Read Khoekhoegowab Mateub 25 Bible Online

Mateub 25 - Khoekhoegowab bible

Mateub 25

¹ǃNubaib ge gaosib ǀhommi diba disi ǂkhamkhoedi khami nîra ī, ǁîdi ǃamamǀaede ū tsî dî-amaoba ge ǃgûǃoade.

²Tsî korodi âdi ge ge gā-ai i, tsî korodi âdi ge ge gâre i.

³Tsî gâredi ge ǁîdi ǃamamǀaede ū, tsî oli-e ǁîdi ǀkha ū tama ge i.

⁴Xawe gā-aidi ge ǁîdi ǃamamǀaedi ǀkha oli-e ǁîdi xapadi ǃnâ ge ū.

⁵Tsî dî-amaob ge ǀhaweo, o di ge hoade ǂomhî tsî ge ǁom.

⁶Tsî tsuxuǃgâb aib ge ǂgaiba ge hā: Mû, dî-amaob ge ǃgoaxa; ǂoa î so ǃgûǃoa bi, ti.

⁷ǃNubai di ge ǁnā ǂkhamkhoedi hoade khâi tsî ǃamamǀaedi âde ge ǂhomi.

⁸O di ge gârede gā-aidi ǃoa ge mî: Saso oli-i xa mā se re, sise ǃamamǀaedi ra ǀari xuige.

⁹O di ge gā-aide ǃeream tsî ge mî: ǀNîsi i ge sise tsî saso tsîn ǃaroma ǂâu tide. ǃGû ǁamaxū-aon ǃoa, î so sī ǁamabasen re.

¹⁰Tsî ǁama nîse di ǃgûgau hîab ge dî-amaoba ge hā; o di ge ǂhomisen hâde ǁîb ǀkha ge ǂgâ ǃgameǁâus ǃoa, tsîs ge dao-amsa ge ǂganamhe.

¹¹Ega di ge nau ǂkhamkhoedi ona hā tsî ge mî: ǃKhūtse, ǃKhūtse, ǁkhowa-amba se re.

¹²Xaweb ge ǃeream tsî ge mî: Amase ta ra mîba so, ǂanso tama ta hâ!

¹³ǂKhaikari ǁnâi hâ re; tsēs tsî iri Khoen Ôab nî hāǃnâba du a ǀū xuige.

¹⁴Khoeb, ǃhūba ge doexūb khami i kom īo, tsî ǁîb ǃgāga ǂgai tsî ǁîb xūna ǁîga ge ǁnākhaobaba.

¹⁵Tsîb ge ǀguiba koro talende ge mā, tsî nauba ǀgamra, tsî ǃnonaǁîba ǀguisa, mâb hoaba ǁîb a ǁkhāba ǀgausa ǃoa, tsîb ge ǁnātimîsi ge dāǁnâ.

¹⁶Ob ge ǁnāb, koro talende ge māheba, ǃgû tsî ǁîdi ǀkha ǁamagu tsî ǀnî koro talende ge hō.

¹⁷ǁNās ǁkhās xaseb ge ǁnāb, ǀgamra ge māheba ǀnî ǀgamra ge hō.

¹⁸Xawe ǁnāb, ǀguisa ge māheb ge ǃgû tsî ǃhūb ǃnâ ge khaoǂgā si, tsî ǁnāti ǁîb ǀhonkhoeb di marisa ge sâu.

¹⁹ǂOmxa ǁaeba ǁnās khaoǃgâb ge ǀhonkhoeb ǁnā ǃgāgu diba hā tsî ǃereamsa ge ǂgan.

²⁰Ob ge ǁnāb koro talende ge ǃkhōǃoaba hā, tsî ǀnî koro talende ūhā tsî ge mî: ǃKhūtse koro talendets ge tita ge mā; kō, ǀnî koro talende ta ge ǁîdi ǀkha ge ǃoaǂui.

²¹Ob ge ǀhonkhoeb âba ǁîb ǃoa ge mî: Aio, ǃgâi tsî îǂhôa ǃgātse, ǀoron ǂamats ge ǂgomǂgomsa i, o ta ǂguin ǂama nî mâi tsi: ǂGâ sa ǃKhūb di ǃgâiaǂgaob ǃnâ.

²²Ob ge ǁnāb ǀgam talendra ge ǃkhōǃoab ona hā, tsî ǁîb ǃoa ge mî: ǃKhūtse ǀgam talendrats ge tita ge mā; kō, ǀnî ǀgam talendra ta ge ǁîra ǀkha ge ǃoaǂui.

²³Ob ge ǀhonkhoeb âba ǁîb ǃoa ge mî: Aio, ǃgâi tsî îǂhôa ǃgātse, ǀoron ǂamats ge ǂgomǂgomsa i, o ta ǂguin ǂama nî mâi tsi: ǂGâ sa ǃKhūb di ǃgâiaǂgaob ǃnâ.

²⁴Ob ge ǁnāb, ǀgui talensa ge ǃkhōǃoab ona hā tsî ge mî: ǃKhūtse ǂan tsi ta komo ǁkhō khoets a ǃkhaisao; tsoro tamats hâpats kom ra ǃgao-o, tsî tsoroxū tamats hâpats kom ra ǀhaoǀhao-o.

