Read Khoekhoegowab Saxariab 14 Bible Online

Saxariab 14 - Khoekhoegowab bible

Saxariab 14

¹Mû tsēs ra ǃKhūba xu hā, ǁîs ais nî ǁkhâuǁnâsa sa ǁaegub ǃnâ ǀgoraǂuihesa, Jerusalemse.

²Tita ǁaedi hoade Jerusalems ǃoagu ǃkhams ǁga nîra ǀhaoǀhao xui-ao; os ge ǃāsa nîra ūhe, o di ge omde nîra ǁkhâuǁnâhe, o di ge tarade nîra ǀgaiǃkhōhe. Ob ge ǃās di ǃkhareba ǃkhōsis ǃnâ nîra ǃgûǂoa, xawe ǃgau hâ ǁaes ge ǃāsa xu ǃhomǂuihe tide.

³Tsî ǃKhūb ge nîra ǂoa, tsî ǁîb ge ǃhaodi ǃoagu nîra ǃkham, ǁîb gere ǃkham khami torob di tsēs ai.

⁴Tsî ǁîb ǂaira ge ǁnā tsē ǀKheraǃhommi, Jerusalems aiǃâ aiǂoasǀî ǁgoeb ai nîra mâ, ob ge ǀKheraǃhomma ǀgam ǃâra ǃnâ nîra ǀgoraǃāsen aiǂoasǀî tsî huriǂoasǀî, ama kai ǃgoaǃnāb nî hâs kōse, ob ge ǀgui ǃkhareb ǃhommi diba ǀapasǀî nîra ǂgō tsî nau ǃkhareb âba ǃkhawagasǀî.

⁵ǃNubai du ge sado ǃgoaǃnāb ti ǃhomgu diba-ū nîra ǃhū, ǃgoaǃnāb ǃhomgu dib nî Asels kōse sī xui-ao, tsî du ge nîra ǃhū, ǃhūǂgubib Usiab, Judab gao-aob di tsēdi ǃnâ ge īb aiǃâ du ge ǃhū khami, ǃnubaib ge ǃKhūb ti Eloba nîra hā tsî ǃanun hoana sats ti ǃKhūts ǀkha.

⁶Tsî i ge ǁnātsē nîra ī, ǃgomǀgausa ǃnâb nîra ǀkhai tsî durutsuxub nîra hā ǃkhaisa.

⁷Tsî ǁnā tsēs ge ǀgui tsēs ǀguis ase nîra ī, ǃKhūb tawa a ǂansasa, tsē tsî tsuxu tamas a ǃkhaisa, tsî i ge nîra ī, ǃui-amǁaeb ai i nîra ǃnâ ǃkhaisa.

⁸Tsî i ge ǁnātsē ǁkhāti nîra ī, ûitsama ǁgamgu nî Jerusalemsa xu dâu ǃkhaisa ǀgui ǃkhareb ge aiǂoas di huribǀî tsî nau ǃkhareb ge huriǂoas di huribǀî nîra dâu, ǁîgu ge ǁkhunab tsî saob tsîkha kōse nîra hâ.

⁹Tsî ǃKhūb ge gao-aose nîra ī ǃhūbaib hoab ǂama. ǁNātsēb ge ǃKhūba nîra ǀgui tsî ǀons âb ge nîra ǀgui.

¹⁰Nē ǃhūb hoab ge mâ ǀkhāb hoab ai nîra ǂgā kaihe, Gebasa xu Rimons kōse, Jerusalemsa xu ǃkhawagas ǀkhāb kōse, tsî ǁîs ge ǀgapi tsî nîra ǁanǃnâhe ǁîs di ǃkhais ai, Benjaminni di ǁāba xu ǂguro ǁāb di ǃkhais kōse ǁHôaǁāb kōse, tsî ǂgō-ommi Hananeli diba xu gao-aob di ǂauxûidāǃnāǃoregu kōse.

