Read Khoekhoegowab Mateub 12 Bible Online

Mateub 12 - Khoekhoegowab bible

Mateub 12

¹ǁNā ǁaeb aib ge Jesuba sâtsēs ai ǃhoroǃhanaga ge ǃgûǃganu; o gu ge ǁkhāǁkhāsabegu âba ǃâ tsî ǃhorona ǂgaeǂuitsoatsoa tsî ge ǂû.

²Tsî Farisegu ge mû, o gu ge ǁîb ǃoa ge mî: Mû sa ǁkhāǁkhāsabegu ge ra dī, sâtsēs ai mā-amhe tama hâ dī-e.

³Ob ge ǁîgu ǃoa ge mî: Khomai tama go kha hâ, Davib ge dīsa, ǁîb ǂûb tsî ǁîb ǀkha ge hâ igu ge ǃâo,

⁴matib ge Elob ommi ǃnâ ǂgâ tsî ǁguibaperega ǂû ǃkhaisa, ǁîb tsî ǁîb ǀkha ge hâ igu, ǂûsa ge mā-amhe tama hâ iga, tsî pristergu ǀguigu ǂûsa mā-amhe hâ perega?

⁵Tsî ǁkhāti ǂhanub ǃnâ kha khomai tama go hâ, pristergu ge tempeli ǃnâ sâtsēsa khôa, xawe gu ge ǀhapio ǀkhaisa?

⁶O ta ra mîba go, tempeli ǃgâ-ai kaib nē hâ ǃkhaisa.

⁷Tsî ǂan go ga io, tare-es ra ǂâibasen ǃkhaisa: “ǀKhomxaǂgaosiba ta ra ǂgao, tsî ǁguibas ǀguisa tama” ti mîsa, o go ga nē ǀhapioga ǀgoraǃgâ tama i hâ.

⁸Khoen Ôab ge a sâtsēs on di ǃKhū xui-ao.

⁹Tsî ǁnāpa xu aiǃâb ǃoa ǃgû tsîb ge ǁîgu sinagogeb ǃnâ ge sī.

¹⁰Tsî mû, ǁnāpab ge ǂnâsa ǃom-e ūhâ khoeba ge hâ i. O gu ge ǁîba dî tsî ge mî: Sâtsēs ai ǂgauǂgausa mā-amhes hâ? ǀHapiǀhapi bi gu nîse.

¹¹Ob ge ǁîgu ǃoa ge mî: Mâ khoeba kha hâ sadu ǃnâ ǀgui gū-e ūhâb, tsî i ga ǁî-e sâtsēs ai tsau-i ǃnâ ǁnāo, ǁî-e ǃkhō tsî ūǂui tideba?

¹²Matikōse i ǁnâi khoe-e gū-e ra īǂam? ǁNā-amagas ge sâtsēs ai ǃgâidīsa mā-amhe hâ.

¹³ǃNubaib ge khoeb ǃoa ge mî: ǀHōǂui ǃommi âtsa. Ob ge ge ǀhōǂui bi, tsîb ge naub khami ge ǂgau.

¹⁴O gu ge Farisega ǂoa, tsî ǀapeǀhaosa ge dī, mati gu nî hîkākā bi ǃkhaisa.

¹⁵Xaweb ge Jesuba ǂan, tsî ǁnāpa xu ge ǂgō; tsî di ge ǂgui ǂnubide ǁîba ge sao, tsîb ge ǁîn hoana gere ǂuruǂuru.

¹⁶Tsîb ge ǁîna ǁkhōse ge ǃkhâi, în tā ǁîba ǂhaiǂhaiǃgâ, ti.

¹⁷Jesajab kēbo-aob xa ge mîhes nî ǀoase, nēti ra mîba:

¹⁸Mû, ti ǃgāb, ti ǃkhōǂuibasensab, ti ǀnamǀnamsab, ti ǀoms ǃgâiǃgâibasensa ta ūǃnâ hâba: Ti Gagaba ta nî ǁîb ai ǁgui, ob ge ǀūbena ǀgoraǃgâsa nî aoǁnâba.

