Read Khoekhoegowab Mateub 24 Bible Online

Mateub 24 - Khoekhoegowab bible

Mateub 24

¹Tsî Jesub ge ǂoa tsî tempela xu bēo, o gu ge ǁkhāǁkhāsabegu âba hā, tsî ǁîba tempeli di kuru-aiga ge ǁgau.

²Ob ge Jesuba ǁîgu ǃoa ge mî: Mû go ra nēn hoana? Amase ta ra mîba go: Nēpas kom ǀgui ǀuis tsîna naus ai ǁnāxūhe tideo, khôaǁnâhe tidesa.

³Tsî ǀKheraǃhommi aib ge ǂnû, o gu ge ǁkhāǁkhāsabega ǁîb ǃoa ǀguri hā tsî ge mî: Mîba sige re, mâǁaen nēna nîra īsa, tsî mâs a saos sa hās tsî nē hâ ǁaeb ǀams disa ǃkhaisa.

⁴Ob ge Jesuba ǃeream tsî ǁîgu ǃoa ge mî: Mûbasen re, î-i tā khoe-e ǂgaeǂhapu go.

⁵ǂGuigu kom ti ǀons ǃnâ hā tsî nîra mîo: Xristuta ge tita ti; tsî gu ge ǂguina nîra ǂgaeǂhapu.

⁶Tsî torogu tsî torogomgu xa go nîra ǁnâu. Kō, î go tā ǃao re. Nēn hoan aibe nîra ī, xawen ge ganupe ǀam tama hâ.

⁷Nē ǁaes ge nau ǁaes ǃoagu tsî nē gaosis ge nau gaosis ǃoagu nîra khâima tsî ǂhī ra ǀaesenaigu, ǃâtsūǀkhāgu tsî ǃhūǂgubigu tsîgu ǃkharaga ǃkhaidi ǃnâ nîra ī xui-ao.

⁸Tsî nēn hoan ge tsûn di tsoatsoas ǀguise nîra ī.

⁹ǃNubain ge sago tsūǀkhāb ǃnâ nîra māǁnâ, ǃgam tsî go ge hoa ǁaedi xa nîra ǁkhanhe, ti ǀons ǃaroma.

¹⁰Tsî ǁnāǃnubain ge ǂguina nîra ǁgonǁgonǃnâhe, māǁnâgu tsî nîra ǁkhangu.

¹¹Tsî ǂgui ǂkhaba kēbo-aogu ge khâi tsî nîra ǂguina ǂgaeǂhapu.

¹²Tsî ǂkhabasib nî ǂguiǂguisen amagab ge ǂguin di ǀnamma nîra ǃkhai.

¹³Xawe ǀunis kōse ga mâhō-i ge nîra ǃgâiǃō.

¹⁴Tsî ǃgâiǂhôas gaosib dis ge ǃhūbaib hoab ai nîra aoǁnâhe, hoa ǁaedi mîdansa ǃoa; tsî ǁnāǃnubais ge ǀamsa nîra hā.

¹⁵ǁGaidīb hîǀhurus dib, kēbo-aob Danieli ge ǁîb xa ǃhoaba du ga ǁnâi ǃanu ǃkhais tawa mûmâo, (khomai ra-e a-i ǃgaoǃgâ!):

¹⁶ǃNubai an Judeab ǃnâ hâna ǃhommi ǃoa ǁhai.

¹⁷Tsî oms ǂamǃnâb ai ga hâ-e, a-i tā ǁgôaxa, xū-e-i nî omsa xu ūbēse.

¹⁸Tsî ǃhanab tawa ga hâ-e, a-i tā khaosǀkhābǀî oa, ǁî-i sarana nî ūbēse.

¹⁹Tsî tsūba di ǀgamǀkhā hâdi tsî daisi radi tsîde ǁnā tsēdi ǃnâ.

²⁰ǀGore ǁnâi re, îs ǃhūs âdo tā saob tsî sâtsēs ai ī.

²¹ǁNāǃnubai gu ge kai tsūǀkhāga nîra hâ, ǃhūbaib di tsoatsoasa xu nēsis kōse ge ī tama hâ iga, tsî ǁkhāti ī tidega.

²²Tsî ǁnā tsēdi ga ǃnubuǃnubuhe tama io, o i ge ǀgui khoe-i xare-e ga ǃgâiǃō tama i hâ, xawe ǃkhōǂuibasensan ǃaroma di ge nîra ǃnubuǃnubuhe.

²³ǁNāǃnubai i ga khoe-e sadu ǃoa mîo: Mû, nēpas kas, naupas kas hoasab ge Xristuba hâ, o du ge tā nî ǂgom.

²⁴ǂHumi Xristugu tsî ǂhumi kēbo-aogu tsîgu kom khâi tsî kai saodi tsî buruxa xūn tsîna nîra dīo, ī ǁkhā i kao, on ǃkhōǂuisaben tsîna nî ǂgaeǂhapuhes kōse.

²⁵Kō, aimîba du ta go.

²⁶Sadu ǃoan ga ǁnâi mîo: Mû ǃgaroǃhūb ǃnâb hâ, o du ge ǂoa tide. Mû, ǃnā-omdi ǃnâb hâ, o du ge ǂgom tide.

