Read Khoekhoegowab Maleaxib 1 Bible Online

Maleaxib 1 - Khoekhoegowab bible

Maleaxib 1

¹ǂHôas ǃKhūb di mîs xa hâs, Israeli ǃoa Maleaxib di ǃoabasa xu.

²Tita ge sado ge ǀnam i, tib ra ǃKhūba mî. Xawe du ge sado: Mâ xū-i ǃnâts kha satsa sida ge ǀnam i? ti ra mî. Esauba Jakob ǃgâsa tamaba? tib ra ǃKhūba mî. Xawe tita ge Jakoba ge ǀnam i,

³tsî Esauba ta ge tita ge ǁkhan hâ i, tsî tita ge ǃhomgu âba ǃū-aisa ǃkhaise ge ǂnûi, ǀumis âba ǀgirin ǃgaroǃhūb dina ge mâiba.

⁴Edommi ga: Sida ge go ǀgâ xawe da ge ǃū-aisa ǃkhaide ǁkhawa nî ǂnubi, ti mî xaweb ra ǃKhūb ǂnubidi diba nēti mî: ǁÎn ga ǂnubi xawe ta ge tita nî khôaǁnâ. Tsîn ge ǁîna ǀkharib eloxoresan dib, ti nîra ǂgaihe tsî ǁaes ǃKhūb ǁaixaǂam hâs ǀamosib kōse, ti.

⁵Tsî sadu mûdi ge ǁî ǃkhaisa nîra mû, tsî du ge: ǃKhūba ab kaikaihe ǀkharib Israeli diba xu, ti nîra mî.

⁶ǀGôab ge ǁgûba nî ǃgôa, tsî ǃgāba ǁîb ǀhonkhoeba; tsî ǁgû ta ka io: Mapab kha ǁnâi ti ǃgôasiba hâ? Tsî ǀhonkhoe ta ka io: Mapab kha ǁnâi ti ǃaoǃgâsiba hâ? tib ra ǃKhūb ǂnubidi diba mî sago pristergo ti ǀonsa ra ǃharaxūgo ǃoa. Xawe go ge sago: Tare xū-i ǀkha ge sige sa ǀonsa ra ǃharaxū? ti ra mî.

⁷Sago ge ǀuriǀurihe hâ pere-e ti altars ai ra ūhā, xawe go ge: Tare xū-i ǀkha ge ra ǀuriǀuri tsi? ti ra mî. Nēs: ǃKhūb di tāb ge a ǃharaxūhesa, ti go ra mî ǃkhais ǀkhas komo.

⁸ǂGī xū-e go ga ūhā, ǁguiba go nîse, xawe go ge ǁî ǃkhais xa tsūbahe tama hâ; tsî ǃhora-i kas, ǀaesen hâ-i kas hoasa go ga ūhā xawe i ge tsū tama hâ. ǁÎ-e go ga sago gaosaba ūsībao, ǃgâibaheb nî sago xa? Sago di aide ǃkhōǃoab nî? tib ra ǃKhūb ǂnubidi diba mî.

⁹ǁNâi ais Elob disa ǀkhoma, îb ǁîba sida ǀkhom, ti. Nēs ge sago di ǃomma xu ge ī, sago di aisa ǃkhōǃoab nî? tib ra ǃKhūb ǂnubidi diba mî.

¹⁰Tariba sago ǃnâ dao-amde ǁause ra ǂganamma? Tsîgo ge ǀaesa ti altars ai ǁause khau tama hâ. Tita ge sago ǃnâ ǃgâiǃgâibasen-e ūhâ tama hâ, tib ra ǃKhūb ǂnubidi diba mî, tsî ǁguibas sago ǃomma xu hâs ge tita ǃgâiba tama hâ.

¹¹Xawe ǁhais sores disa xu ǁîs ra ǂgâ ǃkhais kōses ge ti ǀonsa nîra kai ǁaedi ǃnâ tsî mâ ǃkhais hoas ǃnâs ge ti ǀonsa ǀanǀanǁguiba-e nîra ǁguibahe tsî ǃanu ǁguiba-e; ti ǀons nîra kai xui-ao ǁaedi ǃnâ, tib ra ǃKhūb ǂnubidi diba mî.

¹²Xawe sago ge ǁîsa ra ǀuriǀuri, ǃKhūb di tāb ge ǀuriǀurihe hâ, tsî ǁîb di hōǂgābasen xūn: ǁÎb di ǂûn ge a ǃharaxūsa, ti go ra mîo.

¹³Tsî go ge gorose ra mî: Mû, mâ ǀhupuǀhupusenai-e kha nē-e tsî go ge ǁî-e a ǃgombē ǁkhā, tib ra ǃKhūb ǂnubidi diba mî, tsî go ge ǁkhāti ǃnarihe hâ-i kas, ǃhora-i kas, ǀaesen hâ-i kas hoasa ra ūhā. Tita ǁnâi ūǃoa ta nî ǁîna sago ǃomǁaeba xu? tib ra ǃKhūba mî.

¹⁴Ab ǀâxarexūhe ǁnāb, ǀhôagaob, aore ǁkhaoba gūn âb ǃnâ ūhâ tsî ǃKhūba ǁîba ra mîmâiba, xawe ǁgaiǁgaisa-e ǃKhūba ra ǁguibaba. Tita ge kai Gao-aota, tib ra ǃKhūb ǂnubidi diba mî, tsî ǀons âtas ge a ǃaoǃaosa ǁaedi ǃnâ.