Read Khoekhoegowab Saxariab 7 Bible Online

Saxariab 7 - Khoekhoegowab bible

Saxariab 7

¹Tsî i ge hakaǁî kurib gao-aob Dariub dib ǃnâ ge ī, mîs ǃKhūb dis ge Saxariaba hāba ǃkhaisa hakaǁî tsēs khoeseǁî ǁkhâb, Kisleu ti ǀon hâb dis ai.

²Elob ommi ǃoan ge Sareseri tsî Regem-Meleb tsî ǁîkha aoga sî ǃnubai, ais ǃKhūb disa gu nî ǀkhomase,

³mî rase: ǁNā pristergu, ǃKhūb ǂnubidi dib di ommi ǃnâ hâgu ǃoa tsî kēbo-aogu ǃoa, mî rase: Tita ā ta nî koroǁî ǁkhâb ǃnâ, ǁî-aitsama ra ǁkhaesense, nētikō ǂgui kuriga ta gere dī khami?

⁴ǃNubais ge mîs ǃKhūb ǂnubidi dib disa ge hāba te, mî rase:

⁵ǃHoa nē ǃhūb di ǁaes hoas ǃoa tsî pristergu ǃoa îts mî: ǂÛtamahâ tsî du gere ǃgae ǃnubai, koroǁî tsî hûǁî ǁkhâb ǃnâ nē hûdisi kurigu ǃnâ: Sado kha tita du ǂûtama gere hâba?

⁶Tsî sadu ǂû tsî gere āo, sa tamado ǁnā ǂû tsî gere ādo?

⁷ǁNā mî tamade, ǃKhūb ge aibekam kēbo-aogu ǃoabasa xu ǂgaiǂuide, Jerusalems ǁanǃnâhe tsî sâsase hâ hîa, tsî ǁîs ǃādi ǁîs ǂnamipe hâde tsî ǃkhawagas tsî ǃgoaǃnāb tsîra ǁanǃnâhe hâ hîa?

⁸ǃAruǀîs ge mîs ǃKhūb disa Saxariaba ge hāba mî rase:

⁹Nētib ge ǃKhūb ǂnubidi diba ge ǃhoa, mî rase: ǀGoraǃgâ ǂhanu-ai ǃgoraǃgâ-e, î du ǃgâisib tsî ǀkhomxaǂgaosib tsîkha dī nē-e nau-i tawa.

¹⁰Î du tā ǁgâiǀā ǃoatara-i kas, ǃguniǀgôa-i kas, ǃhaokhoe-i kas, ǀkhomǀkhomsabe-i kas hoasa, î du sadu ǂgaob ǃnâ nē-e nau-i di ǂkhabab xa tā ǂâi.

¹¹Xawen ge ǃgaoǃgâsa ge ǂkhā, tsîn ge ǃhōb âna ge ǂgaedawa, tsîn ge ǂgaede ge ǂganam, ǁnâun tidega.

¹²Tsîn ge ǂgaob âna ge diamantǀui kai, ǁnâun tidega ǂhanub tsî ǁnā mîdi, ǃKhūb ǂnubidi dib ge sîde, Gagab âb ǃnâ aibekam kēbo-aogu di ǃoabasa xu. ǁÎ ǃkhaisa xub ge kai ǁaiba ge ǀkhī, ǃKhūb ǂnubidi diba xu.

¹³ǁNā-amaga i ge ǁnāti ge ī: ǁÎb ge ǂgai tsî ǁîn ge ǁnâu bi tama is ǁkhās khamin ge ǁîn ona ge ǂgai, xawe tita ge ǁnâu tama ge i, tib ra ǃKhūb ǂnubidi diba mî.

¹⁴Tsî tita ge ǁîna ge ǃgombē ǁnā ǃhaodi, ǁîna ǀūn hoan ǃnâ, tsî ǃhūb ge ǁîn khaoǃgâ ge hîǀhuruhe, khoe-i xare-i ǁîb ǃnâ ǃgû ka oa tamas kōse; ǁîn ge ǁnā ǃgâi ǃhūba ǃū-aisa ǃhū kai xui-ao.