¹⁹ǂNoagu tsîb ge ǃhao tide, tsî ǁîb dommi ge daogu ai ǁnâuhe tide.

²⁰ǂĀb ǃganihe hâbab ge khôa tide, tsî tsurib di khauǃgauro-eb ge ǀari tide, ǀgoraǃgâsab nî dans ǃoa ūsīs kōse.

²¹Tsî ǁîb ǀons ǃnân ge ǀūbena nîra ǃâubasen.

²²ǃNubaib ge ǁgâuab xa hâǃnâheb, ǂgī hâ tsî ǃgomeba ǁîb ǃoa ge ūhāhe; tsîb ge ǁîba ge ǂuruǂuru, ob ge ǂgī hâ tsî ǃgomeba ǃhoa tsî ge mû.

²³O di ge ǂnubidi hoade ǃhuri tsî ge mî: Nēba kha Davib ôa tamaba?

²⁴Tsî Farisegu ge ǁnâu, o gu ge ge mî: Nēb kom ǀnîba xu ǁgâuaga aoǂui tamao, Beelsebuli, ǁgâuagu di ǂamsaba xub kom ra dīo.

²⁵Tsî Jesub ge ǁîgu di ǂâide ǂan, ob ge ǁîgu ǃoa ge mî: Mâ gaosis hoas, ǀgoraǃāsen hâs ge hâhâ tide, tsî mâ ǃā-i tsî om-i ǀgoraǃāsen hâ-i ge hâhâ tide.

²⁶Tsî Satanni ga Satanna aoǂuio, ob kom ǀgoraǃāsen hâo, matis ǁnâi gaosis âba nî hâhâ?

²⁷Tsî tita ga Beelsebula xu ǁgâuaga aoǂuio, tari-e xu gu ǁnâi sadu di ôaga ra aoǂui gu? ǁNā-amaga gu ge nî ǁîga sadu ǂhanuǂhanu-ao.

²⁸Xawe Elob Gagaba xu ta ga tita ǁgâuaga aoǂuio, ob kom gaosib Elob diba sadu ǃoa go hāo.

²⁹Tsî mati i kha khoe-e ǀgaisab oms ǃnâ ǂgâ, tsî ǁîb xapana nî ǃnari, aibe i ga ǀgaisaba ǃgae tama io? ǁNās khaoǃgâ i kom ǁîb omsa nî khôaǂgâo.

³⁰Tita ǀkha hâ tama-i ge ti ǃoagu hâ-e; tsî tita ǀkha ǀhaoǀhao tama-i ge ra ǀgaruǀgaru.

³¹ǁNā-amaga ta ra mîba du: Mâ ǁoreb hoab tsî mâ ǃkhāǃkhās hoasan nî khoena ǀûbahe, xawe ǃkhāǃkhās Gagab ǃoagu hâsan ge khoena ǀûbahe tide.

³²Tsî mâ-i hoa-i Khoen Ôab ǃoagu ga mîsa mî hâ-i, ǁî-i ge nî ǀûbahe; xawe mâ-i hoa-i ǃAnu Gagab ǃoagu ga ǃhoa hâ-i, ǁî-i ge ǀûbahe tide, nē hâ ǁaeb ǃnâs karao, ǃgoaxa ǁaeb ǃnâs karao.

³³Haisa ǃgâiǃgâi, on ge ǁîs di ǂûna nî ǃgâi, haisa gunugunu, on ge ǁîs di ǂûna ǁkhoao, ǂûn âsa xus haisa ra ǂanhe xui-ao.

³⁴Sa ǀaon ôado, mati du kha nî ǃgâina ǃhoa, ǂkhaba du a hîa? ǀOasib ǂgaob diba xus kom amsa ra gowao.

³⁵ǃGâi khoe-i kom ǂgaob di ǃgâi ǁuiba xu ǃgâina ra ūǀkhīo, tsî ǂkhaba khoe-i kom ǂkhaba ǁuiba xu ǂkhabana ra ūǀkhīo.

