Read Khoekhoegowab Mateub 20 Bible Online

Mateub 20 - Khoekhoegowab bible

Mateub 20

¹Gaosib ǀhommi dib oms ǀhonkhoeb khami ī xui-ao, ǁgoas ǀkha ra ǂoaba, sîsenaogab nî ǁîb ǂauxûiǂûǃhanaba ǃgaebase.

²Tsî sîsenaogu ǀkhab ge ǀhûǀguio, ǀgui marisa tsēs ai, ob ge ǂauxûiǂûǃhanab ǃoa ge sî gu.

³Tsî ǃnonaǁî iri aib ge ǂoa, ob ge ǀkharaga ǁause gu ǁamaxūǃkhais ai mâ hîa ge mû.

⁴Ob ge ǁîgu ǃoa ge mî: Sago ona ti ǂauxûiǂûǃhanab ǃoa ǃgû, tsî ǂhanu i a khami ta nî mā go.

⁵O gu ge ge ǃgû. ǁKhawab ge ǃnaniǁî tsî khoeseǁî iri ai ǂoa, tsî ǁnās ǁkhās xase ge dī.

⁶Tsî disiǀguiǀaǁî iri aib ge ǂoa, ob ge ǀkharagu ǁause mâga hō, tsî ge mîǀî gu: Tarexa go hoaraga tsēsa nēpa ǁause ra mâma?

⁷O gu ge ǁîb ǃoa ge mî: Khoe-i xare-i kom ǃgae ge tamao. Ob ge ge mîǀî gu: Sago ona ti ǂauxûiǂûǃhanab ǃoa ǃgû, tsî ǂhanu i a khami go ge nî ǃkhōǃoa.

⁸Tsî ǃui i geo, ob ge ǀhonkhoeb ǂauxûiǂûǃhanab diba mûǂam-aob ǃoa ge mî: Sîsenaoga ǂgai, î ǁîgu di amǃnâsa mā gu, î tsoatsoa ǀunigaba xu ǂgurob kōse.

⁹O gu ge disiǀguiǀaǁî iri ai go ǃgaehega ge hā, tsî mâb hoab ge ǁîb marisa ge hō.

¹⁰Tsî ǂgurogu ge hā, o gu ge ge ǂâi, ǁnāgu ǂamai gu ga hōsa, xawe gu ge ǁîgu ona mâb hoaba ǀgui marisa ge hō.

¹¹Tsî ǁîsa gu ge hō, o gu ge ǀhonkhoeba ǀaraǂam,

¹²tsî ge mî: Nē ǀunigagu kom ǀgui iri ǀguiba goro sîseno, ots sige ǁîgu ǀkha go ǀguiǀgui, tsēs di ǃgommi tsî ǀgammi tsîkha go tanige.

¹³Ob ge ǃeream, tsî ǀguib ǃoa ge mî: Khoetse, ǂkhabase ta kom dī-ū tsi tamao, tita ǀkhats kha ǀgui maris ama ǀgui tama hâ?

¹⁴Sa marisa ū î ǃgû, nē ǀunigagu ona ta ra mā ǂgao sats khami.

¹⁵Mā-amhe tama ta ǁnâi hâ, tin ǀkha ǂgao ta ra khami dīsa? ǀNîsis mûs âtsa a ǂkhaba, tita a ǃgâi amaga?

¹⁶Nētin ge ǂgurona nî ǀuniga, tsî ǀunigan ge nî ǂguro; ǂguin ge ǂgaisana, xawe ǀoron a ǃkhōǂuibasensa xui-ao.

