Read Khoekhoegowab Mateub 1 Bible Online

Mateub 1 - Khoekhoegowab bible

Mateub 1

¹Nēs ge ǂkhanis Jesub Xristub ǃhaos disa, Davib ôab, Abrahammi ôab.

²Abrahammi ge Isaka ge hō, tsî Isaki ge Jakoba ge hō, tsî Jakob ge Judab tsî ǁîb ǃgâsagu tsîga ge hō.

³Tsî Judab ge Peresi tsî Serab tsîkha Tamars tawa ge hō, tsî Peresi ge Hesronna ge hō, tsî Hesronni ge Aramma ge hō,

⁴tsî Arammi ge Aminadaba ge hō, tsî Aminadab ge Nasonna ge hō, tsî Nasonni ge Salmonna ge hō,

⁵tsî Salmonni ge Boaba Raxas ǃnâ ge hō, tsî Boab ge Obeda Ruts ǃnâ ge hō, tsî Obedi ge Isaiba ge hō,

⁶tsî Isaib ge gao-aob Daviba ge hō. Tsî gao-aob Davib ge Salomonna Uriab di taras ǃnâ ge hō,

⁷tsî Salomonni ge Rehabeamma ge hō, tsî Rehabeammi ge Abiaba ge hō, tsî Abiab ge Asaba ge hō,

⁸tsî Asab ge Josafata ge hō, tsî Josafati ge Joramma ge hō, tsî Jorammi ge Usiaba ge hō.

⁹Tsî Usiab ge Jotamma ge hō, tsî Jotammi ge Axasa ge hō, tsî Axasi ge Hiskiaba ge hō,

¹⁰tsî Hiskiab ge Manaseba ge hō, tsî Manaseb ge Amonna ge hō, tsî Amonni ge Josiaba ge hō,

¹¹tsî Josiab ge Jexoniab tsî ǁîb di ǃgâsagu tsîga ge hō, Babilons ǃoa ǃgû-ūhes ǁaeb ai.

¹²Tsî Babilons ǃoa ǃgû-ūhes khaoǃgâb ge Jexoniaba Salatiela ge hō, tsî Salatieli ge Serubabela ge hō,

¹³tsî Serubabeli ge Abiuba ge hō, tsî Abiub ge Eljakimma ge hō, tsî Eljakimmi ge Asora ge hō,

¹⁴tsî Asori ge Sadoka ge hō, tsî Sadoki ge Aximma ge hō, tsî Aximmi ge Eliuba ge hō,

¹⁵tsî Eliub ge Eleasara ge hō, tsî Eleasari ge Matanna ge hō, tsî Matanni ge Jakoba ge hō,

¹⁶tsî Jakob ge Joseb, Marias aoba ge hō, ǁîsa xub ge Jesub, Xristub ti ra ǂgaiheba ǃnaesa.

¹⁷O di ge ǃhaoǃnādi hoade Abrahamma xu Davib kōse hakaǀa ǃhaoǃnāde, tsî Daviba xu Babilons ǃoa ǃgû-ūhes kōse hakaǀa ǃhaoǃnāde, tsî Babilons ǃoa ǃgû-ūhesa xu Xristub kōse hakaǀa ǃhaoǃnāde.

¹⁸Tsîs ge ǃnaes Jesub Xristub disa nēti ge ī: Marias, ǁîb îs ge Joseb ǀkha ǃgamegu nîse mîmâi hâ i, tsî ǁîra ganupe ǀhao tama hîas ge ǁîsa ǃAnu Gagaba xu ge ǀgamǀkhā.

¹⁹Ob ge Joseb, aob âsa, ǂhauǃnâ ge i, tsî ǂhaisase taotao si ǂgao tama ge hâ i, tsîb ge ǂganǃgâsase gere ǁnāxū si ǂgao.

²⁰Tsî nēnab ǂâis ǃnâ ūhâ hîa, mû, ob ge ǀhomǃgāb ǃKhūb diba ǁhapos ǃnâ ǂhai bi tsî ge mî: Josetse, Davib ôatse, Marias taras âtsa ūbasensa tā ǃao, ǁîs ǃnâ ǃkhōǃoahe hâ-i ge ǃAnu Gagaba xu hâ-e amaga.

²¹Os ge ǀgôaroba nî ǁora, tsîts ge ǁîb ǀonsa Jesub ti nî ǂgai, ǁaes âbab ǁoren âna xu nî ore amaga.

²²Tsî nēn hoan ge ge ǃnae, kēbo-aob ge ǃKhūb xa mîn nî ǀoaǀoahese, mî raǃâ:

²³“Mû, ǂkhamkhoes ge nîra ǀgamǀkhā, tsî ǀgôaroba nîra ǁora, tsî Emmanuel, tis ge ǀons âba nîra ǂgaihe. ǁNās ge: Elob sada ǀkha hâ” ti ra ǂâibasen.

²⁴Tsî Joseb ge ǂomsa xu ǂkhai, ob ge ǀhomǃgāb ǃKhūb dib ge mîmā bi khami ge dī, tsî tarasa ge ūbasen.

²⁵Tsî ǂanguǀkhā si tama ge i, ǂguro ǀgôab âs ge ǃnaes kōse; tsî ǀons âba Jesub, ti ge ǂgai.