Read Khoekhoegowab Saxariab 2 Bible Online

Saxariab 2 - Khoekhoegowab bible

Saxariab 2

¹Tsî ta ge tita ǁkhawa kōkhâi tsî ge mû, aob ge ge hâ i ǀguiro-ūtsuri-e ǃomǁae ūhâba.

²O ta ge tita: Mâǀîts ra ǃgû? ti ge mî. Ob ge ǁîba tita ǁga ge mî: Jerusalemsa ta nî ǀguirose, mû ta nîga, matikōseb ǂhabasib âsa a kai tsî matikōses a gaxu ǃkhaisa.

³Tsî mû, ǁnā ǀhomǃgāb, ti ǀkha ra ǃhoab ge ge ǃgûǂoa, tsî ǀnî ǀhomǃgāb ge ǂoa tsî ǁîba ge ǃgûǃoa.

⁴Tsîb ge ǁîb ǃoa ge mî: ǃKhoe îts nē ǂkhamkhoeba ǃhoaǀî, mî rase: Jerusalems ge ǁkhowa-amsa ǃāse nîra ǁanǃnâhe ǂguisib khoen tsî ǀgoan tsîn, ǁîs ǃnâ hân dib xa.

⁵Tsî tita ge ǁîsa ǀaexa ǂnubiǂgoab, ǁîs ǂnamipe hâb axase nîra ība, tib ra ǃKhūba mî, tsî tita ge ǁîs ǁaegu ǂkhaise nîra ī.

⁶Khâi, khâi, ǃhū du re ǀapas di ǃhūba xu, tib ra ǃKhūba mî, tita ge sado ge khoraǂui, haka ǂoadi ǀhommi didiǀî, tib ra ǃKhūba mî.

⁷Khâi, Sionse, ǃhū re sas Babilons ôas tawa ǁan hâse.

⁸Nētib ra ǃKhūb ǂnubidi diba mî xuige: ǁNā ǂkhaisib sa ǂama hâb ǃoab ge ǁîba tita ge sî, ǁnā ǃhaodi, sasa ge ǀâǀhanadi ǁga, sasa ga tsâǀkhā-i, ǁnā-i mûǃnâdi âba ra tsâǀkhā xui-ao.

⁹Tsî mû, tita ge ti ǃomma ǁîn ǂama nîra gongon, on ge ǁîna ǁîn ǃgāna nîra ǁkhâuxū kaiba. Nēti du ge sado nî ǂan, ǃKhūb ǂnubidi dib ge tita sî ǃkhaisa.

¹⁰Dâ, îs ǃgâiaǂgao, sas Sionni ôase, îs mû, tita ge ra hā, tsî tita ge sa ǁaegub ǃnâ nîra ǁan, tib ra ǃKhūba mî.

¹¹Tsî ǀoasa ǁaedi ge ǁnātsē ǃKhūba nîra dīǀarobahe, tsîn ge ti ǁaese nîra ī. Tsî tita ge sa ǁaegub ǃnâ nîra ǁan, o du ge nîra ǂan, ǃKhūb ǂnubidi dib ge tita sadu ǃoa sî ǃkhaisa.

¹²ǃNubaib ge ǃKhūba Judaba nîra ǀumi, ǁîb di amǃnâse ǃanu ǃhūb ǃnâ, tsî ǁîb ge Jerusalemsa ganupe nîra ǁhûiǂuibasen.

¹³ǃNō, sas ǁgans hoase, ais ǃKhūb dis aiǃâ, ǁîb go khâi ǃanu hâǃkhais âba xu xuige.