Read Khoekhoegowab Mateub 23 Bible Online

Mateub 23 - Khoekhoegowab bible

Mateub 23

¹ǃNubaib ge Jesuba ǂnubidi tsî ǁîb ǁkhāǁkhāsabegu tsîn ǃoa ǃhoa,

²tsî ge mî: Moseb di ǂnû-aiǃnaos ai gu ge xoaǂansabegu tsî Farisegu tsîga ra ǂnû.

³Î du ǁnâi ǃkhōǀgaipe du nîse gu ga mîn hoana ǃkhōǀgaipe tsî dī, xawe ǁîgu sîsengu ǃoa tā dī; mî gu ra, xawe gu dī tama xuige.

⁴Tsî gu ge ǃgom taniǁoasa tanide ra ǃgae, tsî khoen ǃhōgu ai ra ǁgui, xawe gu ge ǁîde ǀkhunub âgu ǀkha tsâǀkhā ǂgao tama hâ.

⁵Tsî ǁîgu sîsengu hoaga gu ge ra dī, khoen xa gu nî mûhese; tsî gu ge ǁîgu ǂâiǂâiǂkhanirode ra ǂhabaǂhaba, tsî ǂomamǃgâgu ǁîgu saran diga ra kaikai.

⁶Tsî gu ge ǂûǁaedi ǃnâ aiǂnûs tsî sinagogegu ǃnâ ǂguro ǂnûǃkhaisa ra ǀnam;

⁷tsî ǁkhāti tawedesa ǁamaxūǃkhaidi tawa, tsî Rabitse, Rabitse ti ǂgaikaisensa.

⁸Xawe go ge sago Rabitse ti ǂgaikaisen tide. ǀGuib kom sago ǁkhāǁkhā-ao: Xristub, tsî go kom sago khoeǃgâguo.

⁹Tsî go ge khoeb xareba ǃhūbaib ai Abotse ti mî tide. ǀGuib komo a sago di Î, ǀhommi ǃnâ hâba.

¹⁰Tsî go ge ǁkhāti ǁKhāǁkhā-aotse ti ǂgaikaisen tide. ǀGuib kom a sago di ǁkhāǁkhā-ao: Xristuba.

¹¹Sago ǃnâ kaib ge nî sago di ǃoabasabe.

¹²ǁÎ-aitsama ga ǀgapiǀgapisen-i ge nî ǃgamǃgamhe, tsî ǁî-aitsama ga ǃgamǃgamsen-i nî ǀgapiǀgapihe xui-ao.

¹³Tsūba go xoaǂansabego tsî Farisego, sa hînaxaǃnâgo, khoen di ais aiǃâ gaosib ǀhommi diba ra ǂganam go. Sago kom ǂgâ tamao, tsî go kom ǂgâ kan ona ǂgâsa ra ǁkhae-o.

¹⁴Tsūba go xoaǂansabego tsî Farisego, sa hînaxaǃnâgo, ǃoataradi omde ra hapu go, ǂomxase ǀgores di īsib ǃnâ. ǁNā-amaga go ge ǃnāǂamsa ǀgoraǃgâ-e nîra hō.

¹⁵Tsūba go xoaǂansabego tsî Farisego, sa hînaxaǃnâgo, ǀgui ǂgomhoresa-e nî dīse hurib tsî ǃhūb tsîkha ra ǃgûmaǃnâ go; tsî ī i kao, o go ge ǁî-e sago ǃgâ-ai ǃhonarisase ǀamo ǀaeb ôase ra dī.

¹⁶Tsūba go ǂgī hân di daodaoba-aogo, hîa ra mîgo: Khoe-i ga tempeli tawa nūo, xū tama-i komo; xawe tempeli di ǃhuniǀurib tawa ga nū-i, ǁî-i ge a ǀhapixa.

¹⁷Gâre tsî ǂgī hâgo, mâba ǁnâi kai: ǃHuniǀuriba? ǃHuniǀuriba ra khai tempela?

¹⁸Tsî: Khoe-i ga altars tawa nūo, xū tama-i komo; xawe ǁguibas, ǁîs ai hâs tawa ga nū-i, ǁî-i ge a ǀhapixa.

¹⁹Gâre tsî ǂgī hâgo, mâ-e ǁnâi kai: ǁGuibasa? ǁGuibasa ra khai altarsa?

²⁰ǁNā-amaga altars tawa ra nū-i kom altars tsî ǁîs ai hân hoan tawa ra nū-eo.

