Read Khoekhoegowab Mateub 13 Bible Online

Mateub 13 - Khoekhoegowab bible

Mateub 13

¹Tsîb ge Jesuba ǁnā tsēs ai omsa xu ǂoa, tsî hurib tawa ge ǂnû.

²Tsî di ge ǂgui ǂnubide ǁîb tawa ǀhao, ob ge ǂgaus ǃnâ ǂgâ tsî ge ǂnû; tsî ǁaes hoas ge ǃanib ai ge mâ i.

³Ob ge ǂguina ǂkhōdi ǃnâ ǃhoa tsî ge mî: Tsoro-aob ge tsorob nîse ge ǂoa.

⁴Tsî tsorob ra hîa i ge ǀnî-e daob ammi ai ge ǁnā, on ge anina hā, tsî ǁî-e ge hapu.

⁵Tsî ǀnî-i ge ǃhaoxa-am ǃhūb ai ge ǁnā, ǀoatsi ǃhūba i ūhâ tama ǃkhais ai, o i ge ǁnātimîsi ge ǁhai, ǃgamse i ge ǃhūb ǃnâ ǁgoe tama hâ i amaga.

⁶Tsî sores ge ǁhaio, o i ge ge ǂhubihe, tsî ǃnoma-e i ūhâ tama hâ amaga i ge ge ǂnâ.

⁷Tsî ǀnî-i ge ǁkhūn ǃnâ ge ǁnā, tsî ǁkhūn ge ǁhaikhâio, o i ge ge ǀhomǀomhe.

⁸Tsî ǀnî-i ge ǃgâi ǃhūb ai ge ǁnā, tsî ge ǂûtani, ǀgui-e ǀguikaidisi ǃnādi, tsî nau-e ǃnanidisi ǃnādi, tsî nau-e ǃnonadisi ǃnādi kōse.

⁹ǂGaera ūhâ-e ǁnâu i nîse a-i ǁnâu.

¹⁰O gu ge ǁkhāǁkhāsabega hā, tsî ǁîb ǃoa ge mî: Tarexats ra ǁîna ǃoa ǂkhōdi ǃnâ ǃhoa?

¹¹Ob ge ǃeream, tsî ǁîgu ǃoa ge mî: Sago ge māhe hâ, gaosib ǀhommi dib di ǂganǃgâsiba ǂansa, xawen ge nēna māhe tama hâ.

¹²Ūhâ-i, ǁî-i ge nî māhe, î-i ǃnāǂamsase ūhâ; xawe ūhâ tama-i ge ǁkhāti ū i hâ-e nî ūxūhe xui-ao.

¹³ǁNā-amaga ta ge ǂkhōdi ǃnâ ǁîna ǃoa ra ǃhoa, mû raǃân mû tama hâ, tsî ǁnâu ra ǃân ǁnâu tsî xū-i xare-e ǁnâuǃā tama hâ amaga.

¹⁴Tsî ǁîn ǃnâs ge Jesajab di kēbosisa ge ǀoa, nēti ra mîsa: ǁNâus ǀkha du ge nî ǁnâu, xawe tātsē ǁnâuǃā tide, tsî mû raǃâ du ge nî mû, xawe tātsē mûǂan tide.

¹⁵ǂGaob nē ǁaes dib ge a karosa tsî ǂgaedi ǀkhan ge tsūse ra ǁnâu, tsî mûdi ânan ge ǂganam în ga tā mûdi ǀkha mû, în ga tā ǂgaedi ǀkha ǁnâu, în ga tā ǂgaob ǀkha ǁnâuǃā, în ga tā ǃhobasen, î ta ga ǁîna tā ǂgauǂgau, ti.

¹⁶Xawe ǃgâiǃō di ge hâ sago di mûde, mû di ra amaga, tsî sago di ǂgaede, ǁnâu di ra amaga.

¹⁷Amase ta ra mîba go: ǂGui kēbo-aogu tsî ǂhauǃnâgu tsî gu kom sago ra mûna mûsa ge turao, xawe gu ge mû tama ge i; tsî ǁnâu gu nîse, sago ra ǁnâuna, xawe gu ge ǁnâu tama ge i.

¹⁸Sago ǁnâi ǁnâu ǂkhōs tsoro-aob disa.

¹⁹Khoe-i ga mîs gaosib disa ǁnâu, xawe ǁnâuǃā si tama io, ob ge ǂkhababa hā, tsî ra tsububē ǂgaob â-i ǃnâ tsorohe hâ-e; nē-i ge daob ammi tawa ge tsorohe-e.

²⁰Tsî ǃhaoxa-am ǃhūb ǃnâ tsorohe hâ-i ge nē-i, mîsa ǁnâu tsî ǁnātimîsi ǃgâiaǂgaob ǀkha ra ǃkhōǃoa-e.

