os ge ǁî ǃâsa ti ǀonsa nîra ǂgaiǀî, tsî tita ge ǁîna nîra ǁnâuǃā. Tita ge: ǁÎn ge a ti ǁae, ti nîra mî; tsî ǁîn ge: ǃKhūb ge a ti Elo, ti nîra mî.