Read Khoekhoegowab Mateub 17 Bible Online

Mateub 17 - Khoekhoegowab bible

Mateub 17

¹Tsî ǃnani tsēde nēs khaoǃgâb ge Jesuba Petrub, tsî Jakobub, tsî Johaneb, ǁîb ǃgâsab tsîga ū, tsî ǀgapi ǃhommi ai ǀguri ge ūsī gu.

²Tsîb ge ǁîgu aiǃâ ge ǀkharaǀkharahe, tsîs ge ais âba sores khami ge ǂkhai, tsîn ge ǁîb sarana ǃnâb khami ge ǃuri.

³Tsî mû, Moseb tsî Eliab tsîkha ge ǁîga ge ǂhai, Jesub ǀkha ra ǃhoaǃâ.

⁴Ob ge Petruba ǃeream tsî Jesub ǃoa ge mî: ǃKhūtse, ǃgâi i kom ao, sage nēpa hâsao; ǂgaots kao, a ge ǃnona ǁhaode dībasen, satsa ǀguis, Moseba ǀguis, tsî Eliaba ǀguisa.

⁵Tsî ganupeb ra ǃhoa hîa, mû ǃnâsa ǃâu-i ge ge somsomǂam gu; tsî mû, dommi ge ǃâusa xu ǀkhī tsî ge mî: Nēb ge ti ǀnamǀnamsa ǀGôab, ǃgâiǃgâibasensa ta ūǃnâ hâba; ǁîba ǁnâu!

⁶Tsî ǁkhāǁkhāsabegu ge ǁnâu, o gu ge ǁîgu aidi ai ǁnā, tsî kaise ge ǃao.

⁷Ob ge Jesuba sī, tsî ǁîga tsâǀkhā, tsî ge mî: Khâi î go tā ǃao re.

⁸Tsî kōkhâi gu ge, o gu ge khoe-i xare-e mû tama ge hâ i, Jesub ǀguiba.

⁹Tsî ǃhomma xu gu ra ǁgôa hîab ge Jesuba ǁîga ǃkhâi tsî ge mî: Khoe-i xare-e go ge nē ǂhais xa ǃhoaba tide, Khoen Ôab ǁōba xu nî khâis kōse.

¹⁰Tsî gu ge ǁîb ǁkhāǁkhāsabega dî bi tsî ge mî: Mati gu kha xoaǂansabega ra mî, Eliab nî aibe hāsa?

¹¹Ob ge Jesuba ǃeream tsî ǁîgu ǃoa ge mî: Eliab kom aibe hā, tsî nî hoana dī-unuo.

¹²Tsî ta ra sago mîba: Eliab ge ǀnai ge hā, tsîn ge ǁîba ǂanǃā tama ge hâ i, tsî ǂgaon ge khamin ge ǁîba sîsenū ǃkhaisa. ǁNās ǁkhās khamib ge Khoen Ôab ona ǁîna xu nîra tsâ.

¹³ǃNubai gu ge ǁkhāǁkhāsabega ge ǁnâuǃā, Johaneb ǁĀǁnâ-aob xab ge ǁîgu ǀkha ǃhoa ǃkhaisa.

¹⁴Tsî ǂnubidi tawa gu ge sī, ob ge khoeba ǁîb ǃoa hā tsî ǁîb aiǃâ ǁgoara ai ǁnā

¹⁵tsî ge mî: ǃKhūtse, ti ôaba ǀkhomxa re, ǁkhâǀaesenab ūhâ tsî tsûsase ra tsâ xuige; ǂgui ǃnādeb kom ǀaes ǃnâ tsî ǁgam-i ǃnâ ra ǁnāo.

¹⁶Tsî ta ge ǁîba sa ǁkhāǁkhāsabegu ǃoa go ūhā, tsî gu ge go ǂuruǂuru bi ǁoa i.

¹⁷Ob ge Jesuba ǃeream, tsî ge mî: O, sa ǂgomoǃnâ tsî ǂkhaba ǃhaose! Matikōse ta kha sadu ǀkha nî hâ? Matikōse ta kha nî tani du? Nēpa ǁîba tita ǃoa ūhā!

¹⁸Tsî Jesub ge ǁîba ǃgabe, ob ge ǁgâuaba ǁîba xu ge ǂoa, tsîb ge ǀgôaba ǁnā ira xu ge ǂgau.

¹⁹ǃNubai gu ge ǁkhāǁkhāsabega ǀguri Jesub ǃoa hā, tsî ge mî: Tarexa ge sige ǁîba go aoǂui ǁoa i?

²⁰Ob ge Jesuba ge mîǀî gu: Sago di ǂgomoǃnâsiba xus ge. Amase ta ra mîba go, ǂgoms mostardǃkhomro-i khami īsa go ga ūhâo, o go ga nē ǃhommi ǃoa mî: Nēpa xu ǁnāǀî ǂgō! Ob ge nî ǂgō, tsî xū-i xare-i kom sago īǁoasaba ga hâ tideo.

²¹Tsîb kom nē ǁgâuaǃnôaba tātsē ǂoa tideo, ǀgores tsî ǂûtamahâsa xu i ga ī tama io.

²²Tsî Galileab ǃnâ gu ra ǃgûma, hîab ge Jesuba ǁîgu ǃoa ge mî: Khoen Ôab nîra khoen ǃomgu ǃnâ māǁnâhe ǃkhais ge nî ī.

²³Tsîn ge ǁîba nîra ǃgam, xaweb ge ǃnonaǁî tsēs ai nîra khâi. O gu ge kaise ge ǃoa.

²⁴Tsî Kapernaums tawa gu ge sī, o gu ge ǁgui-aimarisa ra ǃkhōǃoa khoega Petrub ǃoa hā, tsî ge mî: ǁKhāǁkhā-aob âgo ǁgui-aimarisa māb ra?

²⁵Ob ge: Ā, ti ge mî. Tsî oms ǃnâb ge ǂgâo, ob ge Jesuba ǃhaedā bi tsî ge mî: Matits ra ǂâi, Simontse; ǃhūbaib di gao-aoga tarina xu gu ǁgui-aimaridi tsî ǀkhaegu tsîga ra ǃkhōǃoa? ǁÎgu ôana xusa? ǃHaokhoena xusa?

²⁶Ob ge Petruba ǁîb ǃoa ge mî: ǃHaokhoena xus komo. Ob ge Jesuba ge mîǀî bi: On kom ǀgôana a ǃnorasao.

²⁷Xawe ǁîga khom ǁgonǁgonǃnâ tidese: ǃGû hurib ǃoa, î ǃkhō-ūdasa aoǂui, î ǂguro nî ǀkhī ǁau-e ū; tsî ǁî-i amsats ga khowa, ots ge nî ǀhai ǀurimarisa hō; ǁîsa ū, î ǁîga mā, ti tsî sa amǃnâs ǃnâ.