Read Khoekhoegowab Maleaxib 2 Bible Online

Maleaxib 2 - Khoekhoegowab bible

Maleaxib 2

¹Tsî sago pristergo, nē ǂhanub ge a sago di.

²Sago ga ǁîba ǂgao tama io, tsî sago ga ǂgaob ǃnâ ǂâibasen tama io, ti ǀonsa go nî ǃgôasa, tib ra ǃKhūb ǂnubidi diba mî, o ta ge tita ǀâxareba sago ǃnâ nîra sî, o ta ge tita sago di ǀkhaega nîra ǀâxarexū. Ā, tita ge ǁîga ǀnai ǀâxarexū hâ, sago ǁî ǃkhaisa ǂgaob ǃnâ ǂâibasen tama amaga.

³Mû, tita ge sago suriba ǁkhōse nî ǂgōǀau tsî tita ge ǂhauba sago aidi ǃnâ nîra ǂkhau ǂhaub sago kaitsēdi diba, sago nî ǁîb ǀkha ūbēhes kōse.

⁴ǃNubai go ge sago nî ǂan, tita ge nē mîmāsa sago ǃoa sî ǃkhaisa, ti ǃgaeǀhaos Levib ǀkha nî hâga, tib ra ǃKhūb ǂnubidi diba mî.

⁵Ti ǃgaeǀhaos ǁîb ǀkha ta ge ūhâ is ge ûi ge i tsî ǂkhî ge i, ǁîna ta ge ǁîba ge mā ǃaoǃgâb nîse, ob ge ǁîba tita ge ǃao, tsîb ge ti ǀons ǃaroma ge ǃhuri.

⁶ǂHanub amab dib ge ǁîb di ams ǃnâ ge hâ i, tsî ǂkhaba-i xare-i ge ǁîb amǁgaukha ai hōhe tama ge hâ i; ǁîb ge tita ǀkha ǂkhîb ǃnâ tsî ǂhauǃnâsib ǃnâ ge ǃgû tsîb ge ǂguina ǂhanuoǃnâsiba xu ge ǃhobasen kai.

⁷Amǁgaugu pristeri digu ge ǂansa nîra sâu, tsîn ge ams âba xu ǁkhāǁkhāsa nîra ôa, ǁîb a sîsabe ǂnubidi di ǃKhūb diba xui-ao.

⁸Xawe sago ge daoba xu ge ǂgō, sago ge ǂguina ge ǃnôa kai ǁkhāǁkhās ǀkha, sago ge ǃgaeǀhaos Levib disa ge ǁgaoǁgao, tib ra ǃKhūb ǂnubidi diba mî.

⁹ǁNā-amaga ta ge tita sago ona ge ǃharaxūsa kai tsî anu tama xū kai ǁaes hoas aiǃâ, ti daoga go sâu tama tsî ǀgoraǃgâs ǃnâ aisa ra ǃkhōǃoa amaga.

¹⁰Hoatsama da kha ǁnâi ǀgui ǁgûb ǀguiba ūhâ tama hâ? ǀGui Elob ǀgui tamaba kha, ǁnâi ǁîb xa da kuruhe hâba? Tsî tarexasa kha ǁnâi îǂhôaoǃnâse da ra sîsenūgusa, sada îgu di ǃgaeǀhaosa ra ǀuriǀurise?

¹¹Judab ra îǂhôaoǃnâse dī tsî ǁgaidī-i ge Israeli ǃnâ ra dīhe tsî Jerusalems ǃnâ: Judab ra ǃanusib ǃKhūb dib, ǀnammi aba, ǃanuoǃnâ kai xui-ao, tsîb ge ǀgôas ǃhao elob disa ge ǃgame.

¹²Ab ǃKhūba aob ǁnāsa ga dība ǃhomǂui Jakob omde xu, ǁnāb ǂgai rab tsî ǁnāb ǃeream rab, tsî ǃKhūb ǂnubidi diba ǁguibade ra hā-ūbaba.

¹³Tsî nē ǀgamǁî ǃkhaisa du ǁkhāti ra dī, altars ǃKhūb disa du ǁgamrogu tsî āb tsî ǀhâimâinǀoms tsîn ǀkha ra ǃgū-ai ǃkhaisa, ǁîb ǃaruǀî sadu di ǂûǁguibasa ǃgapaǀî tsî ǃgâiǂâis ǀkha sadu ǃomǁaeba xu ǃkhōǃoa tama amaga.

¹⁴O du ge sado: Tarexasa? ti ra mî. Nē ǃkhais xas ge: ǃKhūb ge ǀhûǀguitimî-ao ge i sats tsî sa ǂkhamsis di taras, ǁîsats ge ǂgomǂgomsa tamase sîsenūs tsîro ǁaegu, horesas a tsî sa ǃgaeǀhaos di taras a xawe.

¹⁵ǁÎba ǀgui khoeb ǀguiba dī tamab hâ, gagas ǃgauba bi hâ xawe? Tsî tare-eb ǁnā ǀguiba ge tura? ǁÎb ge surib Elob diba ge ôa. ǁNā-amaga ǂan gagas âts ǃaroma îb ǀguib xareba taras ǂkhamsis âb disa tā ǂgomǂgomsa tamase sîsenū.

¹⁶ǃKhūb Israeli Elob ra mî: ǃGamekhôasab ǁîba ǁkhan hâ ǃkhaisa, tsî sarab âbab ra tsūdīb ǀkha ǃgū-ai ǃkhaisa, tib ra ǃKhūb ǂnubidi diba mî. ǁNā-amaga ǂan gagas âtsa, îts tā ǂgomǂgomsa tama i.

¹⁷Sadu ge ǃKhūba mîdi âdu ǀkha ra ǀhupuǀhupu. Xawe du ge: Mâ xū-i ǀkhasa kha ǁîba da ra ǀhupuǀhupusa? ti ra mî. Nēs ǀkhas ge sadu: ǂKhabadī ka-i hoa-i ge ǃKhūb mûǁae a ǃgâi, tsî ǁîb ge nēti īn xa ǃgâibahe tsî: Mapab kha ǁnâi hâ Elob ǀgoraǃgâs diba? ti ra mîs ǀkha.