²¹Tsî tempeli tawa ra nū-i kom ǁîb ǃnâ ǁan hâb tawa ra nū-eo.

²²Tsî ǀhommi tawa ra nū-i kom Elob trons tsî ǁîs ai ǂnôab tawa ra nū-eo.

²³Tsūba go xoaǂansabego tsî Farisego, sa hînaxaǃnâgo, mint-i, dil-i tsî komain-i ti ra ǂgaihe ǁhaon xa disiǁî-e ra mā, xawe ǃgomǃgomsan ǂhanub din, ǀgoras tsî ǀkhomxaǂgaosib tsî ǂgoms tsîna ra ǁnākhaogo. Nēna dī tsî i ge khoe-e nauna ǁnākhao tide.

²⁴ǂGī ǂgaeǂgui-aogo, ǀûitsibena ǁkhaeǂui tsî ǃnaina ra harago.

²⁵Tsūba go xoaǂansabego tsî Farisego, sa hînaxaǃnâgo, ǀgabis tsî ǃores tsîra di ǃaugasiba ra ǃanuǃanugo, xawe ǃnāb âra kom ǃnaris tsî ǂhanuoǃnâsib tsîn xa ǀoa hâo.

²⁶ǂGī Farisetse, aibe ǀgabis tsî ǃores tsîra di ǃnāba ǃanuǃanu îb ega ǃaugasib ona ǃanu.

²⁷Tsūba go xoaǂansabego tsî Farisego, sa hînaxaǃnâgo, ǃuriǃurihe hâ ǀhobaǀuigu, ǃauga îsase īgu, xawe ǃnāb ǃnâ ǁō hân di ǂkhōn tsî ǃanuoǃnâsib xa ǀoa hâgu khami īgo.

²⁸ǁNās ǁkhās khami go sago ona ǂhauǃnâse khoena ra ība, xawe go kom hînaxaǃnâsib tsî ǂhanuoǃnâsib xa ǀoa hâo.

²⁹Tsūba go xoaǂansabego tsî Farisego, sa hînaxaǃnâgo, kēbo-aogu di ǀhobade ǂnubikhâi, tsî ǂhauǃnân di ǂâiǂâiǀuide ani

³⁰tsî ra mîgo: Sige ga sige îgu di tsēdi ǃnâ hâ io, o ge ga kēbo-aogu di ǀaob ǃnâ ǁîgu ǀkha amǃnâxa tama hâ.

³¹ǁNāti go ge sago ǃoagu aitsama ra ǃkhō-am, kēbo-aoga ge ǃgamgu di ôago a ǃkhaisa.

³²Sago ona ǁnâi sago îgu di ǀguiroba ǀoaǀoa.

³³Sa ǀaogo, sa ǃgain ôago, mati go kha nî ǀamo kāǁōsiba ǁhâxū?

³⁴ǁNā-amaga mû, tita ge sadu ǃoa ra sî kēbo-aogu, gā-aigu tsî xoaǂansabegu tsîga. O du ge ǁîgu xa ǀnîga ǃgam tsî ǃgâu, ǀnîgu âga sinagogegu ǃnâ ǂnau, tsî ǃāsa xu ǃās ǃoa nî ǃgôaǃgon,

³⁵sadu ǂamab nî hāse hoa ǂhanu-ai ǀaob, ǃhūbaib ai gere ǂnâxūheb, ǂhauǃnâ Abeli di ǀaoba xu, Saxariab, Baraxiab ôab, tempeli tsî altars ǁaegu ge ǃgamheb di ǀaob kōse.

³⁶Amase ta ra mîba go, nēn hoan nē ǃhaos ǂama nîra hā ǃkhaisa.

³⁷Jerusalemse, Jerusalemse, sas kēbo-aoga ra ǃgams tsî sas ǃoa sîhe hâga ra ǀuiǁhomse, matikō ǃnāde ta ge sa ôana ǀhaoǀhao ǂgao hâ i, anis ǁîs ôarona ǁgabokha âs ǃnâ ra ǀhaoǀhao khami, xawe du ge ǂgao tama ge i.

³⁸Mû, oms âdo du ge ǀkhaiǃnâse nîra ǁnāxūbahe.

³⁹Mîba du ta ra xui-ao: Nēsisa xu du ge mû te tide, mî du nîs kōse: ǀKhaeheb hâ ǃgoaxaba, ǃKhūb di ǀons ǃnâ.