Read Khoekhoegowab Mateub 18 Bible Online

Mateub 18 - Khoekhoegowab bible

Mateub 18

¹ǁNā iri ǃnâ gu ge ǁkhāǁkhāsabega Jesub ǃoa hā tsî ge mî: Tari-e nî hoan ǂamai kai gaosib ǀhommi dib ǃnâ?

²Ob ge Jesuba ǀgôaro-e ǂgaihā tsî ǁîgu ǁaegu mâ kai

³tsî ge mî: Amase ta ra mîba go, ǃhobasen tsî go ga nē ǀgôaro-i khami ī tama io, o go kom gaosib ǀhommi dib ǃnâ ǂgâ tideo.

⁴ǁÎ-aitsama nē ǀgôaro-i khami ga ǃgamǃgamsen-i, kom hoan ǂamai nî kai gaosib ǀhommi dib ǃnâo.

⁵Tsî nēti ī ǀgôaro-e ti ǀons ǃnâ ga ǃkhōǃoa-i kom tita ra ǃkhōǃoa-eo.

⁶Xawe nē ǂkhariron, tita ǃnâ ra ǂgomn di ǀgui-e ga ǁgonǁgonǃnâ-i, ǁî-i ge anu, ǁkhamiǀuisa ǃgaeǃaohe tsî i nî hurib di ǃgammi ǃnâ āǁō kaihesa.

⁷Tsūba bi ǃhūbaiba ǁgonǁgonǃnâdi ǃaroma. ǂHâba i kom hâo, ǁgonǁgonǃnâdi nî hâsao, xawe tsūba i ǁnā khoe-e ǁî-e xu di ǁgonǁgonǃnâde ra hā-e.

⁸Sa ǃommi tsî ǂais tsîra ga ǁnâi a ǁgonǁgonǃnâ tsio, ǁîra ǁhāǁnâ, î aoxū. ǃGâiba tsi i kom nîo, ǃhom hâ tsî ǃhorasets nîra ûib ǃnâ ǂgâsa, ǀgam ǃomkha tsî ǀgam ǂaira ūhâǃâts nî ǀamo ǀaeb ǃnâ aoǂgāhes xa.

⁹Tsî mûs âts ga ǁgonǁgonǃnâ tsio, ǁîsa ǁhoroǂui, î aoxū si. ǃGâiba tsi i kom nîo, ǀgui mûs ǀkhats nî ûib ǃnâ ǂgâsa, ǀgam mûra ūhâ ǃâts nî ǀamo ǀaeb ǃnâ aoǂgāhes xa.

¹⁰Mûbasen re, î go tā ǀgui-i nē ǂkhariron di-e ǃharaxū. Mîba go ta ra, ǁîn di ǀhomǃgāgu kom ǀhommi ǃnâ hugaǀgui, ais ti Îb ǀhommi ǃnâ hâb disa ra mûo.

¹¹Khoen Ôab kom ge hāo, kā hâ-eb nî ǃgâiǃō kaise.

¹²Mati go ra ǂâi? Khoe-i ga ǀguikaidisi gūna ūhâo, tsî i ga ǀgui-i ân xa kāheo, khoesedisikhoeseǀana i ǁnāxū tsî ǃgû tsî kā hâ-e ǃhomgu ai ôa tide?

¹³Tsî hō i kao, amase ta ra mîba go, ǁî-i ǃaroma i kom khoesedisikhoeseǀan kā tama ge hâ in ǃgâ-ai ra ǃgâiaǂgao-o.

¹⁴ǁNās ǁkhās xases ge sago Îb ǀhommi ǃnâ hâb di ǂâi tama hâ, ǀgui-i nē ǂkhariron di-i nî kā ǃkhaisa.

¹⁵Tsî sa ǃgâsab ga sats ǃoagu ǁoreo, ǃgû, î ǂgōǀau bi sats tsî ǁîb tsîkho ǁaegu ǀguri. Satsab ga ǁnâuo, ots kom sa ǃgâsaba go hōbaseno.

¹⁶Tsî ǁnâu tsi tamab ga io, ǁnâi gorose ǀguib kas, ǀgamkha kasa ūsao, ǀgam tsî ǃnona ǀhûǀguitimî-aon di amdi ǃnâs mâ mîs hoasa nî mâiǀgaiǀgaihe xuige.

