Read Khoekhoegowab Mateub 26 Bible Online

Mateub 26 - Khoekhoegowab bible

Mateub 26

¹Tsî i ge ge ī, Jesub ge nē mîdi hoade ǃhoatoao, ob ge ǁîb ǁkhāǁkhāsabegu ǃoa ge mî:

²ǂAn go ge a, ǀgam tsēra khaoǃgâb Pasxaba nî hâsa, ob ge Khoen Ôaba ǃgâuhe nîse nîra māǁnâhe.

³ǃNubai gu ge ǀgapipristergu, xoaǂansabegu tsî ǁaes di kaigu tsîga ǀgapipristeri, Kajafab ti ra ǂgaiheb oms ǃnâ ge ǀhao.

⁴Tsî ge ǀapeǀape, Jesuba gu nî gāxaǃnâsib ǀkha ǃkhō tsî ǃgamse.

⁵Xawe gu ge ge mî: Î ge ǁîsa tā kaitsēs ai dī, îb tā ǂkhupiba ǁaes ǃnâ hā.

⁶Tsî Jesub, Betanis tawa Simonni, ǃomamaxab di oms ǃnâ hâ

⁷hîas ge tarasa, alabas xaparos, nardub ǃgâihamxū-i hâǃnâs ǀkha ǁîb ǃoa hā, tsî tāb tawab ǂnôa hîa ǁîb danas ai ge ǂnâǂui.

⁸Tsî ǁîb ǁkhāǁkhāsabegu ge mûo, o gu ge ǀara tsî ge mî: Tarebe hîǀhuru-e kha nē-e?

⁹Nē ǃgâihamxū-i kom ga ǀgapiǀgause ǁamaxūhe tsî mari-e ga ǀgâsana māhe hâo.

¹⁰Tsî Jesub ge ǂan, ob ge ǁîgu ǃoa ge mî: Tarexa go ǁnâi nē tarasa ra ǂhani. ǃGâi sîsennas kom tita go dībao.

¹¹ǀGâsana du hūkaǀgui sadu ǀkha ūhâ, xawe tita du kom hūkaǀgui ūhâ tamao.

¹²Nē ǃgâihamxūbas go ti soros ai goro ǂnâ khaisas kom ǁîsa ti ǁkhōhes di aiǂhomis ase goro dīo.

¹³Amase, ta ra mîba du, mapa ǀguis ga nē ǃgâiǂhôasa aoǁnâhe ǃhūbaib hoab ai, ǁnāpa i nîra ǁkhāti ǁîs goro dīs xa ǃhoahe, ǁîs di ǂâiǂâisensa ǃoasa.

¹⁴ǃNubaib ge ǀguib disiǀgamǀagu dib, Judab, Iskarioǁîb ti ra ǂgaiheba ǀgapipristergu ǃoa ǃgû

¹⁵tsî ge mî: Tare-e go nî mā te, ǁîba ta ga māǁnâ go-o? O gu ge ǁîba ǃnonadisi maride ge ǁgui-aiǃâ.

¹⁶Ob ge ǁnā ǁaeba xu ǃgâi ga ǁaeba ge ôa, māǁnâ bib nîse.

¹⁷Tsî ǂguro tsēs ǀkhuruǀkhuruhe tama peregu dis ai gu ge ǁkhāǁkhāsabega Jesub ǃoa hā, tsî ǁîb ǃoa ge mî: Mapa ge nî ǁāǁāba tsi Pasxaǂûsa, tits ra ǂgao?

¹⁸Ob ge ge mî: ǃGû ǃāsa ǃoa, î ǂanǂansab tawa sī, î mîba bi: ǁKhāǁkhā-aob ra mî, ti ǁaeb ge go ǀgū, o ta ge sats tawa nî Pasxaba dī, ti ǁkhāǁkhāsabegu ǀkha.

¹⁹O gu ge ǁkhāǁkhāsabega Jesub go mîmā gu khami ge dī, tsî Pasxaba ge ǂhomi.

²⁰Tsî ǃui-i geo, ob ge disiǀgamǀagu ǀkha ge ǂnû.

²¹Tsîb ge ǂû gu ra hîa ge mî: Amase ta ra mîba go, ǀguib sago dib ge nîra ǀapexū te.

