Read Khoekhoegowab Mateub 2 Bible Online

Mateub 2 - Khoekhoegowab bible

Mateub 2

¹Tsî Jesub ge Betlehems Judeab ǃnâ ǁgoe ǃās ǃnâ, gao-aob Herodeb tsēdi ǃnâ ǃnae, mû, o gu ge gā-ai khoega aiǂoasa xu Jerusalems ǃoa ge hā,

²mî raǃâ: Mapab ǀase ǃnae hâ gao-aob Jodeǁîn diba hâ? ǀGamiros âba ge ge aiǂoas ǃnâ mû tsî go hā, ǀgoreǀî bi nîse.

³Tsî gao-aob Herodeb ge nēna ǁnâu, ob ge ge ǃhuri, tsî Jerusalems hoas ge ǁîb ǀkha ge ǃhuri.

⁴Tsîb ge ǀgapipristergu tsî xoaǂansabegu ǁaes digu hoaga ǀhaoǀhao tsî ge dîǃnâ gu, mapab nî Xristuba ǃnae ǃkhaisa.

⁵O gu ge ǁîb ǃoa ge mî: Betlehems Judeab ǃnâ ǁgoes ǃnâ, nēti kēbo-aob xa xoahe hâ amaga:

⁶“Tsî sas Betlehems Judab ǃhūb dis ge tātse ǂkhari tama hâ Judab gaosan ǃnâ; sasa xub ǂgaeǂgui-aob ti ǁaes Israelsa nî ǃû kaiba nîra ǀkhī amaga.”

⁷ǃNubaib ge Herodeba gā-aiga ǂganǂamse ǂgai tsî ǂōrisase ge dîǃgâ gu ǁaeba mâ ǁaes ge ǀgamirosa ǂhai ǃkhaisa;

⁸tsî Betlehems ǃoa sî gu tsî ge mî: ǃGûsī î ǂōrisase ôaǃnâ ǀgôaroba, tsî hō bi go kao, ǂhôa te hā, î ta ǁkhāti sī ǀgoreǀî bi.

⁹Tsî gao-aoba gu ge ǁnâu, o gu ge ge ǃgû, tsî mû, ǀgamiros aiǂoas ǃnâ gu ge mûs ge ge ai-aiba gu, ǀgôarob hâbas ge sī mâs kōse.

¹⁰Tsî ǀgamirosa gu ge mû, o gu ge ge ǃgâiaǂgao kai ǃgâiaǂgaob ǀkha.

¹¹Tsî oms ǃnâ gu ge ǂgâ, o gu ge ǀgôaroba Marias ǁîb îs ǀkha ge hō tsî ǁnāǁgoe tsî ǀgoreǀî bi tsî ǁuidi âga ǁkhowa-am tsî ǃhuniǀurib tsî wiroki tsî miren tsîn xa ge ǀkhae bi.

¹²Tsî gu ge ǁhapos ǃnâ elosi mîmāsa ge hō, Herodeb ǃoa gu oa tide ga; o gu ge ǀkhara daob ai ǁîgu ǃhūb ǃoa ge ǁaru.

¹³Tsî ǁaru gu ge, ob ge ǀhomǃgāb ǃKhūb diba Joseba ǁhapos ǃnâ ǂhai tsî ge mî: Khâi îts ǀgôaroba ū, ǁîb îs ǀkha, î ǃhū Egipteba ǃoa î ǁnāpa hâ, mîba tsi ta nîs kōse, Herodeb ǀgôarobab nî ǃgamse ra ôa xuige.

¹⁴Ob ge khâi tsî ǀgôaroba ǁîb îs ǀkha tsuxub ǃnâ ū tsî ge ǂgō Egipteba ǃoa,

¹⁵tsî ǁnāpa ge hâ Herodeb ǁōb kōse, kēbo-aob ge ǃKhūb xa mîn nî ǀoaǀoahese: “Egipteba xu ta ge ti ôaba ge ǂgai” ti ra mîba.

¹⁶Tsî Herodeb ge mû, gā-aigu xab gāhe hâsa, ob ge kaise ge ǁaixa tsî ǀgôaron Betlehems tsî ǁîs amǃgâgu hoagu ai hân, ǀgam kurikha xu ǁnās ǃnaga hân hoana sî tsî ge ǃgam kai, gā-aigu xab ge ǂōrisase ôaǃnâ ǁaeba ǃoa.

¹⁷ǃNubais ge kēbo-aob Jeremiab mîsa ge ǀoa:

¹⁸“Dommi ge Ramas ǃnâ ge ǁnâuhe, ǃgaeb tsî ās tsî ǀoatsi ǃgaexanǃnâb tsîna; Raxels ge ǀgôan âsa ra āba tsî ǁkhaeǂgaokaisen ǂgao tama hâ, hâ taman hâ amaga” ti ra mîba.

¹⁹Tsî Herodeb ge ǁō, mû, ob ge ǀhomǃgāb ǃKhūb diba Joseba ǁhapos ǃnâ ǂhai Egipteb ǃnâ,

²⁰tsî ge mî: Khâi î ǀgôaroba ǁîb îs ǀkha ū, î ǃgû Israelǁîn ǃhūba ǃoa, ǀgôarob ǀomsa gere ôan go ǁō xuige.

²¹Ob ge khâi, tsî ǀgôaroba ǁgûs ǀkha ū, tsî Israelǁîn ǃhūb ǃoa ge sī.

²²Tsî Arxelaub Judeab ǃnâ a gao-ao ǃkhaisab ge ǁnâu ǁîb îb ǃās ǃnâ, ob ge ǁnāpa sīsa ge ǃao; tsî ǁhapos ǃnâb ge elosi mîmāsa hō-o, ob ge Galileab di ǃhūǃân ǃoa ge sī.

²³Tsî sīb ge ob ge ǃās, Nasaret ti ra ǂgaihes ǃnâ ge ǁan, kēbo-aogu xa ge mîhes nî ǀoase: “Nasareǁîb tib nî ǂgaihesa.”