Read Khoekhoegowab Mateub 10 Bible Online

Mateub 10 - Khoekhoegowab bible

Mateub 10

¹ǁÎb di disiǀgamǀa ǁkhāǁkhāsabega ǂgaiǀhao tsîb ge ǀgaiba ge mā gu ǃanuoǃnâ gagagu ǂama, ǁîga gu nî ǃhaeǂuise, tsî hoa ǀaesenain tsî tsû-ain tsîna gu nî ǂuruǂuruse.

²Tsî ǀondi disiǀgamǀa apostelgu didi ge nēde: ǂGurob ge Simonni, Petrub ti ra ǂgaiheb tsî Andreab ǁîb ǃgâsab tsîkha; tsî Jakobub, Sebedeub ôab tsî Johaneb ǁîb ǃgâsab tsîkha;

³Filipub, Bartolomeub, Tomab, Mateub, mariǃkhōǃoa-aob; Jakobub, Alfeub ôab; Lebeub, Tadeub ti ra ǂgaiheb;

⁴Simonni Kanaǁîb tsî Judab Iskarioǁîb, ǀapexū bi nîrab tsîga.

⁵Nē disiǀgamǀagab ge Jesuba ge sîǂui, mîmā gu tsî ge mî: ǀŪben daob ai tā ǃgû, î Samariaǁîn ǃādi ǃnâ tā ǂgâ.

⁶Î go aibe ǃgû ǁhapu hâ gūn Israeli ommi din ǃoa.

⁷ǃGû ǁnâi, î aoǁnâ, î go mî: Gaosib ǀhommi dib ge ǀgūse hā hâ.

⁸ǀAesen hâna ǂgauǂgau, ǃomamaxana ǃanuǃanu, ǁō hâna ǂkhaiǂkhai, ǁgâuaga ǃhaeǂui. ǁAuse go ge hō, xuige ǁause mā.

⁹ǃHuniǀurimarib karao, ǀhaiǀurimarib karao, ǂaimarib karao sago ǃgaesenni ǃnâ tā ūbasen,

¹⁰ǁkhāti ǁgarus daob dis karao, ǀgam anaxūra karao, ǀkhapura karao, hai-i karao go ūbasen tide, sîsenaob ǂûmāheb nîsa anu hâ xuige.

¹¹Tsî mâ kaiǃās tsî ǃhais ǂgâ go kas hoasa aibe ôaǃnâ, tari-i ǁîs ǃnâ a anu ǃkhaisa, î ǁnāpa hâ, ǂoa go nîs kōse.

¹²Tsî om-i ǃnâ go ga ǂgâo, ǁî-i dina tawede.

¹³Tsî ǁnā om-i din ga anu hâ, ob nî ǂkhîb âgo ǁîn ai hā, xawe anu taman ga io, ob nî ǂkhîb âgo sago ǃoa oa.

¹⁴Tsî khoe-i ga sago ǃkhōǃoa tsî sago mîde ǁnâu tama io, ǁnā om-i tsî ǃā-e xu ǂoa, î tsarab sago ǀkhapudi diba ǃhaebeǁnâ.

¹⁵Amase ta ra mîba go, Sodoms tsî Gomoras tsîra di ǃhūb ge ǀgoraǃgâtsēs ai tani ǁkhā ra ase nî hō, ǁnā ǃās xa.

¹⁶Kō, tita ge gūn khami ǂhiran ǁaegu ra sî go; ǀaon khami ǁnâi gā-ai, î ǂnabudi khami gāxaoǃnâse ī.

¹⁷Î go khoena ǂanbasen re, ǁîn nî sago ǁîn di ǀapeǀhaodi ǃnâ māǁnâ, tsî nî ǁîn di sinagogegu ǃnâ ǂnau go xuige.

¹⁸Tsî go nî ǁkhāti danakhoegu tsî gao-aogu ǃoa ǃgû-ūhe tita ǃaroma, ǁîn tsî ǀūben tsîn di mîdansa ǃoa.

¹⁹Tsîn ga māǁnâ go, o tā ǂhansen re, mati tsî mâ xū-e go nî ǃhoa ǃkhaisa, ǃhoa go nî xūna go ǁnā ǁaeb ai nîra māhe xuige.

²⁰Sa tama go ge, ǁnā ǃhoa ra go, xawe Gagab sago Îb dib ge ǁnāb, sago ǃnâ ra ǃhoaba.

²¹Tsî ǃgâsab nî ǃgâsaba māǁnâ ǁōb ǃnâ, tsî ǁgûba ǀgôab âba, tsî ǀgôan nî ǁgûra ǃoagu khâima tsî ǁîra nî ǃgam.

²²Tsî go ge hoan xa nî ǁkhanhe ti ǀons ǃaroma, xawe ǀunis kōse ga mâhō-i, ǁî-i ge nî ǃgâiǃō.