²²O gu ge kaise ǃoa, tsî mâb âgu hoaba ǁîb ǃoa ge mîtsoatsoa: Tita kha ǁî ta, ǃKhūtse?

²³Ob ge ǃeream tsî ge mî: Tita ǀkha ǃomma ǃores ǃnâ ra ǂgāb, ǁîb ge ǁnāb tita nîra ǀapexūba.

²⁴Khoen Ôab ge ǁîb xa xoahe hâ khami ra ǃgû, xawe tsūba bi ǁnā khoeb, ǁîb xab Khoen Ôaba nîra ǀapexūheba. ǁNā khoeb ge ga ǃgâibahe, tātsēb ga ǃnae tama hâo.

²⁵Ob ge Judab, ǁîba nîra ǀapexūba ǃeream tsî ge mî: Tita kha ǁî ta, Rabitse? Ob ge ǁîb ǃoa ge mî: Sats go mî.

²⁶Tsî ǂû gu ra hîab ge Jesuba pereba ū, ǀkhae, khôa bi, ǁîb ǁkhāǁkhāsabega mā tsî ge mî: Ū î go ǂû, nēs ge ti sorosa.

²⁷Tsî ǀgabisa ū tsîb ge gangan, ǁîga mā tsî ge mî: Hoago ǁîs ǃnâ ā;

²⁸nēb ge ti ǀaob ǀasa ǃgaeǀhaos dib, ǂguin ǃaroma ǁoren ǀûbasa ǃoa ra ǂnâxūheba.

²⁹Tsî ta ra mîba go, nēsisa xu ta tātsē ǂauxûiǂûhais di ǂû-i xa ā tidesa, ǀasase ta nî ǁî-e sago ǀkha gaosib, ti Îb dib ǃnâ ā tsēs kōse.

³⁰Tsî gangantsanasa ǁnae, tsî gu ge ǀKheraǃhommi ǃoa ge ǃgû.

³¹ǃNubaib ge Jesuba ǁîgu ǃoa ge mî: Sago hoago ge nē tsuxub ǃnâ tita tawa nî ǁgonǁgonǃnâsen, xoahe hâ xui-ao: ǃÛi-aoba ta nîra ǂnau, on ge gūna nîra ǀgaruǀgaruhe.

³²Xawe ti khâis khaoǃgâ ta nîra ai-aiba go Galileab ǃoa.

³³Ob ge Petruba ǃeream, tsî ǁîb ǃoa ge mî: Tsî gu ga hoaga sats tawa ǁgonǁgonǃnâsen, xawe ta ge tita ǁgonǁgonǃnâsen tide.

³⁴Ob ge Jesuba ǁîb ǃoa ge mî: Amase ta ra mîba tsi, nē tsuxub ǁkhāb ǃnâts kom anib di ās aiǃâ ǃnona ǃnāde tita nîra ǀūxūo.

³⁵Ob ge Petruba ǁîb ǃoa ge mî: Tsî sats ǀkha ta ga ǁō, xawe ta ge tātsē ǀūxū tsi tide. ǁNās ǁkhās xase gu ge nau ǁkhāǁkhāsabegu hoagu ona ge mî.

³⁶ǃNubaib ge Jesuba ǁîgu ǀkha Getsemane ti ra ǂgaihe ǃhanab tawa sī tsî ǁkhāǁkhāsabegu ǃoa ge mî: Nēpa ǂnû re, ǁnāpa ta nî sī ǀgores kōse.

³⁷Ob ge Petrub tsî ǀgam Sebedeub ôakha ūsao, tsî ge ǃoa tsî ǀkhūtsoatsoa.

³⁸ǃNubaib ge ǁîgu ǃoa ge mî: Ti ǀoms ge ǃoa hâ ǁōb kōse; hâ nēpa, î tita ǀkha ǂkhaikari hâ!

³⁹Tsî ǂkhariroseb ge ǃgûo, ob ge ǁîb ais ai ǁnā, tsî ǀgore tsî ge mî: Abotse, īǁkhā i kao, as nē ǀgabisa tita ǃgû-īǀkhā re; xawe tita ra ǂgao khami tama, tsî sats ra ǂgao khami.

⁴⁰Ob ge ǁkhāǁkhāsabegu ǃoa hā, tsî ǁom hâse ge hō gu tsî Petrub ǃoa ge mî: ǀGui iri xaweba go ǁnâi tita ǀkha ǂkhaikari a hâ ǁoa?

