Read Khoekhoegowab Mateub 19 Bible Online

Mateub 19 - Khoekhoegowab bible

Mateub 19

¹Tsî i ge ge ī, Jesub ge nē mîde mîtoao, ob ge Galileaba xu ge ǂnauǁnâ, tsî Judeab di ǀkharib Jordanǃāb nauǃanib tawa ge sī.

²Tsî ǂgui ǂnubidi ge sao bi, ob ge ǁîna ǁnāpa gere ǂgauǂgau.

³Tsî gu ge Farisega ǁîba nî ǃâitsâse ǁîb tawa hā tsî ge mî: Mā-amheb hâ khoeba, mâ ǂâibasens hoas aib nî tarasa ǁnāxūsa?

⁴Ob ge ǃeream tsî ǁîgu ǃoa ge mî: Khomai tama go kha ǁnâi hâ, ǁîra ge kurub ge aob tsî taras ase a kuru ra ǃkhaisa?

⁵Tsî ge mî: “ǁNā-amagab ge khoeba ǁgûb tsî ǁgûs tsîra ǁnāxū, tsî taras âb ai nî ǂgāmâisen, o ra ge nî ǀgui ǁgan kai.”

⁶ǁNā-amaga ra ge ǀgam tama, tsî a ǀgui ǁgan. Elob xa ǃgaeǀhaohe hâ-e i ge khoe-e ǀgora tide.

⁷O gu ge ǁîb ǃoa ge mî: Tarexab ǁnâi Moseba ge ǂnûiǂgā, ǀgoraǂkhanisa mā tsî ǁîsa xu ǀgorasa?

⁸Ob ge ge mîǀî gu: Moseb ge sago ǂgaob karosasiba xu ge mā-am go tarade xu ǀgorasa, xawe i ge tsoatsoasa xu ǁnāti ge ī tama hâ i.

⁹Xawe ta tita ra mîba du: Tarasa ga ǁnāxūb hoab, ǀaiba xu i ga ī tama io, tsî ǀkharasa ga ǃgameb ge ra ǃgamekhôa; tsî ǁnāxūheb hâ hîa ga ǃgameb ge ǁkhāti ra ǃgamekhôa.

¹⁰O gu ge ǁîb ǁkhāǁkhāsabega ǁîb ǃoa ge mî: Khoeb nî taras ǀkha ǃgame ǃkhais ga nēti īo, ob kom ǃgameba ǃgâi tamao.

¹¹Ob ge ǁîgu ǃoa ge mî: Mâ-i hoa-i ge ǃkhā tide nē mîsa, tsî māhe hâ-i ǀgui-i ge nî ǃkhā.

¹²ǃGaohe hâgu hâ, ǁgûs ǃnāba xu ǁnāti ge ǃnaega; tsî ǃgaohe hâgu hâ, khoen xa ge ǃgaohega; tsî ǃgaohe hâgu hâ, ǁî-aitsama gaosib ǀhommi dib ǃaroma ge ǃgaokaisenga. ǃKhā ǁkhā-i hoa-e a-i ǃkhā.

¹³ǃNubain ge ǀgôarona ǁîb ǃoa ge ūhāhe, ǃomkha ǁgui-ai tsîb nî ǁîna ǀgorebase; o gu ge ǁkhāǁkhāsabega ǁîna ge ǃgabe.

¹⁴Ob ge Jesuba ge mî: Xū ǀgôarona, î tā ǁîna ǂhani tita ǃoa hāsa, nēti īn dib a gaosib ǀhommi diba xuige.

¹⁵Ob ge ǃomkha ǁîna ǁgui-ai tsî ǁnāpa xu ge ǃgû.

¹⁶Tsî mû, ǀguib ge hā tsî ǁîb ǃoa ge mî: ǃGâi ǁkhāǁkhā-aotse, tare ǃgâi-e ta nî dī, ǀamo ûiba ta nî ūhâse?

¹⁷Ob ge ǁîb ǃoa ge mî: Tarexats “ǃgâi” ti ra ǂgai te; khoe-i xare-i kom ǃgâi tamao Elob ǀguib. Ûib ǃnâts ga ǂgâ ǂgao-o, mîmāde ǃkhōǀgaipe!

¹⁸Ob ge: Mâde? ti ge mîǀî bi. Ob ge Jesuba ge mî: Nēdi: “ǃGamts ge tide!” “ǃGamebats ge khôa tide!” “ǃNarits ge tide!” “ǂKhabasets ge ǂgā-am tide!”

¹⁹“Saob tsî saos tsîrats ge nî ǃgôa! Sa ǀgūkhoebats ge nî ǀnam sats ǁkhāts xase!”

²⁰Ob ge ǂkhamkhoeba ǁîb ǃoa ge mî: Nēn hoana ta ge ge ǃkhōǀgaipe ti ǂkhamsisa xu. Tare-e ta ganupe tôasi hâ?

²¹Ob ge Jesuba ge mîǀî bi: ǀOasasets ga ī ǂgao-o, ǃgû î ūts hân hoana ǁamaxū, î ǁîna ǀgâsana mā, ots ge ǀhommi ǃnâ ǁuiba nî ūhâ, î hā, î sao te re.

²²Tsî ǂkhamkhoeb ge nē mîsa ǁnâu, ob ge ǃoa hâse ge bē, ǂgui xūnab ge ūhâ i amaga.

²³Ob ge Jesuba ǁîb ǁkhāǁkhāsabegu ǃoa ge mî: Amase ta ra mîba go, ǃgom i asa, ǃkhū hâ-i gaosib ǀhommi dib ǃnâ nî ǂgâsa.

²⁴ǃAruǀî ta ra mîba go: Supu i ge a, ǃnai-i nî nali di āros ǃnâ-ū ǃkharusa, ǃkhū hâ-i nî gaosib Elob dib ǃnâ ǂgâs xa.

²⁵Tsî ǁîb ǁkhāǁkhāsabegu ge ǁnâu, o gu ge kaise ǃhuri, tsî ge mî: Tari-e ǁnâi a ǃgâiǃō ǁkhā?

²⁶Ob ge Jesuba kōǀî tsî ge mîǀî gu: Khoen tawa i a īǁoasa xawe Elob tawan kom hoa xūna a īǁkhāo.

²⁷ǃNubaib ge Petruba ǃeream tsî ǁîb ǃoa ge mî: Mû, sige ge hoana xū, tsî satsa ge sao. Tare xū-e ge ǁnâi sige nî hōbasen?

²⁸Ob ge Jesuba ǁîgu ǃoa ge mî: Amase, ta ra mîba go, sago tita ge saogo ge ǁkhāti ǁkhawaǃnaes ǃnâ, Khoen Ôab ga ǁîb ǂkhaisib di trons ai ǂnû ǃnubai, disiǀgamǀa trondi ai ǂnû tsî disiǀgamǀa ǃhaodi Israelǁîn dide nî ǀgoraǃgâsa.

²⁹Tsî mâ-i hoa-i, omdi, ǃgâsagu, ǃgâsadi, ǁgûb, ǁgûs, taras, ǀgôan tsî ǃhanagu tsîna ga ti ǀons ǃaroma ǁnāxū-i, ǁî-i ge ǁîna kaidisi ǃnādi kōse nî ǃkhōǃoa, tsî ǀamo ûiba nî ǀumi.

³⁰Xawe ǂguin hîa ǂguron ge nî ǀuniga, tsî ǀunigan ge nî ǂguro.