Read Khoekhoegowab Mateub 27 Bible Online

Mateub 27 - Khoekhoegowab bible

Mateub 27

¹Tsî ǃnauǁgoaga i geo, o gu ge hoa ǀgapipristergu tsî ǁaes di kaigu tsîga ǀapeǀhaosa ge dī, ǁîba gu nî ǃgamse.

²Tsî ǁîba ǃgae tsî gu ge ūsī, tsî Pontiub Pilatub ǃāǃkhōmâi-aoba ge māǁnâ bi.

³Ob ge Judab, ǁîba ge ǀapexūba, ǀgoraǃgâheb ge ǃkhaisab ge mûo, ǃhausen, tsî ǃnonadisi maride ǀgapipristergu tsî kaigu ǃoa ūhā

⁴tsî ge mî: ǁOre ta go, ǀhapio ǀaoba ta go ǀapexū ǃkhais ǀkha. O gu ge ǁîga ge mî: Tare-e ge kha sige ǁae hâ? Sats kom nî mûbaseno.

⁵Ob ge maride tempeli ǃnâ aoǂgā, ǃgûbē tsî ge sī ǂgāsen.

⁶O gu ge ǀgapipristerga maride ū tsî ge mî: Mā-amhe tama i kom hâo, ǁîde ǁguibas ǂgaes ǃnâ aoǂgāsa, ǀaomaris a amaga.

⁷Tsî ǀapeǀhaosa dī tsî gu ge sūǂnubi-aob di ǃhanaba ge ǁama, ǃgûkhoen nî ǁîb ǃnâ ǁkhōhe ǃkhaib ase.

⁸ǁNā-amagab ge ǁnā ǃhanaba ǀaoǃhanab ti nētsēs kōse ra ǂgaihe.

⁹ǃNubais ge mîs kēbo-aob Jeremiab disa ge ǀoa, nēti ra mîba: Tsî gu ge ǃnonadisi maride ge ū, nēs ge ǀgaus ǃgôahe geb dis, ǁîs ǀkhab ge Israeli ôan xa ǃgôahesa;

¹⁰tsî gu ge ǁîde sūǂnubi-aob di ǃhanab ǃaroma ge mā, ǃKhūb ge tita mîmās ǁkhās xase.

¹¹Tsî Jesub ge ǃāǃkhōmâi-aob aiǃâ mâihe, ob ge ǃāǃkhōmâi-aoba dî bi, tsî ge mî: Jodeǁîn gao-aotsa kha satsa? Ob ge Jesuba ge mî: Sats ra mî.

¹²Tsî ǀgapipristergu tsî kaigu tsîgu xab ge ǀhapiǀhapiheo, ob ge xū-i xare-e ǃeream tama ge i.

¹³ǃNubaib ge Pilatuba ǁîb ǃoa ge mî: ǁNâu tamats hâ, matikōse gu ra ǀhapimā tsi ǃkhaisa?

¹⁴Xaweb ge ǀgui mî-i tsîna ǃeream bi tama; ob ge ǃāǃkhōmâi-aoba kaise ge buru.

¹⁵Tsî Pasxaǁâus di ǁaeb aib ge ǃāǃkhōmâi-aoba ǁnaeti ge hâ i, khoena ǀgui ǃkhōsab, ǁîn ra ǂgaob hoaba xūbasa.

¹⁶Tsî gu ge ǁnā ǁaeb ai ǂanǂansa ǃkhōsab, Barabab ti ra ǂgaiheba ge ūhâ i.

¹⁷Tsî ǁîn ge ǀhao, ob ge Pilatuba ǁîn ǃoa ge mî: Mâba ta nî xūba dusa du ra ǂgao? Barabab Jesuba, tamas ka io Xristub ti ra ǂgaiheba?

¹⁸ǁÎb ge ǂan i xui-ao, suriba xun go māǁnâ bi ǃkhaisa.

¹⁹Tsî ǀgoraǃgâǃnaos aib ǂnôa hîas ge taras âba ǁîb ǃoa sî tsî ge mî: Xū-i ǃnâ xawe satsa nē ǂhauǃnâb ǀkha tā ǁae, ǁîb ǃaroma ta nētsē ǁhapos ǃnâ kaise go tsâ xuige.

²⁰Xawe gu ge ǀgapipristergu tsî kaigu tsîga ǂnubide ge ǀapeǃnâ Barababan nî ǂganbasense, îb Jesuba ǃgamhe, ti.