¹⁷Tsî Jesub ge Jerusalems ǃoa ǃapao, ob ge disiǀgamǀa ǁkhāǁkhāsabega daob ai ǀgui ǀkhāb ǁga ū tsî ǁîgu ǃoa ge mî:

¹⁸Mû, Jerusalems ǃoa ge ge ra ǃapa, tsîb ge Khoen Ôaba ǀgapipristergu tsî xoaǂansabegu tsîga nî māǁnâhe, tsî gu ge ǁîba ǁōb ǃoa nîra ǀgoraǃgâ;

¹⁹tsî gu ge ǁîba ǀūbena ǃharaxūhes, ǂnauhes tsî ǃgâuhes tsîn ǃoa nîra māǁnâ; tsî ǃnonaǁî tsēs aib ge nîra khâi.

²⁰ǃNubais ge Sebedeub ôakha îsa ǁîs di ôakha ǀkha ǁîb tawa hā tsî ǁnāǁgoe, tsî xū-e ge ǂgaoǀkhā bi.

²¹Ob ge ǁîs ǃoa ge mî: Tare-es ra ǂgao? Os ge ǁîb ǃoa ge mî: Mîmā î kha nē ti ôakha, ǀguiba sa amǀkhāb tawa tsî nauba sa ǁareǀkhāb tawa gaosib âts ǃnâ ǂnû.

²²Ob ge Jesuba ǃeream tsî ge mî: Mâ xū-e du ra ǂgao ǃkhaisa du a ǀū. ǁKhā kho a ǁnâi, tita nî ā ǀgabisa āsa, tsî tita nî ǁāǁnâ-ūhe ǁāǁnâs ǀkha ǁāǁnâhesa? O kha ge ǁîb ǃoa ge mî: ǁKhā khom a.

²³Ob ge ǁîkha ǃoa ge mî: Ā, ti ǀgabisa kho nî ā, tsî ǁāǁnâs tita nî ǁāǁnâ-ūhes ǀkha kho nî ǁāǁnâhe, xawe ti amǀkhāb tsî ti ǁareǀkhāb ai ǂnûs ge ti ǃnâ mâ tamasa, tsîs ge nî māhe ti Îb xa ǁîsa ǂhomibahe hâna.

²⁴Tsî disigu ge ǁnâuo, o gu ge ǁnā khoeǃgâgukha kaise ge ǀaraǂam.

²⁵Ob ge Jesuba ǁîga ǂgaihā tsî ge mî: ǂAn go kom ao, ǁaedi di danakhoegu ra gaosîsen, tsî kaikhoegu ǁîn ǂama ǀgaiba ūhâ ǃkhaisa.

²⁶Xawe ǁnāti i ge sago ǃnâ ī tide; sago ǃnâ ga kai ǂgaob ge nî hoagu di ǃgā.

²⁷Tsî sago ǃnâ ga ǂguro ǂgaob ge nî sago di ǃoabasabe.

²⁸Khoen Ôab ge hā tama, ǃoabaheb nîse, tsîb nî ǃoaba tsî ǁîb ûiba māse ǂguin di orehesa ǃoa.

²⁹Tsî gu ge Jerixosa xu ǂoa, os ge kai ǂnubisa ǁîba ge sao.

³⁰Tsî mû, ǀgam ǂgī hâkha, daob amǃgâ ge ǂnôa ikha ge ǁnâu, Jesub ra ǃkharusa, o kha ge ǂgaiǂui tsî ge mî: Sikhoma ǀkhomxa re, ǃKhūtse, Davib ôatse!

³¹Os ge ǂnubisa ǁîkha ge ǃgabe, î kha ǃnō; xawe kha ge ǁnās ǃgâ-ai ǂgai tsî ge mî: Sikhoma ǀkhomxa re, ǃKhūtse, Davib ôatse!

³²Ob ge Jesuba mâ tsî ǁîkha ǂgai tsî ge mî: Tare-e ta nî dība khosa kho ra ǂgao?

³³O kha ge ǁîb ǃoa ge mî: ǃKhūtse, î khom sikhom mûde khobahe re.

³⁴Ob ge Jesuba ǀkhomxa tsî ǁîkha mûde ge tsâǀkhā, o di ge mûdi âkha ǁnātimîsi mû, tsî kha ge ǁîba ge sao.