²⁵O ta ge ǃao, tsî ǃgû tsî talends âtsa ǃhūb ǃnâ ge sâu. Kō, nēts ge sa-e ūhâ.

²⁶Ob ge ǀhonkhoeb âba ǃeream tsî ǁîb ǃoa ge mî: ǂKhaba tsî ǀopesa ǃgātse, ǂants ge ge i, tsoro tama ta hâpa ta ra ǃgao, tsî tsoroxū tama ta hâpa ta ra ǀhaoǀhao ǃkhaisa:

²⁷Ots ga ǁnâi ti marisa mariǂharugu-aoga mā hâ, tsî hā ta kao, o ta ga ti-e hōǃnâs ǀkha hō hâ.

²⁸ǁNâi ǁîba xu ūbē talendsa î disi talende ūhâba mā si.

²⁹Ūhâ-i hoa-i, ǁnā-i ge nî māhe, î-i ǃnāǂamse ūhâ; xawe ūhâ tama hâ-i hoa-i ge, ū-i hâ-i ona nî ūxūhe xuige.

³⁰Î nē ǁkhoatsama ǃgāba aoǂui, ǃgâga hâ ǃkhaenab ǃoa, āb tsî ǁaninǁgûb tsîkha hâǃnâba.

³¹Tsî Khoen Ôab ga ǁîb ǂkhaisib tsî ǁîb di ǃanu ǀhomǃgāgu hoagu ǀkha hā, ǃnubaib ge ǁîb ǂkhaisib di trons ai nîra ǂnû;

³²tsî di ge hoa ǁaede ǁîb aiǃâ nîra ǀhaoǀhaohe tsîb ge ǁîna nîra ǀgoraǃā ǃûi-aob ra gūna pirina xu ǀgoraǃā khami;

³³tsîb ge nîra mâi: Gūna ǁîb amǀkhāb ai, tsî pirina ǁîb ǁareǀkhāb ai.

³⁴ǃNubaib ge gao-aoba ǁîb amǀkhāb ai hân ǃoa nîra mî: Hā ti Îb xa ǀkhaehe hâdo, î du ǃhūbaib di ǃgaoǃgaohes aiǃâ du ǂhomibahe hā gaosiba ǀumi.

³⁵ǃÂ ta geo, o du kom gere ǂûmā teo; ǁgâ ta geo, o du kom gere āsi teo; ǃhaokhoe ta ge io, o du kom gere ǃkhōǂgā teo.

³⁶ǀŌǀkhā ta ge io, o du kom gere ana teo; ǀaesen ta ge hâ io, o du kom gere sari teo; ǃkhō-oms ǃnâ ta ge hâ io, o du kom gere sari teo.

³⁷ǃNubain ge ǁnā ǂhanu-aina ǃeream bi tsî nîra mî: ǃKhūtse mâ ǁae da kha satsa ǃâ hâse mû tsî gere ǂûmā tsi, tsî ǁgâ hâse tsî gere āsi tsi?

³⁸Tsî mâ ǁae da kha ǃhaokhoese mû tsî gere ǃkhōǂgā tsi, tsî ǀōǀkhā hâse tsî gere ana tsi?

³⁹Tsî mâ ǁae da kha ǀaesen hâse tsî ǃkhō-oms ǃnâ hâse mû, tsî gere sari tsi?

⁴⁰Ob ge gao-aoba ǃeream, tsî ǁîn ǃoa nîra mî: Amase ta ra mîba du, ǀgui-i nē ti ǃgâsan xa ǂkhari-e du ga dība hâ-i hoa-e du kom tita ge dībao.

⁴¹ǃNubaib ge ǁkhāti ǁareǀkhāb din ǃoa nîra mî: Tita xu bē, sa ǀâxarexuhe hâdo, ǀamoǀaeb ǁgâuab tsî ǁîb ǃgāga ǂhomibahe hâba ǃoa.

⁴²ǃÂ ta geo, o du kom ge ǂûmā te tama io, ǁgâ ta geo, o du kom āsi te tama ge io.

⁴³ǃHaokhoe ta ge io, o du kom ǃkhōǂgā te tama ge io, ǀōǀkhā ta ge io, o du kom ana te tama ge io, ǀaesen tsî ǃkhō-oms ǃnâ ta ge hâ io, o du kom ge sari te tama io.

⁴⁴ǃNubain ge ǁîn ona ǃeream tsî nîra mî: ǃKhūtse mâ ǁae da kha satsa ǃâ hâse, tsî ǁgâ hâse tsî ǃhaokhoese, tsî ǀōǀkhā hâse, tsî ǀaesen hâse, tsî ǃkhō-oms ǃnâ hâse mû, tsî ge ǃoaba tsi tama i?

⁴⁵ǃNubaib ge ǁîna ǃeream tsî nîra mî: Amase ta ra mîba du, ǀgui-i nē hoan xa ǂkharin di-e du ga dība tama hâ-i hoa-e du kom tita dība tama ge io.

⁴⁶On ge ǁîna ǀamo ǁkharab ǃoa nîra ǃgû, xawe ǂhanu-aina ǀamo ûib ǃoa.