²¹Ob ge ǃāǃkhōmâi-aoba ǃeream, tsî ǁîna ǃoa ge mî: Mâb nē ǀgamkha diba ta nî xūba du, sa du ra ǂgao? On ge: Barabab, ti ge mî.

²²Ob ge Pilatuba ǁîna ge mîǀî: Mati ta ǁnâi Jesub, Xristub ti ra ǂgaiheb ǀkha nî dī? On ge hoana ǁîb ǃoa: ǃGâu kai bi! ti ge mî.

²³Ob ge ǃākhōmâi-aoba ge mî: Mâ ǂkhaba-eb ǁnâi dī hâ? On ge ǃnāǂamsase ǂgai, tsî: ǃGâu kai bi! ti ge mî.

²⁴Tsî Pilatub ge mûo, xū-eb sîsenǂui tama tsî ǃaruǀî kai ǂkhupib ra hā ǃkhaisa, ob ge ǁgam-e ū tsî ǂnubis aiǃâ ǁānǃom, tsî ge mî: ǀHapio ta a tita nē ǀaob tawa; sadu kom nî mûbaseno.

²⁵Os ge ǁaes hoasa ǃeream tsî ge mî: Ab ǀaob âba sida tsî sida ôan ǂama hā!

²⁶ǃNubaib ge ǁîna Barababa ge xūba; tsîb ge Jesuba ǂnau kai, tsî ge māǁnâ bi ǃgâuheb nîse.

²⁷O gu ge ǃāǃkhōmâi-aob di torokhoega Jesuba ǀgoraǃgâ-ommi ǃnâ ūsī, tsî toroǂnubis hoasa ǁîb ǂnamipe ge ǀhaoǀhao.

²⁸Tsî ǂgaeǂuiǀkhā bi gu geo, o gu ge purpur anaǂamxūba ge ǂgaeǂgā bi,

²⁹tsî ǁkhūkronsa ǂgapu tsî ǁîb danas ai ǂnûi si, ǂāba ǁîb amǀkhāb ǃomǁae mā bi, ǁîb aiǃâ ǃhonǁgoa, ǃhō bi tsî ge mî: Tawede tsi ge ra, Jodeǁîn gao-aotse!

³⁰Tsî ǂara-ai bi tsî gu ge ǂāba ū, tsî ǁîb danas ai ge ǂnau.

³¹Tsî ǃhō bi gu ge, o gu ge ǁîb anaǂamxūba ǁhû bi, tsî ǁîb sarana ǂgaeǂgā bi, tsî ge ǂgaeǂguiǂui bi ǃgâuheb nîga.

³²Tsî ǂoa gu ra hîa gu ge khoeb Kireneǁîb, Simonni ti ra ǂgaiheba ge hō; ǁîba gu ge ǁgari, îb ǁîb ǃgâuhaiba tani ǃkhaisa.

³³Tsî Golgota ti ra ǂgaihe tsî danaǂkhōs ǃās, ti ra ǂnûiǃkhunihe ǃkhais tawa gu ge sīo,

³⁴o gu ge ǀkhuru xûib, tsabab ǀkha habahe hâba ge āsi bi; tsî tsâtsâb ge, ob ge ā ǂgao tama ge i.

³⁵Tsî ǃgâu bi gu ge, o gu ge ǁîb sarana ge ǀgoraǃāgu, ǂnōgusa ao tsî, kēbo-aob xa mîhe hâs nî ǀoase: “Ti sarana gu ge ǀgoraǃāgu, tsî ti anaǂamxūb ǂama gu ge ǂnōgusa ge ao.”

³⁶Tsî gu ge ǁnāpa ǂnû tsî ǁîba gere ǃûi.

³⁷Tsî gu ge ǁîb danas ǂamǃnâ ǀhapimāhes âb di xoamîsa ge ǂgāmâi: Nēb ge Jesub, Jodeǁîn di Gao-aoba, ti.

³⁸ǃNubai kha ge ǀgam ǃgamaokha ǁîb ǀkha ge ǃgâuhe; ǀguiba amǀkhāb ai tsî nauba ǁareǀkhāb ai.

³⁹Tsî ǃgû-īǀkhā ran ge ǁîba ǃkhāǃkhā tsî ǃnabindana,

⁴⁰tsî gere mî: Sats tempela ra khôaǁnâts, tsî ǃnona tsēdi ǃnâ ǁîba ra omkhâitsa, ǁî-aitsama huisen, Elob Ôats kao, î ǁgôaxa ǃgâuhaiba xu!