²¹Xawe ǃnoma-e i ǁî-i ǃnâ ūhâ tama amaga i ge ǁaerob ǀguiba hâ; tsî ǁgâiǀāb tsî ǃgôaǃgonni tsîkha ga hāo mîs ǃaroma, o i ge ǁnātimîsi ra ǁgonǁgonǃnâhe.

²²Tsî ǁkhūn ǃnâ tsorohe hâ-i ge mîsa ra ǁnâu-e, tsî nē ǃhūbaib di ǂhansens tsî ǂgaeǂhapus ǁuiǃkhūsib dis ge mîsa ra ǀhūǀhū, tsî i ge ra ǂûtanioǃnâ kaihe.

²³Tsî ǃgâi ǃhūb ǃnâ tsorohe hâ-i ge nē-i, mîsa ǁnâu tsî ǁnâuǃā, tsî ra ǂûtani-e; tsî i ra ūǀkhī, ǀgui-e ǀguikaidisi ǃnādi, tsî nau-e ǃnanidisi ǃnādi, tsî nau-e ǃnonadisi ǃnādi kōse.

²⁴ǀNî ǂkhōsab ge ǁîna ǁgui-aiǃâ tsî ge mî: Gaosib ǀhommi dib ge khoeb khami ī, ǃgâi ǃhoroba ǁîb ǃhanab ǃnâ ge tsoroba.

²⁵Tsî khoen ǁom hâ hîab ge khākhoeb âba hā, tsî ǀomatsâna ǃhorob ǁaegu tsoro, tsî ge bē.

²⁶Tsî ǃhorob ge ǁhai tsî ǂûǂûo, on ge ǀomatsân tsîna ge hōhe.

²⁷O gu ge ǃgāgu ǀhonkhoeb diga hā, tsî ǁîb ǃoa ge mî: ǃKhūtse, ǃgâi ǃkhom-ets kha sa ǃhanab ǃnâ tsoro tama hâ? Mapa xub ǁnâi ǀomatsâna ūhâ?

²⁸Ob ge ǁîgu ǃoa ge mî: Khākhoeb kom ǁnāsa ge dīo. O gu ge ǃgāga ǁîb ǃoa ge mî: ǂGaots ra ǁnâi, ǃgû tsî ge nî ǀhaoǀhao ni ǃkhaisa?

²⁹Ob ge ge mî: Hî-î, î go tā ǀnîsi ǀomatsâna ǀhaoǀhaos ǀkha ǃhorob tsîna ǃhomǂui.

³⁰An hoana ǀomkhâiǀhao ǃgaos kōse; tsî ǃgaoǁaeb ai ta ge ǃgao raga nî mîba: Aibe ǀomatsâna ǀhaoǀhao, î ǃgaeǀkhādi ǃnâ ǃgaeǀkhā, în khauǃkhūhe; xawe ǃhoroba ti sâu-ommi ǃnâ ǀhaoǀhao.

³¹ǀNî ǂkhōsab ge ǁîna ǁgui-aiǃâ tsî ge mî: Gaosib ǀhommi dib ge mostardǃkhomro-i khami ī, khoeb ge ū tsî ǁîb ǃhanab ǃnâ a tsoro-e.

³²Hoa ǃkhomgu xa ǂkhariro-i ge ǁî-e, xawe ǀomkhâi i rao, o i ge hoa ǁhaon ǃgâ-ai a kai, tsî ra hai kai, ǀhommi di anin ra hā tsî ǁî-i di ǂgonagu ǃnâ om kōse.

³³ǀNî ǂkhōsab ge ǁîn ǃoa ǃhoa tsî ge mî: Gaosib ǀhommi dib ge ǀkhuruǀkhurupereb khami ī, taras ge ūb, tsî ǃnona ǀguirogu tsampereb digu ǃnâ sâub, hoaragaseb ge ǀkhurus kōse.

³⁴Nēn hoanab ge Jesuba ǂkhōdi ǃnâ ǂnubidi ǃoa gere ǃhoa, tsî ǂkhōs oseb ge ǁîna ǃoa ǃhoa tama ge hâ i.

³⁵Kēbo-aob xa ge mîhes nî ǀoase, nēti ra mîba: “Ti amsa ta ge ǂkhōdi ǃnâ nî khowa, tsî ǃhūbaib di ǃgaoǃgaosa xu ge ǂganǃgâsana nî ǃhoaǂui.”

³⁶Tsî ǂnubideb ge Jesuba xu ǃnubaib ge oms tawa ge sī. O gu ge ǁkhāǁkhāsabegu âba ǁîb ǃoa hā tsî ge mî: ǁGuiǃāba ge ǂkhōs ǃhanab ǀomatsân disa.

³⁷Ob ge ǃeream tsî ǁîgu ǃoa ge mî: ǃGâi ǃkhomma ra tsorob ge Khoen Ôaba.

³⁸Tsî ǃhanab ge ǃhūbaiba. Tsî ǃgâi ǃkhomn ge gaosib ôana. Tsî ǀomatsân ge ǂkhabab ôana.

