Read Khoekhoegowab Mateub 15 Bible Online

Mateub 15 - Khoekhoegowab bible

Mateub 15

¹ǃNubai gu ge xoaǂansabegu tsî Farisegu tsîga Jerusalemsa xu ǁîb ǃoa hā tsî ge mî:

²Tarexa gu kha ǁkhāǁkhāsabegu âtsa ǂnûiǂgādi kaigu dide ra ǃûǂam? ǁÎgu ǃomga gu kom ǁā tamao, pereba, gu ra ǂû ǃnubai.

³Ob ge ǃeream tsî ǁîgu ǃoa ge mî: Tarexa go kha sago ona Elob di mîmāsa ra ǃûǂam sago di ǂnûiǂgādi ǀkha?

⁴Elob kom mîmā tsî ge mîo: “Saob tsî saos tsîrats ge nî ǃgôa!” Tsî: “Saob tsî saos ona ga ǀâxare-i, ǁnā-i ge nî ǃgamhe.”

⁵Xawe go sago ra mî: Saob tsî saos tsîra ǃoa ga mî-i: “ǁGuibas ge nēs, tita xu ga harebe tsisa;” tsî: “ǁGûb tsî ǁgûs tsîra ǃgôas ge ǂhâbasa tama hâ” ǁnā-i ge ra ǂâuǂâu.

⁶Tsî go kom ǁnāti Elob mîsa ge ǁauǁauo, sago di ǂnûiǂgādi ǀkha.

⁷Sa hînaxaǃnâgo, ǃgâiseb ge Jesajaba sago xa kēbo tsî ge mî:

⁸Nē ǁaes ge ams ǀkha ra ǀgū te, tsî amǁgaugu ǀkha ra ǃgôa te, xaweb ge ǁîn di ǂgaoba tita xu a ǃnū.

⁹Xawen ge ǁause ra ǃoaba te, ǁkhāǁkhāde ra ǁkhāǁkhāǃâ, khoen di ǂnûiǂgāde.

¹⁰Tsî ǂnubisa ǂgaihā tsîb ge ge mîǀî ni: ǁNâu î du ǁnâuǃā!

¹¹Ams ǃnâ ra ǂgâ-i ge khoe-e ǀuriǀuri tama-e, xawe amsa xu ra ǂoa-i kom khoe-e ra ǀuriǀuri-eo.

¹²ǃNubai gu ge ǁkhāǁkhāsabegu âba ǁîb ǃoa hā tsî ge mî: ǂAnts a xare, Farisegu go ǁnā mîsa gu go ǁnâu ǃnubai ǁgonǁgonǃnâhe ǃkhaisa?

¹³Ob ge ǃeream tsî ge mî: Mâ hai-i hoa-i, ti îb ǀhommi dib xa ǂgāhe tama-i ge nî ǃhomǂuihe.

¹⁴ǀÛǀkhā gu re, ǂgī hâ ǂgaeǂgui-aogu ǂgī hân digu kom ǁîgao; tsî ǂgī hâ-i ga ǂgī hâ-e daoba a ǁgauo, on kom hoana tsaus ǃnâ nî ǁnāo.

¹⁵Ob ge Petruba ǃeream tsî ǁîb ǃoa ge mî: Nē ǂkhōsa sige ǁguiǃāba re!

¹⁶Ob ge Jesuba ge mî: Tsî sago ona kha ganupe a ǁnâuǃāoǃnâ?

¹⁷Ganupe ǁnâuǃā tama go hā, ams ǃnâ ra ǂgâ-i hoa-i ǃnāb ǃnâ ǃgû tsî ǂganǃgâsib ǃnâ ra sîsenǂuihesa?

¹⁸Xawe amsa xu ra ǂoan ge ǂgaoba xu ra ǀkhīna, tsî ǁîn ge khoe-e ra ǀuriǀurina.

¹⁹ǂGaoba xun kom ra ǀkhīo: ǂKhaba ǂâibasendi, ǃgams, ǃgamekhôas, ǀaib, ǃnarib, ǂkhaba ǂgā-amdi tsî ǃkhāǃkhādi tsîna.

²⁰Nēn ge ǁnān, khoe-e ra ǀuriǀurina, xawe ǁānǃom tama ǂûs kom khoe-e ǀuriǀuri tamao.