¹¹Tsîn ge ǁîs ǃnâ nîra ǁan tsî ǀâxarexū-i xare-i ge ǃaruǀî hâ tide, tsî Jerusalems ge sâusase nîra ǁan.

¹²Tsî nēb ge nîra ǁnā ǁnora-ai, ǃKhūb ǁîb ǀkha ǁnā ǁaedi Jerusalems ǃoagu nî ǃkhamdi hoade nî ǁnoraba: ǁÎb ge mâ-i hoa-i di ǁgansa ganupe i ǂaira â-i ai mâ hîa nîra kā kai, tsî mâ-i hoa-i di mûra ge ǁîra di āra ǃnâ nîra kā, tsî mâ-i hoa-i di nams ge ǁî-i di ams ǃnâ nîra kā.

¹³ǁKhāti i ge ǁnātsē nîra ī, kai ǂkhupi-i ǃKhūba xu ra hā-i nî ǁîn ǃnâ hâ ǃkhaisa, mâ-i hoa-i nî ǁî-i ǀgūkhoe-i ǃomma ǃkhō, tsî mâ-i hoa-i nî nau-i ǃommi ǃoagu ūkhâihes kōse.

¹⁴Tsî Judab ge ǁkhāti Jerusalems ǃoagu nîra ǃkham, on ge xūn ǁîs ǂnamipe hâ ǃhaodi hoadi din, ǃhuniǀurib tsî ǀhaiǀurib tsî kaise ǂgui saran tsîna nîra ǀhaoǀhaohe.

¹⁵ǁNās ǁkhās xaseb ge ǁnora-aib hān dib tsî hā-eseln dib tsî ǃnaidi dib tsî eseln dib tsî mâ ǀgoa-i, ǁnā toroǂnubidi ǃnâ hâ-i diba naun di ǁnora-ai i ge ī-i khami nîra ī.

¹⁶Tsî i ge nîra ī, ǃhaodi hoadi xa ga ǃgaun, Jerusalems ǃoagu ge hān, nî kuriba xu kurib ǁga ǃapa ǃkhaisa, Gao-aob ǂnubidi di ǃKhūban nî ǀgoreǀîse tsî ǁhao-omdi di kaitsēsan nî tsēdīse.

¹⁷Tsî i ge nîra ī, mâ ǃhaos ǃhūbaib di ǃhaodi dis ga Jerusalems ǃoa ǃapa tama io, Gao-aob ǂnubidi di ǃKhūban nî ǀgoreǀîse, o i ǁîn ǂama ǀapi-i xare-e hā tidesa.

¹⁸Tsî ǃhaos Egipteǁîn dis din, ǀapi-i ǁîn ǂama hā taman, ga ǃapa tsî sī tama io, ob ge ǁnā ǁnora-aiba ǁîn ǂama nîra hâ, ǁîb ǀkhab nî ǃKhūba ǁaede ǁnoraba, ǁnān ǃapa tidena, kaitsēs ǁhao-omdi disa nî tsēdīse.

¹⁹Nēb nîra Egipteǁîn di ǁkhara tsî ǁkhāti ǁnā ǃhaodi, ǃapa tidedi hoadi di ǁkhara, kaitsēs ǁhao-omdi disa di nî tsēdīse.

²⁰ǁNā tsēs ai di ge nē mîde: “ǃAnusib ǃKhūb dib” hān di ǀurirodi ai nîra mâ. Tsî sūdi ǃKhūb ommi ǃnâ hâdi ge ǀgapiǃoredi altars aiǃâ mâdi khami nîra ī.

²¹Ā, sūdi Jerusalems ǃnâ tsî Judab ǃnâ hâdi hoadi ge ǃKhūb ǂnubidi diba ǃanuse nîra ība, on ge ǁnān, ǁguiba ǂgao hân hoana hā tsî ǁîdi xa nîra ū tsî ǁîdi ǃnâ nîra sâi, tsî Kanaanǁîb xareb ge ǃaruǀî ǃKhūb ǂnubidi dib di ommi ǃnâ hâ tide ǁnā tsēs ai.