Read Khoekhoegowab Mateub 21 Bible Online

Mateub 21 - Khoekhoegowab bible

Mateub 21

¹Tsî Jerusalemsa gu ge ǀgū, tsî Betfages ǀKheraǃhommi tawa ge sī, ǃnubaib ge Jesuba ǀgam ǁkhāǁkhāsabekha sîǂui,

²tsî ǁîkha ǃoa ge mî: ǃGû, nē ǃāros sakho ǃoa ǃganu hâs ǁga, tsî ǁnātimîsi kho nî esels ǃgaemâihe hâs tsî ǂkhamroba ǁîs ǀkha hō; xore î tita ǃoa hā-ū ra.

³Tsî khoe-i ga xū-e mîo, o kho ge: ǃKhūb kom ǁîra ǂhâba hâo ti nî mî, o i ge ǁnātimîsi nî sî ra.

⁴Tsî nēn hoan ge ge ī, kēbo-aob xa ge mîhes nî ǀoase, nēti ra mîba:

⁵“Mî Sions ǀgôasa ǃoa: Mû, sa gao-aob ge sas ǃoa ra hā, tsamtsiǃnâse tsî ǃgomga ge tani esels di ǂkhamrob ai ǂnôase.”

⁶O kha ge ǁkhāǁkhāsabekha ǃgû, tsî Jesub go mîmā kha khami ge dī,

⁷tsî esels tsî ǂkhamrob tsîra ge hā-ū, tsî ǁîkha sarana ge ǁguiǃgâba bi, tsî ge ǂnûi bi.

⁸Tsî ǂguin ǂnubis din ge saran âna daob ai ge ǃā, tsî naun ge haidi ǂgonaga ǁhāǁnâ, tsî daob ai gere tsoro.

⁹Tsî ǂnubidi aiǃgû tsî ra saodi ge ǂgai tsî ge mî: Hosiana Davib ôaba! ǀKhaeheb hâ ǃgoaxaba ǃKhūb di ǀons ǃnâ! Hosiana ǀgapiseb ǃnâ!

¹⁰Tsî Jerusalems ǃnâb ge ǂgâ, os ge ǃās hoasa gon, tsî ge mî: Tariba kha nēba?

¹¹O di ge ǂnubide ge mî: Nēb kom Jesub, kēbo-aob Nasarets Galileab disa xu hâbao.

¹²Tsî Jesub ge tempeli Elob dib ǃnâ ǂgâ tsî tempeli ǃnâ ǁamaxū tsî gere ǁamaga ge ǃhaeǂui, tsî tāgu mariǂharugu-aon digu tsî ǂnabuna gere ǁamaxūn di ǂnû-aiǃnaodi tsînab ge ge ǂhāǁgui.

¹³Tsî ǁîn ǃoa ge mî: Xoahe i kom hâo: “Ti ommi ge ǀgore-om ti nî ǂgaihe” o du kom sado ǁîba ǃgamaon ābse go dīo.

¹⁴Tsî ǂgī hân tsî ǃhom hân tsîn ge ǁîb tawa tempeli ǃnâ sī, ob ge ǁîna gere ǂgauǂgau.

¹⁵Tsî ǀgapipristergu tsî xoaǂansabegu tsîgu ge mû, buruxan ǁîb gere dīn, tsî ǀgôan tempeli ǃnâ: “Hosiana Davib ôaba!” ti ra ǂgai tsî mîna, o gu ge kaise ǀara,

¹⁶tsî ǁîb ǃoa ge mî: ǁNâuts ra xare, nēn ra mîsa? Ob ge Jesuba ǁîgu ǃoa ge mî: A, tātsē ǁnâi khomai tama go hâ: “ǂKham ǀgôaron tsî dai ran tsîn di amsa xuts ge karesa ge ǂhomibasen” ti.

¹⁷Tsîb ge ǁîga ǁnāxū tsî ǃāsa xu Betanis ǁga ǃgû, tsî ǁnāpa ge ǁom.

