Read Khoekhoegowab Mateub 22 Bible Online

Mateub 22 - Khoekhoegowab bible

Mateub 22

¹Tsîb ge Jesuba ǃeream tsî ǁkhawa ǂkhōdi ǃnâ ǁîgu ǃoa ǃhoa tsî ge mî:

²Gaosib ǀhommi dib ge ǂanǂansa gao-aob, ǁîb ôaba ǃgameǁâu-e ge ǂhomibab khami ī.

³Tsîb ge ǁîb ǃgāga ge sîǂûi, ǁkhausabena gu nî ǃgameǁâus ǃoa ǂgaihāse, xawen ge hā ǂgao tama ge i.

⁴ǁKhawab ge ǀnî ǃgāga sîǂûi tsî ge mî: ǁKhausabena mîba: Mû, ti tsēǃgâǂûs ge ǂhomihe hâ, ti gomagu tsî kaukauhesa tsâun tsîn ge go ǂāhe; tsî hoan ge ǂhomihe hâ, xuige hā ǃgameǁâusa ǃoa.

⁵Xawe gu ge ǁîsa ǃharaxū tsî ge bē, ǀguib ǁîb di ǃhanab ǃoa, tsî ǀnîb ǁîb di ǁamagus ǃoa,

⁶tsî naugu ge ǁîb ǃgāga ǃkhō, ǁgaisise sîsenū tsî ge ǃgam gu.

⁷Tsî gao-aob ge ǁnâu, ob ge ǁaixa, tsî ǁîb toro-aoga sîǂui tsî ǁnā ǃgam-aoga hîkākā, tsî ǁîgu ǃāsa ge ǃkhāǂhubi kai.

⁸ǃNubaib ge ǁîb ǃgāgu ǃoa ge mî: ǃGameǁâus ge ǁāǁāhe gosa, xawen ge ǁkhausabena anu tama hâ.

⁹Xuige ǃgû daogu ǀamdi ǃoa, î hō go ga ran hoana ǃgameǁâus ǃoa ǂgaihā.

¹⁰O gu ge ǃgāga ǂoa, tsî hō gu ran hoan, ǂkhaban tsî ǃgâin tsîna ge ǀhaoǀhao; ob ge ǃgameǁâus omma ǁkhausaben xa ge ǀoa.

¹¹Tsî gao-aob ge ǂgâ, ǁkhausabenab nî kōse, ob ge ǁnāpa khoeb, ǃgameǁâus saraba ǂgaeǂgāsen tamaba ge mû.

¹²Tsî ǁîb ǃoa ge mî: Ti khoetse, matits go nēpa ǂgâxa, ǃgameǁâus saraba ūhâ tama hâǃâ? Ob ge ge ǃnōǃari.

¹³ǃNubaib ge gao-aoba ǃgāgu ǃoa ge mî: ǃGaeǃnon bi ǂaira tsî ǃomkha, î ǃgâga hâ ǃkhaenab ǃnâ aoǂgā bi; ǁnāpa kha ge āb tsî ǁaninǁgûb tsîkha nî hâ.

¹⁴ǂGuin a ǂgaisana, xawe ǀoron a ǃkhōǂuibasensana xui-ao.

¹⁵ǃNubai gu ge Farisega ǃgû, tsî ǀapeǀhaosa ge dī, mati gu nî ǁîba mîs âb ǃnâ ǃkhōsa.

¹⁶Tsî gu ge ǁîgu ǁkhāǁkhāsabega Herodeǁîgu ǀkha sî tsî ge mî: ǁKhāǁkhā-aotse, ǂan ge ge a ama-aits a ǃkhaisa, tsî Elob daobats amab ǃnâ ra ǁkhāǁkhā tsî khoe-ets sau tama ǃkhaisa, khoen aisats kō tama amaga.

¹⁷Mîba ge ǁnâi re matits ra ǂâi: Mā-amhes hâ Kaesara ǁguibasa māsa? Mā-amhe tamas hâ?

¹⁸Ob ge Jesuba ǁîgu gāxaǃnâsiba ǂan, tsî ge mî: Tarexa go ra ǃâitsâ te, sa hînaxaǃnâgo?

¹⁹ǁGui-aimarisa ǁgau te. O gu ge ǁîba marisa ge ǁgau.

²⁰Ob ge ǁîgu ǃoa ge mî: Tarib dira īb tsî xoamâis tsîra?