²³Tsî khoen ga sago nē ǃās ǃnâ ǃgôaǃgon, o gu nî naus ǃoa ǃhū. Amase ta ra mîba go, ǃādi Israelǁîn dide go ǃgûǃganu tama hîab nî Khoen Ôaba hā xui-ao.

²⁴ǁKhāǁkhāsabeb ge ǁkhāǁkhā-aob ǂamai hâ tama hâ, tsî ǃgāb on ge ǀhonkhoeb ǂamai hâ tama hâ.

²⁵Ab ǁkhāǁkhāsabeba ǂkhî ǁkhāǁkhā-aob khamib ga io; tsî ǃgāba ab ǂkhî, ǀhonkhoeb khamib ga io. Oms ǀhonkhoeban ga Beelsebuli ti ǂgaio, matikōsen nî ǁnās ǃgâ-ai oms dina ǁnāti ǂgai.

²⁶ǁÎna ǁnâi tā ǃao. Xū-i ǂganǃgâsa-i, hîa ǂhaiǂhaihe tide-i, tsî ǂganǂamsase hâ-i, hîa ǂanhe tide-i hâ tama xuige.

²⁷ǃKhaenab ǃnâ ta ra mîba gona, ǃnâb ǃnâ ǃhoa re, tsî ǂgaes ǃnâ go ra ǁnâuna oms ǂamaib ai aoǁnâ re.

²⁸Î tā sorosa ǃgam ǁkhān tsî ǀomsa a ǃgam ǁoana ǃao, xawe ǀoms tsî soros tsîra ǀamoǀaeb ǃnâ hîǀhuru ǁkhāba ǃao.

²⁹Khoe-e kha ǀgam guninira ǀgui mariros ama ǁamaxū tama i hâ? Tsî ǀgui-i xare-i ân ge sadu di Îb ose ǃhūb ai ǁnā tama hâ.

³⁰Tsîn ge ǁkhāti danaǀûn sago din hoana ǃgôahe hâ.

³¹ǁNā-amaga tā ǃao; ǂgui guninide go kom sago ra īǂamo.

³²ǁNā-amaga mâ-i hoa-i, khoen aiǃâ ga tita ǂan-i, ǁî-e ta ge tita ona ti Îb ǀhommi dib aiǃâ nîra ǂan.

³³Tsî mâ-i hoa-i, khoen aiǃâ ga tita ǀū-i, ǁî-e ta ge tita ona ti Îb ǀhommi dib aiǃâ nîra ǀū.

³⁴Tā ǂâi, ǂkhîba ta nî ǃhūbaib ai hā-ūse ta ge hā ǃkhaisa; ǂkhîba ta nî hā-ūse ta ge hā tama tsî gôaba ta nî ūhāse ta ge ge hā.

³⁵Hā ta ge, khoeba ta nî ǀgorase ǁgûba xu, tsî ǀgôasa ǁgûsa xu, tsî ǀuiǀgôasa ǁîs ǀuiǁgûsa xu.

³⁶Tsî khoe-i ommi din ge ǁî-i khākhoese nî i.

³⁷ǁÎ-i ǁgûb tsî ǁgûs tsîra ga ti ǂamai ǀnam hâ-i ge tita anu tama-e; tsî ǀgôab tsî ǀgôas tsîra ga ti ǂamai ǀnam hâ-i ge tita anu tama-e.

³⁸Tsî ǁî-i ǃgâuhaiba ūkhâi tsî tita sao tama-i ge tita anu tama-e.

³⁹ǁÎ-i ûiba ga hō-i ge ǁîba nî ǂoaǃnâ-e, tsî ǁî-i ûiba ga tita ǃaroma ǂoaǃnâ-i ge ǁîba nîra hō.

⁴⁰Sago ga ǃkhōǃoa-i ge tita ra ǃkhōǃoa-e, tsî tita ga ǃkhōǃoa-i ge tita ge sîba ra ǃkhōǃoa-e.

⁴¹Kēbo-aoba ga kēbo-aob ǀons ǃnâ ǃkhōǃoa-i ge kēbo-aob amǃnâsa nî hō-e, tsî ǂhanu-aiba ga ǂhanu-aib ǀons ǃnâ ǃkhōǃoa-i ge ǂhanu-aib amǃnâsa nî hō-e.

⁴²Tsî mâ-i hoa-i nē ǂkharin di ǀgui-e ga khanukhanu-i ǃkhai ǁgam-i hâǃnâ ā-ūxūs ǀguis ǀkha ǁkhāǁkhāsabe-i di ǀons ǃnâ, amase ta ra mîba go, ǁî-i amǃnâsa-i tôasi tide ǃkhaisa.