¹⁸Tsî ǃnauǁgoaga, ǃās ǃoab gau hîab ge ge ǃâ.

¹⁹Tsî ǀnomahaisab ge daob amǃgâ mûo, ob ge ǁîs tawa sī, tsî ǀnî xū-e ǁîs ai hō tama ge i, ǂgonan ǀguin. Ob ge ǁîs ǃoa ge mî: ǃAruǀî i ge sasa xu tātsēs kōse ǂû-e ǀkhī tide. Os ge ǀnomahaisa ǁnātimîsi ge ǂnâ.

²⁰Tsî ǁkhāǁkhāsabegu ge mû, o gu ge buruxabahe tsî ge mî: Matis kha ǀnomahaisa ǁnātimîsi go ǂnâ?

²¹Ob ge Jesuba ǃeream tsî ǁîgu ǃoa ge mî: Amase ta ra mîba go, ǂgomsa go ga ū hâo tsî îganǀgē tama io, o go ga nē ǀnomahais ǀkha go īs ǀguisa dī tama i hâ, tsî go ga nē ǃhommi ǃoa mîo: Ūkhâisen î hurib ǃnâ aoǂgāsen! o i ge nî ī.

²²Tsî ǀgores ǃnâ go ga ǂgom hâse ǂgan xūn hoana go ge nî ǃkhōǃoa.

²³Tsî tempeli ǃnâb ge sī, o gu ge ǁkhāǁkhāb ra hîa, ǀgapipristergu tsî kaikhoegu ǁaes digu tsîga ǁîb ǃoa hā tsî ge mî: Mā ǀgaib ǃnâts ra nēna dī? Tsî tari-e satsa nē ǀgaiba ge mā?

²⁴Ob ge Jesuba ǃeream tsî ǁîgu ǃoa ge mî: Sago ona ta nî ǀgui mîsa dî; tsî mîba te go ga, o ta tita ona nî mîba go, mâ ǀgaiba xu ta nēna ra dīsa.

²⁵ǁĀǁnâs Johaneb disa, mapa xus ge hâ i? ǀHomma xusa? Khoena xusa? O gu ge ǁîgu ǃnâ ǂâiǂâisen tsî ge mî: Mî ge kao: ǀHomma xus, ob ge sage ǃoa nî mî: Tarexa go ǁnâi ǂgom bi tama hâ?

²⁶Tsî ge ga mî: Khoena xus, o ge ge ǂnubisa ra ǃao, hoan Johaneba kēbo-aose ūhâ amaga.

²⁷O gu ge Jesuba ǃeream tsî ge mî: ǀŪ ge ge a. Ob ge ǁîgu ǃoa ge mî: O ta tita ona mîba go tide, mâ ǀgaiba xu ta nēna ra dīsa.

²⁸Xawe mati go ra ǂâi? Khoeb ge ǀgam ǀgôakha ge ūhâ i, tsî ǂgurob tawa sī tsî ge mî: ǀGôatse, ǃgû, îts nētsē sîsen re ti ǂauxûiǂûǃhanab ǃnâ.

²⁹Ob ge ǃeream, tsî ge mî: ǂGao tama ta hâ; tsî nēs khaoǃgâb ge ǃhausen tsî ge ǃgû.

³⁰Tsî naub tawab ge sī, ob ge ǁnās ǁkhās xase ge mî. Ob ge ǁîba ǃeream, tsî ge mî: ǃGû ta nî ǃKhūtse, xaweb ge ǃgû tama ge i.

³¹Mâba kha nē ǀgamkha xa ǁgûb di ǂâisa ge dī? O gu ge ǁîb ǃoa ge mî: ǂGurob. Ob ge Jesuba ǁîgu ǃoa ge mî: Amase ta ra mîba go, mariǃkhōǃoa-aon tsî ǀai-aon tsîn ge sago nî aiǂgâba gaosib Elob dib ǃnâ.

