Read Khoekhoegowab Saxariab 9 Bible Online

Saxariab 9 - Khoekhoegowab bible

Saxariab 9

¹ǂHôas ǃKhūb mîs dis ǃhūb Hadrab tsî Damaskus ǁîs di sâǃkhais tsîra xa hâs, ǃKhūb di mûs khoeb ai hâ xui-ao, Israeli ǃhaodi hoadi ais hâ khami,

²tsî ǁîb ge Hamats ona ǁîra ǀkha nî ǃkhōǂgā, Tires tsî Sidons tsîra, kaise ra gā-ai xawe.

³Tsî Tires ge ǁaposa ǃkhai-e ǂnubibasen xawe, tsî ǀhaiǀuriba tsarab khami ǀhaoǀhaobasen xawe, tsî ǀuiǃhuniǀuriba ǃās daogu di ǂgoab khami.

⁴Mû, ǃKhūb ge ǁîsa nîra ū tsî ǁîb ge ǁîs di ǁaposa ǃkhaisa hurib ǃnâ nîra aoǂgā, tsîs ge ǀaes xa nîra hapuhe.

⁵Askelons ge ǁî ǃkhaisa mû tsî nîra ǃao; Gasas on ge kai tsûb xa nîra hāǂamhe, tsî Ekrons ona, ǁîra ge mûmâinǃgâ-i ge ǁîra taotao amaga. Tsî gao-aob Gasas dib ge nîra kā tsî Askelons ge ǁanǃnâhe tide.

⁶Tsî ǀaiǀgôab ge Asdods tawa nîra ǁan, tsî tita ge ǃgurib Filisteǁîn diba nîra ǀamǀam.

⁷Tita ge ǀaob âba ǁîb amsa xu nîra dībē, tsî ǁgaiǁgaisan âba ǁîb ǁgûn di ǁaeguba xu. Nētib ge ǁîb ona sida Eloba nîra ǃgauba, ā, ǁîb ge gaosab khami nîra ī, Judab ǃnâ, tsî Ekrons ǃnâ Jebusǁîb khami.

⁸Tsî tita ge ti oms ǂnamipe nîra ǁgoe, ǂnubis ǃaroma, ǃgû-ī rab ǃaroma tsî oa rab ǃaroma. Doeǁga-aob ǃaruǀî ǁîna ǃgûǃnâǃganu tidega, nēsi ta go tita ǁî ǃkhaisa ti mûra ǀkha mû xui-ao.

⁹Kaise dâ re, sas Sions ôase! Dâ re, sas Jerusalems ôase! Mû, sa Gao-aob ge nîra hāba si ǂhanu-aise, tsî ǁîb ge a danao, ǃgamǃgamsensa tsî eseli ai ra ǃgapise, ǂkham eselrob, esels dib ai.

¹⁰Tsî tita ge kunide Efraimma xu nîra ǃhomǂui tsî hāna Jerusalemsa xu, ǁkhātis ge khās ǃkhams disa nîra hîkākāhe. Tsî ǁîb ge ǁaede ǂkhîba nîra ǃhoaba, tsî ǁîb di gaosis ge huriba xu hurib kōse tsî Eufratǃāba xu ǀkhâuǀams ǃhūbaib dis kōse nîra ī.

¹¹Tsî sats Sionts xasa, ǀaob sa ǃgaeǀhaos diba xu ta ge tita sa ǃgaehesana ǁnā tsaus ǁgamoǃnâsa xu ge ǂoa kai.

¹²ǁKhawa oa ǁaposa ǃkhaidi ǃoa, sadu ǃgaehesadu, ǃâubasen hâdo. Nētsēs ona ta ge tita ra ǂhôa, ǃhonarisase ta nîra mādawa du ǃkhaisa;

¹³tita ga Judaba khāse ǂgaeǃnâbasen ǃnubai tsî tita ga Efraimma ǃguruǁhōse ǀoaǀoabasen ǃnubai, tsî tita ga sats Sionts ôana sats Grikeǁî ǃhūts ôan ǃoagu ǂkhaiǂkhaikhâi ǃnubai tsî tita ga satsa gôab ǁē-aob dib ase ǂnûi ǃnubai.

¹⁴Ob ge ǃKhūba ǁîn ǂama nîra ǂhai; o gu ge ǂāgu âba napab khami nîra ǂoa. Ob ge ǃKhūb ǃKhūba xâiǁnâba nîra xâi; tsî ǁîb ge ǁgaoǂoadi ǃkhawagas didi ǀkha nîra hā.

¹⁵ǃKhūb ǂnubidi dib ge ǁîna nîra sâu. Tsî ǁîn ge nîra ǂû jaboxūsǀuiden ga dā ǃnubai, tsîn ge nîra ā tsî nîra ǂkhupi ǂauxûib xas khami; tsîn ge nîra ǀoa ǁguibaǃores khami altars ǁhôadi khami.

¹⁶Tsî ǃKhūb ǁîn di Elob ge ǁnātsē ǁîna nîra sâu gūn ǁîb ǁaes din khami. ǀUidi khaihe hâdi nî ǁîb di ǃhūb ǃnâ ǃkhause ǃkhāhe xui-ao.

¹⁷Matikōsen nî kai xūn âba! Matikōseb nî kai îsasib âba, ǃhorob nî ǂkhamkhoega tsî ǂkhon ǂauxûib nî ǂkhamkhoede ǀomkhâi kai.