Read Khoekhoegowab Maleaxib 3 Bible Online

Maleaxib 3 - Khoekhoegowab bible

Maleaxib 3

¹Mû, tita ge ti ǀhomǃgāba ra sî, ti ais aiǃâb nî daoba ǁāǁāba tega. Tsî ǃhaeseb ge ǁîb tempeli tawa nîra hā, ǁnā ǃKhūb sado ra ôab, ǁnā ǀHomǃgāb ǃgaeǀhaos dib, sado ra ǁkhoreba, mû ǁîb ra hā, tib ra ǃKhūba mî.

²Xawe tari-e tsēs ǁîb hās disa nî mâǃkharu ǁkhā? Tsî tari-e nî mâ ǁkhā ǁîb ga ǂhai ǃnubai? ǁÎb nî ǀaes ǃhuniǀuriǂnau-aob dis khami ī xui-ao, tsî sēb ǁā-aogu dib khami.

³Tsîb ge ǁîba ǂnû tsî nîra ǀkhaiǀkhaiǃnâ tsî ǀhaiǀuriba nîra ǃanuǃanu, tsî ǁîb ge ǀgôagu Levib diga nîra ǃanuǃanu, tsîb ǁîb ge ǁîga nîra ǀkhaiǀkhaiǃnâǃganu ǃhuniǀurib khami; ǃnubai gu ge ǁîga ǃKhūba ǁguibade nîra ūhāba ǂhanu-aisib ǃnâ.

⁴Os ge ǁguibas Judab tsî Jerusalems tsîra disa ǃKhūba ǃgâise nîra ība, hugakam tsēdi ǃnâs khami tsî aibekam kurigu ǃnâs khami.

⁵O ta ge tita sado nîra ǀgū, ǀgoraǃgâ du ta nîse. O ta ge tita ǃhae ǃkhō-amaose nîra ī ǃgai-aogu ǃoagu tsî ǃgamekhôa-aogu ǃoagu, tsî ǁnāgu ǂkhabase ra nūgu ǃoagu, tsî ǁnāgu tsēs ǃgaesab di amǃnâsa ǀgaib ǀkha ra ǃkhōdawa gu ǃoagu, ǁnān, ǃoataras tsî ǃoaǀgôan tsî ǃhaokhoen di ǂhanuba ra dawaǃkhunin tsî tita ǃao tamana, tib ra ǃKhūb ǂnubidi diba mî.

⁶Tita ǃKhūta ǀkharaǀkharasen tama xui-ao, ǁnā-amagas ge sadu Jakob ôadu hapuhe tamasa.

⁷Abogu di tsēde xus ge sadu ti ǂnûiǂgāde xu ǂgō tsî ǁîde dī tamasa. ǃHobasen tita ǃoa, o ta ge tita sadu ǃoa nî ǃhobasen, tib ra ǃKhūb ǂnubidi diba mî. Xawe du ge sado: Mati da nî ǃhobasen? ti ra mî.

⁸Sats khoetsa Eloba xū-e ǀâǀhana ǁkhāts a? Xawe du ge sado tita ra ǀâǀhana tsî: Mâ xū-i ǃnâ da satsa ra ǀâǀhana? ti ra mî. Disiǁî ǃâs ǃnâ tsî ǁguibas ǃnâ.

⁹ǀÂxare-i ǀkha du ge ǀâxarexūhe hâ, tita du ra ǀâǀhana amaga, ā, sas ǁaes hoase.

¹⁰Disiǁîn hoana ǁui-ommi ǃnâ ūǂgâ, în ǂûna hâ ti ommi ǃnâ, î du ǁî ǃkhais ǀkha tita ǃâitsâ, tib ra ǃKhūb ǂnubidi diba mî, ise ta mûǂuidaodi ǀhommi dide ǁkhowa-am tsî ǃnāǂamsa ǀkhaeba ǂnâǁnâba du tide ǃkhaisa.

¹¹Tsî tita ge hapu rana nîra ǁkhaebēba du, în ǃhūb di ǂûna sado tā hîkākā-ai, tsî ǂauxûiǂûhais ǃhanab ǃnâ hâs ge ǂûtanîoǃnâ tide, tib ra ǃKhūb ǂnubidi diba mî.

¹²Tsî ǁaedi hoadi ge sado ǃgâiǃgâse nîra ǃkhōǀkhā: Sadu ǃgâi ǃhūse nîra ī xui-ao, tib ra ǃKhūb ǂnubidi diba mî.

¹³Sadu mîdi ge tita ǀgaidā hâ, tib ra ǃKhūba mî. Xawe sadu ge: Tare-e da kha ǁnâi sa ǃoagu ǃhoa hâ? ti ra mî.

¹⁴Sadu ge: ǁAu i ge a, Elobats ra sats khoetsa ǃoaba ǃkhaisa, ti ra mî. Tsî tare-en nî harebe, ǃûis âba da ra ǃûi ǃkhaisa? Tsî ǂnū saran ǃnâ da ra ǃgû ǃkhaisa ǃKhūb ǂnubidi dib di ais aiǃâ?

¹⁵O da ge nēsi ǃguriǂgaoxana ǃgâiǃgâse ra mû; ǁkhātin ra ǃgâiǃgâ ǁnān, eloxoresasiba ra dīna, ǁkhātin ra Eloba ǃâitsâ xawen ra ûi.

¹⁶ǃNubain ra ǁnān, ǃKhūba ra ǃaona ǃhoa, mâ-i hoa-e ǁî-i ǀgūkhoe-e ǃoa, xaweb ra ǃKhūba ǃgaoǃgâ tsî ǁî xūna ǁnâu. Tsî ǂâiǂâisenǂkhani-i ge ais âb aiǃâ ǁnān, ǃKhūba ra ǃaon tsî ǁîb di ǀons xa ra ǂâina xoabahe hâ.

¹⁷On ge ǁîna ǁnā tsēs tita nîra dīs ai ti ǁuise nîra ī, tib ra ǃKhūb ǂnubidi diba mî, tsî tita ge ǁîna nîra sâu, khoeb ra ǁîb ôab, ǁîba ra ǃoababa sâu khami.

¹⁸ǃNubai du ge ǁkhawa ǀgorasa nîra mû ǂhanu-aib tsî eloxoresab tsîkha ǁaegu, ǁnāb Eloba ra ǃoabab tsî ǁnāb, ǁîba ǃoaba tamab tsîkha ǁaegu.