Read Khoekhoegowab Mateub 16 Bible Online

Mateub 16 - Khoekhoegowab bible

Mateub 16

¹Tsî gu ge Farisegu tsî Sadusegu tsîga ǁîb ǃoa hā, tsî ǃâitsâ bi rase ge ǂgan, sao-eb nî ǁîga ǀhomma xu ǁgausa.

²Ob ge ǁîga ǃeream tsî ge mî: ǃUi i ka, o go ra mî: ǃGâi tsēs kom nîo, ǀhommi kom ǀaeǀapaxase ra īo.

³Tsî ǃnauǁgoaga go ra mî: Gabu i kom nî nētsēo, ǀhomaib kom a ǀapao. Sa hînaxaǃnâgo, ǀhommi di aisa go a ǀgoraǃā ǁkhā, tsî ǁaeb di saode go kha a ǀgoraǃā ǁoa?

⁴ǂKhaba tsî ǃgamekhôaxa ǃhaos ge sao-e ra ôa, tsîs ge ǀnî sao-e māhe tide, Jonab kēbo-aob di saos ǀguis. Ob ge ǁîga ǁnāxū tsî ge bē.

⁵Tsî ǁkhāǁkhāsabegu âb ge nauǃanib ǃoa ǃgâu, o gu ge perena ūsaosa ge ǀuru.

⁶Ob ge Jesuba ǁîgu ǃoa ge mî: Kō, î go Farisegu tsî Sadusegu di ǀkhuruǀkhurupereb xa ǃûisen re.

⁷O gu ge ǁîgu ǃnâ ǂâiǂâisen tsî ge mî: Perena ge ūsao tama ǃkhais xas komo.

⁸Tsî Jesub ge ǂan, ob ge ge mîǀî gu: Tarexa go kha sago ǃnâ ra ǂâiǂâisen, sa ǂkhariǂgomxaǃnâgo, perena go ūsao tamasa?

⁹Ganupe go ǁnâuǃā tama hâ? ǂÂi go ra xare ǁnā koro peregu, koroǀoadisigu digu xa, tsî matikō ǀharude go ge ūkhâisa?

¹⁰Tsî hakaǀoadisigu di hû peregu xa, tsî matikō ǀharude go ge ūkhâisa?

¹¹Mati go ǁnâi ǁnâuǃā tama hâ, peren xa ta go ǃhoa-ū go tama isa, Farisegu tsî Sadusegu di ǀkhuruǀkhurupereb xa go nî ǃûisen, ti ta go mî ǃnubai?

¹²ǃNubai gu ge ge ǁnâuǃā, pereb di ǀkhuruǀkhurupereb xa gu nî ǃûisen ǃkhaisab mî tamasa tsî Farisegu tsî Sadusegu di ǁkhāǁkhās xa gu nî ǃûisen, tib go mî ǃkhaisa.

¹³Tsî Jesub ge Kaesareas Filipub dis di ǃhūǃâdi tawa sī, ob ge ǁîb ǁkhāǁkhāsabega dî tsî ge mî: Tariba Khoen Ôaba, tin khoena ra mî?

¹⁴O gu ge ge ǃeream: ǀNîn ge Johane ǁĀǁnâ-aots, nauna Eliats, tsî nauna Jeremiats, kēbo-aogu di ǀguits a, ti ra mî.

¹⁵Ob ge ge mîǀî gu: Tsî sago ǁnâi, tari ta a tita, ti go ra mî?

¹⁶Ob ge Simon Petruba ǃeream tsî ge mî: Xristu, ûitsama Elob di Ôats kom satsao.

¹⁷Ob ge Jesuba ǃeream tsî ge mîǀî bi: ǃGâiǃōts hâ, Simon, Jonab ôatse, ǁgans tsî ǀaob tsîra ge nēsa ǂhaiǂhaiba tsi tama hâ, xawe ti Îb ǀhommi ǃnâ hâb kom ǁîsa go ǂhaiǂhaiba tsio.

¹⁸Tsî ta ge ra mîba tsi: Petruts a satsa, tsî nē ǃhaob ai ta ge tita ti ǀhaohâba nî omkhâibasen, tsî Hadeb di ǁāgu ge ǁîba dan tide.

¹⁹Tsî ta ge satsa ǂganamxūra gaosib ǀhommi dib dira nî mā, tsî ǃhūbaib aits ga ǃgae-i hoa-i ge ǀhommi ǃnâ nî ǃgaehe hâse hâ-e, tsî ǃhūbaib aits ga ore-i hoa-i ge ǀhommi ǃnâ nî orehe hâse hâ-e.

²⁰ǃNubaib ge ǁîb ǁkhāǁkhāsabega ge ǃkhâi, î gu tā ǀgui khoe-i tsîna mîba ǁîb a Xristu ǃkhaisa.

²¹ǁNā ǁaeba xub ge Jesuba ǁîb ǁkhāǁkhāsabega ge ǁgautsoatsoa, Jerusalems ǃoa ǃapa tsîb nî kaise tsâsa kaigu, ǀgapipristergu tsî xoaǂansabegu tsîga xu, tsîb nî ǃgamhesa, tsîb nî ǃnonaǁî tsēs ai khâi ǃkhaisa.

²²Ob ge Petruba ǁîba ǀguri ū, tsî ǀau bi tsoatoa tsî ge mî: ǀKhomsen re, ǃKhūtse, îs tā nēsa ība tsi re!

²³Ob ge Jesuba ǂnan, tsî Petrub ǃoa ge mî: Bē ti khaoǃgâ, Satantse, ǁgonǁgonxaba tets a, Elob dinats ǂâi tama, tsî khoen dinats ra ǂâi xuige.

²⁴ǃNubaib ge Jesuba ǁîb ǁkhāǁkhāsabegu ǃoa ge mî: Mâ-i hoa-i ti khaoǃgâ ra hā ǂgao-e, a-i ǁî-aitsama ǀūxūsen, î-i ǁî-i ǃgâuhaiba ūkhâi tsî tita sao!

²⁵ǁÎ-i ûiba ga sâubasen ǂgao-i hoa-i ge ǁîb xa nî kāhe-e, tsî ǁî-i ûiba tita ǃaroma ga kāhe-i hoa-i nî ǁîba hō xuige.

²⁶Tare-e kha khoe-e nî harebeba, ǃhūbaib hoaba i ga hō, tsî ǀoms â-i ga kā ǃnubai? Tsî tare xū-e i kha khoe-e nî mā, ǀoms â-i di oreǂuimarise?

²⁷Ī i kom nîo, Khoen Ôab nîra hā ǃkhaisa ǁîb Îb di ǂkhaisib ǃnâ tsî ǁîb ǀhomǃgāgu ǀkha, ob ge mâ-i hoa-e ǁî-i dīb ǃoa nîra mā.

²⁸Amase ta ra mîba go, ǀnîn ge hâ nē mân xa, ǁōba tsâ tidena, Khoen Ôaban nî ǁîb gaosib ǃnâ ǃgoaxase mûs aiǃâ.