²¹O gu ge ǁîb ǃoa ge mî: Kaesari dira komo. ǃNubaib ge ǁîgu ǃoa ge mî: Kaesara ǁnâi mā Kaesari di-e, tsî Eloba Elob di-e.

²²Tsî ǁnâu gu ge, o gu ge buru tsî ǁîba ǁnāxū, tsî ge bē.

²³ǁKhā tsēs ai gu ge Sadusegu, ǁō hâna xu khâi-i hâ tama ti ra mîga, ǁîb ǃoa hā tsî ǁîba dî

²⁴tsî ge mî: ǁKhāǁkhā-aotse, Moseb ra mî, khoeb ga ǁō, ǀgôanab ūhâ tama hîa, ob nî ǃgâsab âba ǁîb tarasa ǃgame, tsî nî ǃgâsaba suriba ǀkhī kaiba.

²⁵ǁNâi hû ǃgâsagu ge sida ǀkha ge hâ i. ǂGurob ge ǃgame tsî ge ǁō; tsî suribab ūhâ tama hîab ge tarasa ǃgâsaba ge ǁnā.

²⁶ǁNās ǁkhās xase ǀgamǁîb, tsî ǃnonaǁîb, hûǁîb kōse.

²⁷ǀUnis ai hoagu khaoǃgâs ge taras ona ge ǁō.

²⁸Khâis ǃnâ ǁnâi, tarib, hûgu dib di taras ases nî ī, hoagu ge ǁîsa ūhâ i amaga?

²⁹Ob ge Jesuba ǃeream tsî ǁîgu ǃoa ge mî: ǁHapu go ra, tsî go ǂan tama xoas tsî Elob ǀgaib ona.

³⁰Khâis ǃnân kom ǃgame tsî ǃgamehe tideo, tsîn kom Elob ǀhomǃgāgu ǀhommi ǃnâ hâgu khami nî īo.

³¹Tsî go kha ǁō hân di khâis ǂama Elob xa sadu ǃoa mîhe hâsa khomai tama hâ, nēti ra mîba:

³²“Tita ge Abrahammi di Elota, Isaki di Elota tsî Jakob di Elota.” Elob kom ǁō hân di Elo tamao, tsîb kom a ûitsaman dio.

³³Tsî ǂnubidi ge ǁnâu, on ge ǁîb ǁkhāǁkhās ǂama ge ǃhuri.

³⁴Tsî Farisegu ge ǁnâu, Sadusegab go ǂganamǃnâ ǃkhaisa, o gu ge ge ǀhaoǀhaosen.

³⁵Tsî ǁîgu di ǀguib, ǂhanuǂansabeb ge ǃâitsâ bi tsî ge mî:

³⁶ǁKhāǁkhā-aotse, mâ mîmā-e a hoan xa kai ǂhanub ǃnâ?

³⁷Ob ge Jesuba ǁîb ǃoa ge mî: “ǃKhūb sa Elobats ge nî ǀnam sa ǂgaob hoab ǀkha, tsî sa ǀoms hoas ǀkha, tsî sa ǂâis hoas ǀkha.”

³⁸ǁÎs ge ǂguro tsî hoan xa kai mîmāsa.

³⁹Tsî naus ǁîs ǀkha ǀguitikōs ge: “Sa ǀgūkhoebats ge nî ǀnam sats ǁkhāts khami.”

⁴⁰Nē ǀgam mîmāra ai gu ge ǂhanub hoab tsî kēbo-aogu ona ǂgāsen hâ.

⁴¹Tsî Farisegu ge ǀhao, ob ge Jesuba ǁîga dî

⁴²tsî ge mî: Mati go ra ǂâi Xristub xa? Tarib ôaba? O gu ge ǁîba ǃeream tsî ge mî: Davib Ôab komo.

⁴³Ob ge ǁîgu ǃoa ge mî: Matib ǁnâi Daviba Gagab ǃnâ ǃKhūb ti ǂgai bi, tsî ra mî:

⁴⁴“ǃKhūb ge ti ǃKhūb ǃoa ge mî: ǂNû ti amǀkhāb ǁôab tawa sa khākhoena ta nî ǂaiǃnaos sa ǂaira dis ase dīs kōse.”

⁴⁵Davib ǁîba ǃKhūb ti ra ǂgaio, matib kha ǁîb ôa?

⁴⁶Tsî khoe-i xare-i ge mî-i xawe-e ǃeream bi ǁoa ge i. Tsî khoe-i xare-i ge ǁkhāti ǁnā tsēsa xu ge hîtsâ tama i ǁîba xū-e dîsa.