²⁷Napab, aiǂoasa xu ǀkhī tsî huriǂoas kōse ra ǃnâb khamis hās Khoen Ôab disa nîra ī xui-ao.

²⁸ǁŌ hâ xū-i hâpa, ǁnāpan kom ǃariǃkhāna ra ǀhao o.

²⁹ǁNātimîsi, tsūǀkhāb ǁnā tsēdi dib khaoǃgâs ge soresa nîra ǃkhae, ǁkhâb ge ǁîb ǂkhaiba mā tide, ǀgamirodi ge ǀhomma xu nîra ǁnā tsî ǀgaigu ǀhommi digu ge nîra gongonhe.

³⁰ǁNāǃnubais ge saos Khoen Ôab disa ǀhommi ai nîra ǂhai, tsî ǁnāǃnubai di ge ǃhūbaib di ǃhaodi hoade nîra ā, tsî Khoen Ôaba ǀhommi di ǀnanudi ai tsî kai ǀgaib tsî ǂkhaisib ǀkha ǃgoaxase nîra mû.

³¹Tsîb ge ǀhomǃgāgu âba kai dom-e ūhâ ǀgapadas ǀkha nîra sîǂui; o gu ge ǁîb di ǃkhōǂuibasensana nîra ǀhaoǀhao, haka ǂoade xu, ǀhommi di nē ǀamsa xu naus kōse.

³²Î du ǀnomahais tawa nē ǂkhō-e ǁkhāǁkhāsen: ǁÎs di ǂgonagu ga ǀom tsî ǂnarega hō, o du ge a ǂan, ǁkhunab ra ǀgū ǃkhaisa.

³³ǁNāti ǁkhāti sado ǂan re, nēn hoana du ga mûo, ǀgūseb dao-ams aiǃâ hâ ǃkhaisa.

³⁴Amase ta ra mîba du: Nē ǃhaos ge ǃgû-ī tide, nēn hoan nîra īs kōse.

³⁵ǀHommi tsî ǃhūbaib tsîkha ge nîra ǃgû-ī, xawe ti mîdi kom tātsē ǃgû-ī tideo.

³⁶Xawe ǁnā tsēs tsî iri tsîra xa i ge khoe-i xare-e ǂan tama, tsî ǀhomǃgāgu ǀhommi digu xawe gu a ǀū; ti Îb ǀguib a ǂan.

³⁷Tsî Noaxi di tsēdi ǃnâ i ge ī khami, ǁnāti i ge ǁkhāti Khoen Ôab di hās ǃnâ nîra ī.

³⁸Tsî kai ǁgammi di tsēdi ǃnâ i ge ī khami, ǂû tsî ra āǃâ, ǃgame tsî ǃgameb ǃoa ra māǂuiǃâ, Noaxi ge arki ǃnâ ǂgâ tsēs kōse.

³⁹Tsîn ge mûǂan tama i, kai ǁgammi hā tsî hoana ge ūbēs kōse; ǁnāti i ge ǁkhāti nîra ī Khoen Ôab di hās ǃnâ.

⁴⁰ǃNubai kha ge ǀgamkha ǃhanab ǃnâ nîra hâ; ǀguib ge nîra ǃkhōǃoahe, tsî naub ge nîra ǁnāxūhe.

⁴¹ǀGamra ge ǁkhamis ai nîra ǁkhami; ǀguis ge nîra ǃkhōǃoahe tsî naus ge nîra ǁnāxūhe.

⁴²ǂKhaikari ǁnâi hâ, mâ iri aib nî sadu ǃKhūba hā ǃkhaisa du a ǀū xuige.

⁴³Î du nēsa ǂan, oms ǀhonkhoeb ga ǂan io, mâ tsuxuǃûiǁaeb aib nî ǃnari-aoba hāsa, ob ge ga ǃûi tsî oms âba khôaǂgâǃnâ kai tama i hâ.

⁴⁴ǁNā-amaga, sadu ona ǀhami hâ; ǂâi tama du hâ iri aib Khoen Ôaba nîra hā xuige.

⁴⁵Mâba ǁnâi ǂgomǂgomsa tsî gā-ai ǃgāb, ǁîb ǀhonkhoeb ge oms din ǂama mâiba, ǁaeb aib nî ǁîna ǂûmāse?

⁴⁶ǃGâiǃōb ge ǁnā ǃgāb, ǀhonkhoeb âb ga hāo, ǁnāti ra dīse nî hōheba.

⁴⁷Amase ta ra mîba du, ūb hâ xūn hoan ǂamab nîra mâi bi ǃkhaisa.

⁴⁸Xawe ǁnā ǂkhaba ǃgāb ga ǁîb ǂgaob ǃnâ mîo: Ti ǃKhūb hās kom go ǀhaweo;

⁴⁹tsîb ga tsoatsoa, ǀhōsaǃgāgu âba ǂnausa, tsî ǃkhariǃkhō hâgu ǀkha ǂû tsî āsa,

⁵⁰ob ge ǀhonkhoeb ǁnā ǃgāb diba, ǂan tamab hâ tsēs tsî ǀūb a-iri ai hā,

⁵¹tsî ǁîba ǂkhūǂkhū, tsî amǃnâs âba hînaxaǃnân ǀkha nî mā bi; ǁnāpa kha ge āb tsî ǁaninǁgûb tsîkha nîra hâ.