Read Khoekhoegowab Mateub 14 Bible Online

Mateub 14 - Khoekhoegowab bible

Mateub 14

¹ǁNā ǁaeb ǁkhāb aib ge Herodeb hakaǁî ǃhūǃâs gao-aoba Jesub gomma ge ǁnâu.

²Ob ge ǁîb ǃgāgu ǃoa ge mî: Nēb kom Johaneb ǁĀǁnâ-aobao; ǁō hâna xub kom go khâio, tsî ǁnā-amaga gu kom nēti ī ǀgaiga ǁîb ǃnâ ra sîseno.

³Herodeb ge Johaneba ǃkhō, tsî ǁîba ǃgaehe hâse ǃkhō-oms ǃnâ ǂnûi xui-ao, Herodias ǁîb ǃgâsab Filipub di taras ǃaroma.

⁴Johaneb ge ǁîb ǃoa mî amaga: Mā-amhe tamats kom hâo, ǁîsats nî ūhâ ǃkhaisa.

⁵Tsî ǁîbab ra ǃgam ǂgao, xaweb ge ǁaesa ge ǃao, kēbo-aosen ge ǁîba ūhâ i amaga.

⁶Tsî Herodeb di ǃnaetsēs ge tsēdīheo, os ge Herodias ôasa ǁîn aiǃâ ge ǂnā, tsîb ge Herodeba ge ǃgâibahe.

⁷ǁNā-amagab ge nūs ǀkha ge mîmâiba si, ǂgans ka-i hoa-eb nî mā si ǃkhaisa.

⁸Os ge ǁgûs xa aibe ǀapeǃnâhe tsî ge mî: Johaneb ǁĀǁnâ-aob danasa ǃores ǃnâ mā te hā re.

⁹Ob ge gao-aoba ge ǃoa, xawe nūdi, tsî ǂnûǀhaoba bi hân ǃaromab ge māhes nîsa ge mîmā.

¹⁰Ob ge sî tsî Johaneba ǃkhō-oms ǃnâ ge ǁhāǁnâdana kai.

¹¹Tsî danas âb ge ǃores ǃnâ tanihāhe, tsî ǀgôarosa ge māhe; os ge ǁgûs âs ǃoa ge ūsī.

¹²Tsî gu ge ǁîb ǁkhāǁkhāsabega hā tsî sorosa ūkhâi, tsî ǁîsa ge ǁkhō, tsî Jesuba ge sī ǂhôa.

¹³Tsî Jesub ge ǁnâu, ob ge ǁnāpa xu ǂgaus ǃnâ ǃgaroǃhūb ǃoa ǀguri hâ ǃkhais ǃoa ge ǂgō. Tsî ǂnubidi ge ǁnâu, o di ge ǀnūb ǀkha hoa ǃāde xu ge sao bi.

¹⁴Tsî Jesub ge ǂoa tsî ǂgui khoena mû, ob ge ǁîna ǀkhomxa, tsî ǁîn di ǀaesen hâna ge ǂgauǂgau.

¹⁵Tsî ǃui i geo, o gu ge ǁkhāǁkhāsabegu âba ǁîb ǃoa hā, tsî ge mî: Nē ǃkhais ge a ǃgarosa, tsî ǁaeb ge ǀnai go toa, xuige ǂnubide ore, în ǃhaidi ǃoa ǃgû, în ǂûna ǁamabasen.

¹⁶Ob ge Jesuba ge mîǀî gu: ǃGûn nîs kom ǂhâbasa tamao; sago ǁîna ǂûmā re.

¹⁷O gu ge ǁîb ǃoa ge mî: ǀNî xū-e ge kom nēpa ūhâ tamao, koro peregu tsî ǀgam ǁaukha ǀguikha.

¹⁸Ob ge: ǁÎna tita ǃoa ūhā! ti ge mî.

¹⁹Tsî ǂnubidi nî ǀgân ai ǂnûsa mîmā, tsîb ge koro peregu tsî ǀgam ǁaukha tsîna ū, tsî ǀhommi ǃoa ge kōǃapa, tsî ǀkhae, tsî ge khôa, tsî perega ǁkhāǁkhāsabega ge mā, o gu ge ǁkhāǁkhāsabega ǂnubide ge mā.

²⁰Tsîn ge hoana ǂû tsî ge ǁâ, tsî ǃgau go ǃârona ge ūkhâi, disiǀgamǀa ǀharudi di ǀoab kōse.

²¹Tsî ǂû ge gu ge, taradi tsî ǀgôan tsîn ose, koroǀoadisi ao ge i.

²²Tsî ǁnātimîsib ge Jesuba ǁîb ǁkhāǁkhāsabega ge ǁgari, ǂgaus ǃnâ ǂgâ tsî gu nî ǁîb aiǃâ nauǃanib ǃoa ǃgâusa, ǁîb ra ǂnubide xore hîa.

²³Tsî ǂnubideb ge xore, ob ge ǀguri ǃhommi ai ge ǃapa, ǀgoreb nîse. Tsî ǃui i ge, ob ge ǁnāpa ǀguri ge hâ.

²⁴Tsî ǂgaus ǀnai ge hurirob ǁaegub ǃnâ hâ hîas ge ǃgabigu xa ge tsūǀkhā, ǂoab ge ǁîs ǃoagu hâ i amaga.

²⁵Tsî hakaǁî ǃûiǁaeb tsuxub dib aib ge Jesuba ǁîgu ǃoa, hurirob ai ra ǃgûse ge hā.

²⁶Tsî ǁkhāǁkhāsabegu ge ǁîba mû, hurirob aib ra ǃgûse, o gu ge ǃhuri tsî ge mî: ǀHaiǀnūbe-i komo. O gu ge ǃaob xa ge ǃau.

²⁷Ob ge Jesuba ǁnātimîsi ǁîgu ǀkha ǃhoa tsî ge mî: ǃGâiǂâixa re, tita komo; tā ǃao re!

²⁸Ob ge Petruba ǁîba ǃeream tsî ge mî: ǃKhūtse, sats kao, ǂgai te re, î ta sats tawa ǁgammi ai sī re.

²⁹Ob ge: Hā re, ti ge mî. Ob ge Petruba ǂgausa xu ǁgôa tsî ǁgammi ai ge ǃgû, Jesub tawab nî sīse.

³⁰Tsî ǀgaisa ǂoabab ge mû, ob ge ge ǃao; tsî domtsoatsoab ge, ob ge ǂgaiǂui tsî ge mî: ǃKhūtse, hui te re!

³¹Ob ge Jesuba ǁnātimîsi ǃomma ǀhōǂui, ǃkhō bi, tsî ǁîb ǃoa ge mî: Sa ǂkhariǂgomxaǃnâtse, tarexats go îganǀgē?

³²Tsî ǂgaus ǃnâ kha ge ǂgâ, ob ge ǂoaba ge ǃnō.

³³O gu ge ǂgaus ǃnâ hâga hā, ǀgoreǀî bi, tsî ge mî: Amase, Elob Ôats ge satsa.

³⁴Tsî gu ge ǃgâu tsî Genesarets ǃhūb ǃnâ ge sī.

³⁵Tsî ǁnā ǃās khoegu ge ǁîba mûǂan, o gu ge ǁgoeǂnamipe hâ ǃhūb hoab ai ge sî, on ge tsû-aina ūhân hoana ǁîb ǃoa ge ūhā,

³⁶tsî ǁîba ge ǀkhoma, ǁîb sarab di ǂomamǃgâb ǀguiban ga tsâǀkhāsa; tsî tsâǀkhā bi ran hoan ge ge ǂgau.