²¹Tsî Jesub ge ǁnāpa xu ǂoa, ob ge Tires tsî Sidons tsîra di ǃhūǃâdi ǃoa ge ǃgû.

²²Tsî mû, Kanaanǁî taras ge ǁnā ǀkhariba xu ǀkhī, tsî ǂgaiǃgon bi tsî ge mî: ǀKhom te re, ǃKhūtse, Davib ôatse, ti ôas ǁgaisise ǁgâuab xa hâǃnâhe xuige.

²³Xaweb ge ǁîba mî-i xare-e ǃeream si tama ge i. O gu ge ǁkhāǁkhāsabegu âba ǁîb ǃoa hā, ǂgan bi tsî ge mî: ǁÎsa xore re, ǂgaiǃgon ges ra xui-ao.

²⁴Ob ge ǃeream tsî ge mî: Tita ge kā hâ gūn Israeli ommi din ǀguin ǃoa ge sîhe.

²⁵Os ge hā ǀgoreǀî bi tsî ge mî: ǃKhūtse, hui te re!

²⁶Ob ge ǃeream tsî ge mî: ǃGâi tama i kom hâo, ǀgôan di pereba ū tsî arirona aobasao.

²⁷Os ge ge mî: Ama i ge ǃKhūtse, xawen kom arirona ǁîn ǀhonkhoeb tāba xu ra ǁnā ǂomaron xa ra ǂûo.

²⁸Ob ge Jesuba ǃeream, tsî ǁîsa ge mîǀî: Tarase, kais ge a ǂgoms âsa, ǂgaos ra khami a-i ība si! Os ge ǁîs di ôasasa ǁnā ira xu ge ǂgau.

²⁹Tsî Jesub ge ǁnāpa xu aiǃâb ǃoa ǃgûo, ob ge Galileahurirob tawa ge sī, ǃhommi ai ǃapa tsî ǁnāpa ge ǂnû.

³⁰Tsî ǂgui ǂnubidi ge ǁîb ǃoa ge hā, tsîn ge ǁîn ǀkha ge ūhā: ǃHom hân, ǂgī hân, ǃgomen, ǃhoran tsî ǂguin nēti īn tsîna; tsîn ge ǁîna Jesub ǂaira tawa ge ǁgui, tsîb ge ǁîna ge ǂuruǂuru.

³¹Tsî ǂnubidi ge mû, ǃgomen ra ǃhoa, ǃhoran ra ǂgau, ǃhom hân ra ǃgû tsî ǂgī hân ra mû ǃkhaisa, on ge buru tsî Israelǁîn di Eloba ge kare.

³²Tsîb ge Jesuba ǁkhāǁkhāsabegu âba ǂgaihā tsî ge mî: ǂNubisa ta ra ǀkhomxa, ǃnona tsēden go tita ǀkha hâ i, xawen go ǂûxū-e ūhā tama hâ i amaga, tsî ǀkhaiǃnâse ta ǁîna ǃgû kai ǂgao tama, în tā daob ai tsanaǁkhui.

³³O gu ge ǁkhāǁkhāsabegu âba ge mîǀî bi: Mapa xu ge ǁnâi nē ǃgaroǃhūb ǃnâ ǁnātikō perega nî hō, nētikō kai ǂnubis nî ǁâǁâhes kōse?

³⁴Ob ge Jesuba ǁîgu ǃoa ge mî: Matikō perena go ǁnâi ūhâ? O gu ge ge mî: Hû peren tsî ǀoro ǁauron tsîn ǀguina.

³⁵Ob ge ǂnubide ge mîmā, ǃhūb ai ǂnûsa.

³⁶Ob ge hû peregu tsî ǁaun ona ū, gangan, khôa, tsî ǁîb ǁkhāǁkhāsabega ge mā tsî ǁkhāǁkhāsabegu ge ǁaesa ge mā.

³⁷Tsîn ge hoana ǂû tsî ge ǁâ, tsî ǃgau go ǂomana hû ǀharudi ǀoab kōse ge ūkhâi.

³⁸Tsî ǂû ge khoegu ge, taradi tsî ǀgôan tsîn ose, hakaǀoadisi ao ge ī.

³⁹Tsî ǂnubideb ge oa kai, ob ge ǂgaus ǃnâ ǂgâ tsî Magadans ǀkharib tawa ge sī.