Read Khoekhoegowab Mateub 11 Bible Online

Mateub 11 - Khoekhoegowab bible

Mateub 11

¹Tsî i ge ge ī, Jesub ge ǁîb di disiǀgamǀa ǁkhāǁkhāsabega mîmā toao, ob ge ǁnāpa xu aiǃâb ǃoa ge ǃgû, ǁîn di ǃādi ǃnâb ni ǁkhāǁkhā tsî aoǁnâse.

²Tsî Johaneb ge ǃkhō-oms ǃnâ Xristub dīga ǁnâuo, ob ge ǁkhāǁkhāsabegu âba sî

³tsî ǁîb ǃoa ge mî: Satsa, hā nîtsa koma? ǀKharaba da nî ǃâu?

⁴Ob ge Jesuba ǃeream tsî ge mîǀî gu: ǃGû, î go Johaneba sī ǂhôa, ǁnâu tsî go ra mûna:

⁵ǂGī hân ra mûsa, ǃhoran ra ǃgûsa, ǃomamaxan ra ǃanuǃanuhesa, ǂganaǂgae hân ra ǁnâusa, ǁō hân ra ǂkhaiǂkhaihesa, tsî ǀgâsan ǃgâiǂhôasa ra aoǁnâbahesa.

⁶Tsî ǃgâiǃō-i ge hâ tita ǃnâ ǁgonǁgonǂgaosen tide-e.

⁷Tsî nēgu ge ǃgû, ob ge Jesuba ǂnubidi ǃoa Johaneb xa ge mîtsoatsoa: Tare-e nî mûse du kha ǃgaroǃhūb ǃoa go ǂoa? ǂĀ-i, ǂoab xa ra ǃgomhe-e?

⁸Tare-e du nî mûse du kha go ǂoa? Khoe-i, tsamra saran ǀkha anasen hâ-e? Kō, tsamra sarana ana hân ge gao-aogu omgu ǃnâ ra hâ.

⁹Tare-e du nî mûse du kha go ǂoa? Kēbo-aoba? Aio, tita ra mîba du, kēbo-aoba xawe ǃnāǂam hâba.

¹⁰Nēb ge a ǁnāb ǁîb xa xoahe hâba: Mû, tita ge ti ǀhomǃgāba ra sî sa aiǃâ, daobab nî sa aiǃâ dī-unuba tsise.

¹¹Amase ta ra mîba du, taradi xa ge ǁorahen xa i ge Johaneb ǁĀǁnâ-aob ǃgâ-ai kai-e hâ tama hâ, xawe gaosib ǀhommi dib ǃnâ hoan xa ǂkhari-i ge ǁîb ǃgâ-ai a kai-e.

¹²Tsî Johaneb ǁĀǁnâ-aob tsēde xu nēsis kōseb ge gaosib ǀhommi diba ra ǁgaribasenhe, tsî ǁgari-aon ge ǁîba ra tsuwubasen.

¹³Kēbo-aogu hoagu tsî ǂhanub on ge Johaneb kōse gere kēbo.

¹⁴Tsî ǃkhōǃoa ǂgao du kao, Eliab nē hā nîrab ge ǁîba.

¹⁵ǂGaera ūhâ-e ǁnâu i nîse ī a-i ǁnâu.

¹⁶Tsî tare-i ǀkha ta kha nē ǃhaosa nî ǂkhō? ǀGôaron khamin kom io, ǁamaxūǃkhais tawa ǂnû tsî horesan âna ǂgaiǀî

¹⁷tsî ra mîna: Sado da go ǂnuniba, xawe du ǂnā tama, ǃoaǃoaxase ta go ǁnae, xawe du ā tama.

¹⁸Johaneb ge ge hā, ǂû tama tsî ā tamase, on ge ra mî: ǁGâuabab kom ūhâo.

¹⁹Khoen Ôab ge ge hā, ǂû tsî ra āse, on ge ra mî: Mû, ō tsî ǂauxûiba ākhanukhanusen-aob tsî mariǃkhōǃoa-aon tsî ǁore-aon tsîn di ǀhōsab kom ǁîbao; xaweb ge gā-aisiba ǁîb di ôan xa ǂhanu-ai kaihe hâ.

²⁰ǃNubaib ge ǃādi, ǁîb buruxa ǀgaigu ǃādi hoadi xa ǃnuriǃnāde ge ǃnaeǃnâdi, xawe ǃhobasen tamade ge ǂgōǀautsoatsoa:

²¹Tsūba si, Xorasinse! Tsūba si, Betsaidase! Tires tsî Sidons tsîra ǃnâ gu ga saro ǃnâ ge ǃnae ǀgaiga ī hâ io, o ra ga huga ǁhōb tsî tsaob tsîkha ǃnâ ǃhobasen hâ i.

²²O ta ra mîba du, Tires tsî Sidons tsîra ge saro xa nî tanisase ībahe ǃkhaisa, ǀgoraǃgâtsēs ai.

²³Tsî sas Kapernaums, ǀhommi kōse ǀgapiǀgapihe hâs, Hadeb kōses ge nîra ǂhāǁnâhe. Sodoms ǃnâ gu ga sas ǃnâ ge ǃnae ǀgaiga ī hâ io, os ga nētsēs kōse hâ hâ i.

²⁴O ta ra mîba du, Sodomǁîn di ǃhūb nî sas xa tanisase ībahe ǃkhaisa, ǀgoraǃgâtsēs ai.

²⁵ǁNā ǁaeb aib ge Jesuba ǃeream tsî ge mî: Gangan tsi ta ra, Abotse, ǀhommi tsî ǃhūbaib tsîkha di ǃKhūtse, nēnats ge gā-ain tsî ǁnâuǃāxana ǂganǃgâsa kaiba, tsîts ge ǁîna ǀgôarona ǂhaiǂhaiba ǃkhaisa.

²⁶A, Abotse, ǁnātis kom sa ǃgâiǂâisa ge īo, sa aiǃâ.

²⁷Hoan ge ti Îb xa tita ge māhe; khoe-i xare-i ge ǀgôaba ǂan tama, ǁGûb ǀguib; tsî khoe-i xare-i ge ǁGûba ǂan tama, ǀGôab ǀguib; tsî ǀGôab ǂhaiǂhaiba ǂgao hâ-i ǀgui-i.

²⁸Tita ǃoa hā re ǀhupu hâdu tsî ǃnaohe hâdu hoado, o ta ge tita nî khoakhoa du.

²⁹Sadu ai ūkhâi ti ǃnaoba, î tita xu ǁkhāǁkhāsen tsamtsiǃnâ tsî ta ǂgaob ǃnâ a ǃgamǃgamsensa ǃkhaisa, o du ge sadu ǀomde khoakhoasa nî hōba.

³⁰Ti ǃnaob a ǃgâi, tsî ti ǃgommi a supu xuige.