¹⁷Tsî ǁîn onab ga ǁnâu tama io, ǀhaohâba ǁnâi mîba; tsî ǀhaohâb onab ga ǁnâu tama io, ǁnâi ǀūbekhoe tsî mariǃkhōǃoa-aose ūhâ bi.

¹⁸Amase ta ra mîba go: ǃHūbaib ai go kara ǃgae-i hoa-i ge ǀhommi ǃnâ nî ǃgaehe hâse hâ-e, tsî ǃhūbaib ai go kara ore-i hoa-i ge ǀhommi ǃnâ nî orehe hâse hâ-e.

¹⁹ǃAruǀî ta ra mîba du, ǀgamn ga sadu ǃnâ ǃhūbaib ai ǀguiǃnâxao, mâ ǃkhais ǂgann kas hoas ge ǁîna ti Îb ǀhommi ǃnâ hâb tawa nî ībasa.

²⁰ǀGamn kas, ǃnonan kas ga ti ǀons ǃnâ ǀhao hâo, ǁnāpa ta nî ǁîn ǁaegu hâ xui-ao.

²¹ǃNubaib ge Petruba ǁîb ǃoa hā tsî ge mî: Matikō ǃnāde ta kha ti ǃgâsaba nî ǀûba, tita ǃoagu ra ǁoreba? Hû ǃnāde?

²²Ob ge Jesuba ge mîǀî bi: Tita ge ra mîba tsi, hû ǃnā tamadi, xawe hûdisi ǃnādi di hû ǃnādets ge nî ǀûba bi.

²³ǁNā-amagab ge gaosib ǀhommi diba gao-aob ǀkha ra ǂkhōhe, ǁîb ǃgāga ǃereamsa ra ǂgaoǀkhāba.

²⁴Tsî ǃgôatsoatsoab ge, ob ge ǀguib disiǀoadisi marisa surude bi hâba ǁîb tawa ge ūhāhe.

²⁵Tsî matareb nî-eb ge ūhâ tama io, ob ge ǀhonkhoeb âba ge mîmā, ǁîb, ǁîb taras tsî ǀgôan, tsî ūb hâ xūn hoan nî ǁamaxūhe tsîb nî surudeba matarehesa.

²⁶Ob ge ǃgāba ǁîb aiǃâ ǁgoara ai ǁnā tsî ge mî: ǃKhūtse, ǃnūǃnâxaba te re, o ta ge hoana nî matare tsi.

²⁷Ob ge ǀhonkhoeba ǁnā ǃgāba ge ǀkhomxa, tsî ore tsî surudeb hoaba ge ǀûba bi.

²⁸Tsî ǁnā ǃgāb ǁkhāb ge ǂoa, ob ge ǁîb ǀhōsaǃgāgu di ǀguib ǀguikaidisi marisa surude bi hâba hō, tsî ǃkhōdomǃnâ bi tsî ge mî: Titats surude hâ-e matare te!

²⁹Ob ge ǀhōsaǃgāb âba ǁîb ǂaira tawa ǁnā, tsî ǀkhoma bi tsî ge mî: ǃNūǃnâxaba te re, o ta ge hoana nî matare tsi.

³⁰Xaweb ge ǁîba ǂgao tama i tsî ǃkhō-oms ǃnâ ge sī ǂnûi bi, surude bib hâ-eb nî matare bis kōse.

³¹Tsî ǁîb ǀhōsaǃgāgu ge ī gona mû, o gu ge kaise ǃoa, tsî ǀhonkhoeba ī gon hoana ge sī mîba.

³²ǃNubaib ge ǀhonkhoeba ǂgaihā tsî ge mîǀî bi: Sa ǂkhaba ǃgātse, nē surudeb hoaba ta go satsa ǀûba, ǀkhoma tets go amaga.

³³Tsîts kha ga sats ona sa ǀhōsaǃgāba ǀkhomxa tama hâ, tita go satsa ǀkhomxa khami?

³⁴Ob ge ǀhonkhoeb âba ǁaixa tsî ǁîba tsûtsû-aoga ge māǁnâ, hoan ǁîbab surude hânab nî matares kōse.

³⁵ǁNās ǁkhās xaseb ge ti Îb ǀhommi diba sadu ona nîra dī, mâ-i hoa-i ga ǁî-i ǃgâsa-i di dāsāde ǂgaoba xu ǀûba tama io.