Read Khoekhoegowab Saxariab 4 Bible Online

Saxariab 4 - Khoekhoegowab bible

Saxariab 4

¹Tsî ǁnā ǀhomǃgāb tita ǀkha ra ǃhoab ge ǁkhawa ge hā, tsîb ge ǁîba tita ge ǂkhaiǂkhaikhâi, khoe-i ǂomsa xu ra ǂkhaiǂkhaikhâihe khami.

²Tsîb ge ǁîba tita ǁga: Tare-ets ra mû? ti ge mî. O ta ge tita ge mî: Tita ge ra mû, hoaraga ǃhuniǀurikandelara tsî olixaparo-e ǁîb ǂamǃnâ tsî hû lamde ǁîb ai, ǁnā lamdi ge hû tsî hû ǂnâxūde ge ūhâ i ǁîb danas ǂamǃnâ hâde,

³tsî ǀgam ǀkherahaira ǁîb xōǀkhā, ǀguisa olixaparos amǀkhāb ai tsî nausa ǁîs ǁareǀkhāb ai.

⁴O ta ge tita ǁnā ǀhomǃgāb tita ǀkha ra ǃhoab ǃoa ge mî: Ti ǃkhūtse, tarexūna nēna?

⁵Ob ge ǁnā ǀhomǃgāb tita ǀkha ra ǃhoaba ǃeream te tsî ge mî: ǂAn tamats kha hâ tarexūn a ǃkhaisa? O ta ge tita: Hî-î, ti ǃkhūtse, ti ge mî.

⁶ǃNubaib ge ǁîba ǃeream tsî ge mîǀî te: Nēs ge mîs ǃKhūb disa Serubabeli ǃoa mî rase: ǀGaiba xu tama i tsî ǁkhāti ǀgaidība xu tama i tsî ti Gagaba xus ge nē xūn nîra īsa, tib ra ǃKhūb ǂnubidi diba mî.

⁷Taritsa sats kai ǃhomtsa? Ais Serubabeli dis aiǃâts ge satsa nîra ǂgā kai, ǁîb danaǀuisa nîra ūǀkhī xui-ao, ǃgarise: ǀKhomma, ǀkhomma ab ǁîs ǀkha hâ! ti ra ǂgaiǂuise.

⁸ǃAruǀîs ge mîs ǃKhūb disa ge hāba te, mî rase:

⁹ǃOmkha Serubabeli dikha ge nē omma ge ǃgaoǃgao, ǁîb di ǃomkha ge ǁîba ǁkhāti nîra dītoa, sadu nî ǂanga, ǃKhūb ǂnubidi dib ge tita sadu ǁga sî ǃkhaisa.

¹⁰Tari-e kha tsēs ǂkhari xūn disa ra ǃharaxū? ǁNā hûdi nî ǃgâiaǂgao xawe, ǀhaiǀuriǃgomma di ga Serubabeli ǃomǁaeb hâ ǃkhaisa mû ǃnubai, ǁnādi ge mûdi ǃKhūb didi, ǃhūbaib hoaragaba ra ǃgûǃnâǃganude.

¹¹ǃAruǀî ta ge tita ǃeream tsî ǁîb ǃoa ge mî: Tarera ǁnā ǀgam ǀkherahaira, amǀkhāb kandelari dib tsî ǁareǀkhāb âb ai hâra?

¹²Tsî ta ge ǀgamǁî ǃnās ai ǁkhawa ǁîb ǃoa ge mî: Tarekha ǁnā ǀgam ǂgonakha ǀkherahaira dikha, ǁnā ǀgam ǃhuniǀuriǀā-ūxūra ǃnâ hâkha, ǃhuniǀurib ra ǂnâxūkha?

¹³Ob ge tita ǀkha ǃhoa tsî ge mî: ǂAn tamats kha hâ, tare kha a ǃkhaisa? O ta ge tita: Hî-î, ti ǀhonkhoetse, ti ge mî.

¹⁴ǃNubaib ge ǁîba ge mî: Nēkha ge ǁnā ǀkherahais ǂgonakha, ǃKhūb ǃhūbaib hoaragab dib aiǃâ mâkha.