³⁹Tsî khākhoeb, ǁîna ge tsorob ge ǁgâuaba. Tsî ǃgaoǁaeb ge ǃhūbaib di ǀamsa. Tsî ǃgao ra gu ge ǀhomǃgāga.

⁴⁰Tsî ǀomatsân ra ǀhaoǀhaohe, tsî ǀaes ǀkha ra khauǃkhūhes ǁkhās khami i ge ǁkhāti nē ǃhūbaib di ǀams ai nîra ī.

⁴¹Khoen Ôab ge ǁîb di ǀhomǃgāga nî sî, tsî gu ge hoa ǁgonǁgonǃnâdi tsî ǂkhababa ra dīn ona ǁîb gaosiba xu nîra ǀhaoǀhao;

⁴²tsî gu ge ǁîna ǁganoms ǀaeb dis ǃnâ nîra aoǂgā, ǁnāpa kha ge āb tsî ǁaninǁgûb tsîkha nîra hâ.

⁴³ǃNubain ge ǂhanu-aina sores khami nîra ǂkhai, gaosib ǁîn Îb dib ǃnâ. ǂGaera ūhâ-e ǁnâu i nîse a-i ǁnâu!

⁴⁴ǁKhawab ge gaosib ǀhommi diba ǁuib, ǃhanab ǃnâ sâusase hâb khami ī, khoeb ra hō tsî gaugauba, tsî ǁîb ǃaromab ǃgâiaǂgaob xa ǃgû tsî ūb hân hoana ǁamaxū, tsî ǁnā ǃhanaba ge ǁamaba.

⁴⁵ǁKhawab ge gaosib ǀhommi diba ǁamagu-aob, îsa ǃamde ra ôab khami ī.

⁴⁶Tsî ǀgui ǃgomǀgausa ǃamsab ge hō, ob ge ǃgû, tsî ūb hân hoana ge ǁamaxū tsî ǁîsa ge ǁama.

⁴⁷ǁKhawab ge gaosib Elob diba ǀûis, hurib ǃnâ ra aoǂuihes, tsî hoa ǁauǃnôan ra ǃkhō-ūhes khami ī.

⁴⁸Tsî ǀoas ra ǃnubain ge ǃanib ai ra ǂgaeǂui si, tsî ǂnû tsî ra sāǂui, ǃgâina xapadi ǃnâ, xawe ǁgao hânan ra aoxū.

⁴⁹ǁNās ǁkhās xase i ge nē hâ ǁaeb di ǀams ǃnâ nîra ī. ǀHomǃgāgu ge ǂoa, tsî ǂkhabana ǂhanu-ain ǁaeguba xu nîra ǀgora.

⁵⁰Tsî ǁganoms ǀaeb dis ǃnâ nîra aoǂgā nî, ǁnāpa kha ge āb tsî ǁaninǁgûb tsîkha nîra hâ.

⁵¹Ob ge Jesuba ǁîgu ǃoa ge mî: ǁNâuǃā go go nēn hoana? O gu ge ge mîǀî bi: Ā, ǃKhūtse.

⁵²Ob ge ǁîba ge mîǀî gu: ǁNā-amaga mâ xoaǂansabeb hoab, gaosib ǀhommi dib ǃnâ ǁkhāǁkhāhe hâb, ge oms ǀhonkhoeb, ǁîb ǁuiba xu ǀasan tsî ǀnaisan tsîna ra ūǀkhīb khami ī.

⁵³Tsî i ge ge ī, Jesub ge nē ǂkhōde mîtoao, ob ge ǁnāpa xu ge ǃgû.

⁵⁴Tsî ǁîb di aboxan ǃhūb ǃnâb ge sī, ob ge ǁîn di sinagogegu ǃnâ ge ǁîna ge ǁkhāǁkhā ǁîn ge ǃhuris kōse, tsîn ge ge mî: Mapa xub kha nēba nēti ī gā-aisib tsî ǀgaigu tsîna ūhâ?

⁵⁵Nēba kha ǃnaokuru-aob ôa tamaba? Tsî ǁgûs âba kha Marias ti ǂgaihe tamas hâ? Tsî ǃgâsagu âba kha, Jakobub tsî Joseb tsî Simonni tsî Judab tsîgu tamaga?

⁵⁶Tsî ǃgâsadi âba, hoade kha sada ǀkha hâ tama di hâ? Mapa xub ǁnâi nēba nēn hoana ūhâ?

⁵⁷Tsîn ge ǁîb ǃnâ ge ǁgonǁgonǂgaohe. Ob ge Jesuba ǁîn ǃoa ge mî: Kēbo-aob ge ǁîb aboxan ǃhūb ǃnâ tsî ǁîb oms ǃnâb ǃgôaose hâ khami ǀkhara ǃkhai-i ai ǃgôaose hâ tama hâ.

⁵⁸Tsîb ge ǁnāpa ǂgui ǀgaiga ǁîn ǂgomoǃnâsib ǃaroma dī tama ge i.