⁴¹ǂKhaikari hâ î ǀgore re, î go tā ǃâitsâb ǃnâ ǂgâ; gagas a māsenxa, xawes ge ǁgansa a ǂkhabusa.

⁴²ǁKhawab ge ǀgamǁî ǃnās ai ǀgoreǃgû tsî ge mî: Abotse, īǁoa i kao, nē ǀgabis nî ǃgû-īǀkhā tesa, tsî ta ǁnâi nî ā sisa, as sa ǂâisa ī re.

⁴³Ob ge hā, tsî ǁkhawa ǁom hâse ge hō gu, ǁîgu di mûdi ge ǂoms xa dāhe amaga.

⁴⁴Ob ge ǁîga ǁnāxū, tsî ǁkhawa ǃnonaǁî ǃnās ai ge ǀgoreǃgû, ǁkhā mîde mî tsî.

⁴⁵ǃNubaib ge ǁîb ǁkhāǁkhāsabegu ǃoa hā, tsî ǁîgu ǃoa ge mî: ǃAruǀî ǁom î go sâ; mû, iri ge go ǀgū tsî Khoen Ôab ge ǁore-aon ǃomǁae nîra māǁnâhe.

⁴⁶Khâi î go ǃgû; kō, tita ra ǀapexūb a ǀgū xuige.

⁴⁷Tsî ganupeb ra ǃhoa hîa, mû, ob ge Judab, disiǀgamǀagu di ǀguiba ge hā, tsî kai ǂnubis, gôagu tsî haigu tsîna ūhâs, ǀgapipristergu tsî kaigu ǁaes digu xa go sîhes ge ǁîb ǀkha ge hā.

⁴⁸Tsî ǁîba ra ǀapexūb ge ǁîna sao-e mā tsî ge mî: ǁOa ta nîb ge ǁîba; ǁîba ǃkhō!

⁴⁹Ob ge ǁnātimîsi Jesub tawa sī tsî ge mî: Tawede tsi ta ra Rabitse, tsî ge ǁoa bi.

⁵⁰Ob ge Jesuba ǁîb ǃoa ge mî: Khoetse, mâs ǃoats ǁnâi satsa go hā? ǃNubai gu ge sī tsî ǃomga Jesub ai ǁgui tsî ge ǃkhō bi.

⁵¹Tsî mû, ǀguib Jesub ǀkha hâgu dib ge ǃomma ǀhōǂui, gôab âba ǂgaeǂui tsî ǀgapipristeri di ǃgāba ǂnau tsî ǁîb ǂgaesa ge ǂnauǁnâ.

⁵²ǃNubaib ge Jesuba ǁîb ǃoa ge mî: ǂGā-oa sa gôaba ǁîb di ǃkhais ǃnâ; gôaba ra ū-i hoa-i gôab ǀkha nî hîǀhuruhe xuige.

⁵³ǂÂi tamats kha hâ, ti Îba ta nēsi ǂgaiǀî ǁkhā ǃkhaisa, ob ga disiǀgamǀasa ǃnā hâ legiungu ǀhomǃgāga mā te?

⁵⁴Mati di kha xoade nî ǀoaǀoahe, nēti nîra ī, ti ra mîde?

⁵⁵ǁNā iri ǃnâb ge Jesuba ǂnubidi ǃoa ge mî: ǃGam-aob ǃoas khami du go ǂoaxa gôagu tsî haigu tsîn ǀkha, tita du nî ǃkhōse; tsēkorobe ta ge sadu ǀkha tempeli ǃnâ ǂnû, tsî gere ǁkhāǁkhā, xawe du ge ǃkhō te tama hâ i.

⁵⁶Xawes ge nēs hoasa ge ī, kēbo-aogu di xoadi nî dīǀoaǀoahese. ǃNubai gu ge ǁkhāǁkhāsabegu hoaga ǁîba ǁnāxū tsî ge ǃhū.

⁵⁷Tsî Jesuba ge ǃkhōgu ge ǁîba ǀgapipristeri Kajafab, ǁîb tawa xoaǂansabegu tsî kaigu tsîgu ǀhaoǀhaosen ge hâ ib ǃoa ge ūsī.

