Read Khoekhoegowab Saxariab 8 Bible Online

Saxariab 8 - Khoekhoegowab bible

Saxariab 8

¹ǁNās khaoǃgâs ge mîs ǃKhūb ǂnubidi dib disa ge hāba te, mî rase:

²Nētib ra ǃKhūb ǂnubidi diba mî: Tita ge Sions ǂama ge tau, kai tauxasi-i ǀkha; ā, kai ǁgôasib ǀkha ta ge tita ǁîs ǂama ge tau.

³Nētib ra ǃKhūba mî: Tita ge Sions ǃoa ge oa, tsî tita ge Jerusalems ǃnâ nîra ǁan, tsî Jerusalems ge ǃās amab dise nîra ǂgaihe, tsî ǃhommi ǂnubidi di ǃKhūb diba ǃanusib di ǃhomse.

⁴Nētib ra ǃKhūb ǂnubidi diba mî: Gorosen ge kaira aogu tsî kaira taradi tsîna Jerusalems ǃgangu ai nîra ǂnû, mâ-i hoa-i ân ge ǁî-i di ǁgâibasenhaiba ǁî-i ǃomǁae nîra ūhâ kairasib xa.

⁵Tsî daogu ǁnā ǃās digu ge ǀgôarogu tsî ǀgôarodi tsîn xa nîra ǀoa, ǁîs daogu ai ra ǀhuruse.

⁶Nētib ra ǃKhūb ǂnubidi diba mî: ǁÎ ǃkhais ge mûdi nē ǁaes xa ga ǃgaun didi ǃnâ ǁnā tsēdi ǃnâ buruxa, ǃkhais ǃaroma i kha ǁnâi ti mûǁae ǁkhāti nî buruxa? tib ra ǃKhūb ǂnubidi diba mî.

⁷Nētib ra ǃKhūb ǂnubidi diba mî: Mû, tita ge ti ǁaesa nîra ore aiǂoas ǃhūba xu tsî huriǂoas di ǃhūba xu.

⁸Tsî tita ge ǁîna nēxopa nîra ūhā, Jerusalems ǁaegub ǃnân nî ǁanga, tsîn ge tita ǁaese nîra ība, tsî tita ge ǁîna Elose nîra ība amab tsî ǂhanu-aisib tsîkha ǃnâ.

⁹Nētib ra ǃKhūb ǂnubidi diba mî: ǀGaiǀgai du re sadu ǃomga, sadu nē tsēdi ǃnâ mîdi ǁnā kēbo-aogu, ǃKhūb ǂnubidi dib di ommi, tempeli nî ǂnubihega ra ǃgaoǃgaohe tsēs ai ge hâ igu di amde xu ge ǁnâudo.

¹⁰ǁNā tsēdi aiǃâs ge amǃnâs khoe-i disa xū tamase ge ī i, tsî amǃnâs ǀgoan dis ge ǁau ge i, tsî ǂoa geren tsî ǂgâ geren ge ǂkhî-i xare-e ūhâ tama ge i khākhoeb ǃaroma, tita ge khoen hoana sî xui-ao, mâ-i hoa-e ǁî-i di ǀgūkhoe-i ǃoagu.

¹¹Xawe ta ge tita ǃgau gen nē ǁaes dina, aibekam tsēdi ǃnâ ta ge ī i khami ība tide, tib ra ǃKhūb ǂnubidi diba mî.

¹²ǃKhommi ge nîra ǃgâiǃgâ, ǂauxûiǂûhais ge ǂûn âsa nîra mā, tsî ǃhūb ge ūǀkhīn âba nîra mā, tsî ǀhommi ǀaub âba nîra mā xui-ao, tsî tita ge ǃgau gen nē ǁaes dina nēn hoana nîra ǀumi kai.

¹³Tsî i ge nîra ī, sadu Judab ommi didu tsî sadu Israeli ommi didu ge ǀâxarese ǃhaodi ǃnâ ī is ǁkhās xase ta ge tita sado nîra sâu tsî du ge ǀkhaese nîra ī: Tā ǃao, î gu sadu ǃomga ǀgai.

¹⁴Nētib ra ǃKhūb ǂnubidi diba mî xui-ao: Tita ge ǂâibasen khami, tsūdī-ū du ta nî ti, sadu îgu ge tita kaise ǁaiǁai ǃnubai; tib ra ǃKhūb ǂnubidi diba mî, tsî ta ge ǁî ǃkhais xa ǃhausen tama ge i;

¹⁵ǁnās ǁkhās khami ta ge tita ǁkhawa nē tsēdi ai nî ǃgâidī-ū Jerusalems tsî sadu Judab ommi dido: Tā ǃao!

¹⁶Nēn ge ǁnā xūn, sadu nî dīna: Amaba ǃhoa mâ-i hoa-e ǁî-i di ǀgūkhoe-i ǀkha, î du amab tsî ǂkhîbǀgoraǃgâs tsîra ǀgoraǃgâ sadu di ǁāgu ǃnâ;

¹⁷î du tā nē-e nau-i di ǂkhabab xa ǂâi sadu ǂgaob ǃnâ, î du ǂkhaba nūsa tā ǀnam, nēn hoan ge tita ǁkhan hâ xūna xuige, tib ra ǃKhūba mî.

¹⁸ǁKhawas ge mîs ǃKhūb ǂnubidi dib disa hāba te tsî ge mî:

¹⁹Nētib ra ǃKhūb ǂnubidi diba mî: ǂÛtamahâs hakaǁî ǁkhâb dis tsî ǂûtamahâs koroǁî ǁkhâb dis tsî ǂûtamahâs hûǁî ǁkhâb dis tsî ǂûtamahâs disiǁî ǁkhâb dis ge Judab ommi dina nîra dâ kaiba tsî nîra ǃgâiaǂgao kaiba tsî nîra dâxa kai ǁae kaiba, î du ǁnâi amab tsî ǂkhîb tsîkha ǀnam.

²⁰Nētib ra ǃKhūb ǂnubidi diba mî: Ganupe nîra ī ǃkhais ge, ǁaedi tsî ǁansaben tsîn nî ǂgui ǃāde xu hāsa,

²¹tsî ǁansaben ǀgui ǃās din nî ǁansaben nau ǃās din ǃoa ǃgû tsî mîsa: A da ôasase ǃgû, î da ais ǃKhūb disa ǀkhoma, î da ǃKhūb ǂnubidi diba ôa; tita on ge nî ǃgû.

²²Nēti di ge ǂgui ǁaedi, tsî ǀgaisa ǃhaodi tsîna nîra hā, ǃKhūb ǂnubidi diban nî Jerusalems tawa ôase, tsî ais ǃKhūb disan nî ǀkhomase.

²³Nētib ra ǃKhūb ǂnubidi diba mî: ǁNā tsēdi ai i ge nîra ī, disi khoegu mâ gowa-i ǃhaodi di-i hoa-i digu nî saraǀam-i Jodeǁî khoeb di-e ǃkhō tsî mî ǃkhaisa: Sige ge sadu ǀkha nî ǃgû, Elob sadu ǀkha hâ, ti ge go ǁnâu xui-ao.