³²Johaneb ge sago ǃoa ǂhanu-aisib daob ǃnâ ge hā, tsî go ge ǁîba ǂgom tama ge i; xawe mariǃkhōǃoa-aon tsî ǀai-aon tsîn ge ǁîba ge ǂgom; tsî go ge ǁnāsa mû, xawe go ge ega ǃhausen tama ge i, ǁîba go nî ǂgomse.

³³ǀNî ǂkhō-e ǁnâu re. Oms ǀhonkhoeb ge ge hâ i, ǂauxûiǂûǃhanaba ge ǂgāb, ǁîba ge ǁgâuǂnamib, ǀāǃnâǃoresa ǁîb ǃnâ ge khaoǂgāb, ǃûi-omma ǂnubi, tsî ǃhanaǀkhupi-aogu ai ǀkhupiǂui tsî ǃnū ǃhūb ǃoa ge dāǁnâba.

³⁴Tsî ǂûn di ǁaeb ge ǀgū, ob ge ǁîb ǃgāga ǃhanaǀkhupi-aoga ǃoa ge sî, ǁîb ǂûna gu nî ǃkhōǃoase.

³⁵O gu ge ǃhanaǀkhupi-aoga ǁîb ǃgāga ū tsî ǀguiba ǂnau, tsî nauba ǃgam, tsî ǃnonaǁîba ge ǀuiǁhom.

³⁶ǁKhawab ge ǀnî ǃgāga ǂguroga ǃnā hâse ge sî, tsî gu ge ǁîga ǁnās ǁkhās xase ge sîsenū.

³⁷Ob ge ǀunis ai ǁîb di ôaba ǁîgu ǃoa ge sî: Ti ôaba gu kom nî sâuo, ti mî tsî.

³⁸Xawe gu ge ǃhanaǀkhupi-aoga ǀgôaba gu ge mûo, ǁîgu ǃnâ ge mî: ǀUmi-aob kom ǁîbao; hā î ge ǁîba ǃgam, os ge ǀumis âba nî sage di.

³⁹O gu ge ǁîba ū, ǂauxûiǂûǃhanaba xu aoǂui tsî ge ǃgam bi.

⁴⁰Tsî ǂauxûiǂûǃhanab di ǀhonkhoeb ga ǁnâi hāo, matib nî ǁnā ǃhanaǀkhupi-aoga sîsenū?

⁴¹O gu ge ǁîb ǃoa ge mî: ǂKhabaseb ge ǂkhabaga nî hîkākā, tsî ǂauxûiǂûǃhanabab ge ǀkhara ǃhanaǀkhupi-aogu, ǁîba ǁîb ǂûna ǁaeb ai ra māgu ai nî ǀkhupiǂui.

⁴²Ob ge Jesuba ǁîgu ǃoa ge mî: Tātsē go kha khomai tama hâ xoadi ǃnâ: ǀUib, ǂnubi-aogu xa ge aoxūheb ge ǁhôas di danaǀui kai ǃkhaisa, ǃKhūba xus ge nēsa ge ī, tsîb ge a buruxa sada mûǁae.

⁴³ǁNā-amaga ta ra mîba go, gaosib Elob dib ge sado xu ūbēhe tsî ǀūbeǁaes, ǁîn ǂûna nî ūǀkhīsa māhe ǃkhaisa.

⁴⁴Tsî ǁnā ǀuib ai ga ǁnā-i, ǁî-i ge nî ǂkhūǂkhūhe, tsî ǁîba ga ǁnā-ai-i, ǁî-i ge nî ǂkhūǂkhūhe.

⁴⁵Tsî ǀgapipristergu tsî Farisegu tsîgu ge ǁîb ǂkhōde ǁnâu, o gu ge ge ǁnâuǃā, ǁîgu xab goro ǃhoa ǃkhaisa.

⁴⁶Tsî gu ge ge ôa-am, mati gu nî ǃkhō bisa, xawe gu ge ǂnubisa ge ǃao kēbo-aosen ge ū bi hâ i amaga.