⁵⁸Tsîb ge Petruba ǁîba ǃnūseba xu ge sao, ǀgapipristeri di ai-ommi kōse; tsî ǂgâ, tsîb ge ǃgān tawa ge ǂnû, ǀamsab nî mûse.

⁵⁹Tsî ǀgapipristergu, kaigu tsî ǀapeǀhaos hoas ge ǂkhaba ǀhûǀguitimî-e Jesub ǃoagu ge ôa, mati gu nî ǁîba ǃgamsa, xawe gu ge hō tama ge i.

⁶⁰Tsî ǂgui ǂkhaba ǀhûǀguitimî-aogu ge hā, xawe gu ge hō tama ge i. O kha ge ǀunis ai ǀgam ǀhûǀguitimî-aokha hā

⁶¹tsî ge mî: Nēb ge ge mî: ǁKhā ta a, Elob di tempela khôaǁnâ, tsî ǁîba ǃnona tsēdi ǃnâ omkhâisa.

⁶²Ob ge ǀgapipristera khâi, tsî ǁîb ǃoa ge mî: Xū-ets ǁnâi ǃeream tama hâ? Mâsa gu nēga sats ǃoagu ra ǀhûǀguitimî?

⁶³Xaweb ge Jesuba ge ǃnō. Ob ge ǀgapipristera ǃeream, tsî ǁîb ǃoa ge mî: Ûitsama Elob tawa ta ra nūba tsi, sigets nî mîba ǃkhaisa, īsets satsa Xristu Elob Ôa ǃkhaisa.

⁶⁴Ob ge Jesuba ǁîb ǃoa ge mî: Sats go mî. O ta ra mîba du: Nēsisa xu du ge Khoen Ôaba amǀkhāb Elob ǀgaib dib tawa ǂnôase, tsî ǀhommi di ǀnanudi ai ǃgoaxase nî mû.

⁶⁵ǃNubaib ge ǀgapipristera ǁîb sarana ǀkhauǃā, tsî ge mî: Elobab kom go ǃkhāǃkhāo. Mâ ǀhûǀguitimî-e ge kha ǃaruǀî ǂhâba hâ? Mû, nēsi go kom ǁîb ǃkhāǃkhāsa go ǁnâuo.

⁶⁶Mati go ra ǂâi? O gu ge ǃeream tsî ge mî: ǁŌbab kom anu hâo.

⁶⁷ǃNubai gu ge ǁîb ais ǃnâ ǂara, tsî ge ǁapu bi, tsî gu ge nauga ǂnau bi

⁶⁸tsî ge mî: Kēboba ge, Xristutse, tarib asa, satsa go ǂnauba?

⁶⁹Tsîb ge Petruba ǃauga ai-ommi ǃnâ ge ǂnôa i; os ge ǀgui ǃgāsa ǁîb ǃoa hā tsî ge mî: Sats on kom Jesub Galileaǁîb ǀkha ge hâ io.

⁷⁰Ob ge ǁîba hoan aiǃâ ǀoa tsî ge mî: ǀŪ ta a, tare-es ra mîsa.

⁷¹Tsî aiǁāba xub ra ǂoa hîas ge ǀnîsa ǁîba mû, tsî ǁnāpa hân ǃoa ge mî: Nēb kom Jesub Nasareǁîb ǀkha ge hâ io.

⁷²Ob ge ǁkhawa nūs ǀkha ǀoa tsî ge mî: ǂAn tama ta hâ khoeb komo.

⁷³Tsî ǂkharirose nēs khaoǃgân ge ǁnāpa mâna hā tsî Petrub ǃoa ge mî: Amase, sats on ge ǁîb ditsa; sa gowab kom ǁkhāti ra ǂhaiǂhaiǃgâ tsio.

⁷⁴ǃNubaib ge ǀâxarexūsen tsî ge nūtsoatsoa: ǂAn tama ta hâ khoeb komo ti. Tsî ǁnātimîsib ge aniba ge ā.

⁷⁵Ob ge Petruba Jesub mîs xa ge ǂâi, ǁîb ǃoab gere mîsa: Anib di ās aiǃâts ge tita ǃnona ǃnāde nîra ǀūxū. Ob ge ǃaugab ǃoa ǂoa, tsî ause gere ā.