Read Khoekhoegowab Saxariab 5 Bible Online

Saxariab 5 - Khoekhoegowab bible

Saxariab 5

¹Tsî ta ge ǁkhawa ǃgapakhâi tsî ge kō, tsî mû, ǁkhana ra xamiǂkhani-e!

²Ob ge ǁîba tita ǁga: Tare-ets ra mû? ti ge mî. O ta ge tita ge mî: Tita ge ǁkhana ra xamiǂkhanis, ǀgamdisi ǂhâgu gaxuba ūhâs tsî disi ǂhâgu kō ǂhababa ūhâsa ra mû.

³Ob ge ǁîba tita ǁga ge mî: Nēb ge ǁnā ǀâxareb, ǃhūb hoaragab ǂama nî ǂoaba. ǃNari ka khoe-i hoa-i ge nēpa xu nîra ǃhomǂuihe, ǁnā ǀâxareb ǁkhāb ǃoa, tsî ǂkhabase ga nū khoe-i hoa-i on ge nēpa xu nîra ǃhomǂuihe, ǁnā ǀâxareb ǁkhāb ǃoa.

⁴Tita ge nē ǀâxareba ra ūǀkhī, hāb nîse tsî ǃnari-ao-i oms ǃnâ tsî ǁnā-i, ti ǀons ǃnâ ǂkhabase ga nū khoe-i oms ǃnâ, tsîb ge ǁîba ǁî-i oms ǁaegub ǃnâ nîra hâǁgoa, tsîb ge ǁîba nîra hapu ǁîb di haigu tsî ǁîb di ǀuidi tsîn hoan ǀkha, tib ra ǃKhūb ǂnubidi diba mî.

⁵Tsî ǀhomǃgāb, tita ra ǃhoa-ūb ge ǃgûǂoa tsî tita ǃoa ge mî: Kōkhâi, îts mû, taren a ǃkhaisa, ǁnān ǀkhī rana.

⁶O ta ge tita: Tare-e? ti ge mî. Ob ge ǁîba: Efab ge ǁnāb ǀkhī raba, ti ge mî. ǃAruǀîb ge ǁîba: Nēs ge mûs ǁîn ǂama hâsa, ǃhūb hoaragab ǃnâ, ti ge mî.

⁷Tsî mû ǂganais ǂgoaǀurib dis ge ge ūkhâihe, tsîs ge tarasa efab ǃnâ ge ǂnôa i.

⁸Ob ge ǁîba: Nēs ge eloxoresasisa, ti ge mî, tsîb ge ǁîsa efab ǃnâ ge aoǂgā, tsîb ge ǂgoaǀurib di ǂganaisa ams âb ai ge aoǂnûi.

⁹Tsî tita ge ge kōkhâi tsî mû, ǀgam tarara ge ge ǀkhī, tsî ǂoa-i ge ǁgabogu âra ǃnâ ge hâ i. Tsî ra ge ǁgaboga ge ūhâ i ǃariǃkhās di ǁgabokha khami īga, tsî ra ge efaba ǃhūb tsî ǀhommi tsîkha ǁaegu ge ūǃgû.

¹⁰ǃNubai ta ge tita ǁnā ǀhomǃgāb, tita ra ǃhoa-ūb ǃoa: Mâǀîsa nē efab ra ūǃgûhesa? ti ge mî.

¹¹Ob ge ǁîba tita ǁga ge mî: Omsas nî ǁîsa Sinari ǃhūb ǃnâ ombahese; tsî toas ka os ǁnāpa nî ǁapoǁapohe tsî ǃgaoǃgaob âs ai nî ǂnûihese.