³⁶O ta ra mîba du: Mâ ǁau mî-i hoa-i, khoen ga ǃhoa hâ-i xan nî ǀgoraǃgâtsēs ai ǃereamsa māsa.

³⁷Sa mîde xuts kom nî ǂhanu-ai kaiheo, tsî sa mîde xuts kom nî ǀâxarexūheo.

³⁸ǁNāǃnubai gu ge ǀnîgu xoaǂansabegu tsî Farisegu diga ǃeream tsî ge mî: ǁKhāǁkhā-aotse, sao-e ge ge satsa xu ra mû ǂgao.

³⁹Ob ge ǃeream tsî ǁîgu ǃoa ge mî: ǃHaos ǂkhabaxas tsî ǃgamekhôaxas ge sao-e ra ôa, xawes ge ǀnî sao-e māhe tide, Jonab kēbo-aob di saos ose.

⁴⁰Jonab ge ǃnona tsēdi tsî ǃnona tsuxugu tsîna kai ǁaub di ǃnāb ǃnâ hâ i khamib Khoen Ôaba ǃnona tsēdi tsî ǃnona tsuxugu tsîna ǃhūb di ǂgaob ǃnâ nî hâ xui-ao.

⁴¹Aogu Nineveǁîn digu ge nē ǃhaos ǀkha ǀgoraǃgâs ǃnâ khâi tsî nî ǁîsa ǀgoraǃgâ; ǁîgu ge Jonab aoǁnâs ai ǃhobasen amaga; tsî mû, Jonaba ǃnā hâb ge nē hâba.

⁴²Gao-aos ǃkhawagas dis ge nē ǃhaos ǀkha ǀgoraǃgâs ǃnâ khâi tsî ǁîsa nî ǀgoraǃgâ; ǃhūbaib ǀamsa xus ge hā, Salomob gā-aisibas nî ǁnâuse amaga; tsî mû, Salomoba ǃnā hâb ge nē hâba.

⁴³ǃAnuoǃnâ gagab ga khoe-e xu ǂoao, ob ge ǃgaro ǃkhaide ra ǃgûǃganu, sâba ra ôase, xawe hō tama.

⁴⁴Ob ge ra mî: A ta ǁkhawa ti oms, ǂoaxu ta ges ǃoa oa. Tsî hāb rao, ob ge ǀkhaiǃnâse tsî ǀnapuǃnâhe tsî anihe hâse ra hō si.

⁴⁵Ob ra ǃgû tsî hû gagagu, ǁîb ǃgâ-ai a ǂkhabaga ǁîs ǃoa ǀkhī-ū, tsî gu ǂgâ, tsî ǁnāpa ra hâ; os ge ǀams ǁnā khoeb disa ǂguros ǃgâ-ai ra tsū. ǁNās ǁkhās xases ge ǁkhāti nē ǂkhaba ǃhaos ǀkha nî ī.

⁴⁶Tsî ganupeb ra ǂnubidi ǃoa ǃhoa hîa, mû, on ge ǁîb îs tsî ǃgâsagu tsîna ǃauga mâ, tsî ǃhoa-ū bin nîsa ge ôa-am.

⁴⁷O i ge khoe-e ǁîb ǃoa ge mî: Mû, sa îs tsî sa ǃgâsagu tsîn ge ǃauga mâ, tsî ǃhoa-ū tsin nîse ra ôa tsi.

⁴⁸Ob ge ǃeream tsî mîba bi ra-i ǃoa ge mî: Mâsa ti î, tsî mâna ti ǃgâsa?

⁴⁹Tsî ǃommi âba ǁkhāǁkhāsabegu ǂama ǀhōǂui, tsîb ge ge mî: Mû ti îs tsî ti ǃgâsan tsîna!

⁵⁰Ti Îb ǀhommi ǃnâ hâb di ǂâisa ga dī-i hoa-i, ǁî-i kom ti ǃgâsab tsî ǃgâsas tsî ti îs ase io.