⁴¹ǁNās ǁkhās xase gu ge ǀgapipristergu, xoaǂansabegu tsî kaigu tsîga ǃhō bi, tsî ge mî:

⁴²Naunab ge gere ore, ob ǁî-aitsama a oresen ǁoa. Israeli gao-aob kao, ab nēsi ǃgâuhaiba xu ǁgôaxa, o da ge nî ǂgom bi.

⁴³Elob aib ge ge hana mûmâinǃgâ; ǂgaob kao, nēsi ore bi; Elob Ôata ge, tib ge mî xuige.

⁴⁴ǁKhā xū-e kha ge ǃgamaokha, ǁîb ǀkha go ǃgâuhekha ona ge ǁam bi.

⁴⁵Tsî ǃnaniǁî ira xub ge ǃkhaenaba ǃhūbaib hoab ai ge hā, khoeseǁî iri kōse.

⁴⁶Tsî khoeseǁî nî ī iri aib ge Jesuba kai dommi ǀkha ǂgai tsî ge mî: Eli, Eli, lama sabaxtani? ǁNās ge: Ti Elotse, ti Elotse, tarexats go ǁnāxū te?

⁴⁷Tsî ǁîn ǁnāpa mân ge ǁnâu, on ge: Nēb kom Eliaba ra ǂgaio, ti ge mî.

⁴⁸Ob ge ǀguib ǁîn diba ǁnātimîsi ǃkhoe, sponsa ū, ǀkhuru xûib ǀkha ǀoaǀoa si, ǂāb ai ǃkhāmâi si, tsî ge āsi bi.

⁴⁹O gu ge nauga ge mî: ǀÛ re, î ge kō, iseb Eliaba hā tsî nî ore bi ǃkhaisa.

⁵⁰ǃNubaib ge Jesuba ǁkhawa kai dommi ǀkha ǂgai tsî gagasa ge mā.

⁵¹Tsî mû, ǂgāmâisab tempeli dib ge ǀgapiseba xu ǃnagab kōse ge doaǃā; tsîb ge ǃhūba ge ǀkhū, tsî di ge ǃhaode ge ǂari;

⁵²tsî di ge ǀhobade ge ǁkhowa-amhe, tsî di ge ǂgui sorodi ǁom ge hâ i ǃanun dide ge khâi.

⁵³Tsî ǀhobade xu ǂoa tsîn ge ǁîb khâis khaoǃgâ ǃanu ǃās ǃnâ sī, tsî ǂguin tawa ge ǂhaiǂhaisen.

⁵⁴Tsî kaidisigu danakhoeb tsî ǁîb ǀkha Jesuba gere ǃûigu ge ǃhūǂguwib tsî ǃnae gona mûo, o gu ge kaise ǃao tsî ge mî: Amase nēb kom Elob Ôa go io.

⁵⁵Tsî di ge ǁnāpa ǂgui tarade ge hâ i ǃnūseba xu ra ǃgapade, Jesuba Galileaba xu sao tsî gere ǃoabade.

⁵⁶ǁÎdi ǃnâ ge hâ idi ge: Maria Magdalenas, Marias Jakobub tsî Joseb tsîkha îs tsî Sebedeub ôakha îs tsîde.

⁵⁷Tsî ǃui i geo, ob ge ǃkhū hâ khoeb Arimateaǁîb, Jose ti ǀon hâb, ǁkhāti Jesub di ǁkhāǁkhāsabe ge iba ge hā.

⁵⁸Nēb ge Pilatub tawa Jesub di sorosa ge sī ǂgan. ǃNubaib ge Pilatuba ge mîmā, îb sorosa māhe.

⁵⁹Ob ge Joseba sorosa ū tsî ǃanu, ǃuri ǃkhaib ǃnâ ge ǃgamiǂgā si,

⁶⁰tsî ǁîsa ǁîb di ǀasa ǁaos, ǃhaob ǃnâb ge ǃnamǂui kais ǃnâ ge ǁgui tsî kai ǀuisab ge dao-ams ǀhobas dis aiǃâ gariǂgano, ob ge ge ǃgû.

⁶¹Tsî ra ge ǁnāpa Maria Magdalenas tsî nau Marias tsîra ge hâ i, ǀhobas ǃoagu ǂnôase.

⁶²Tsî sao ra tsēs, ǂhomisentsēs khaoǃgâ hâs ai gu ge ǀgapipristergu tsî Farisegu tsîga Pilatub tawa ǀhaoǀhaosen

⁶³tsî ge mî: ǃKhūtse ǂâiǂâisen ge go, nē ǀhôagaob ge ganupeb ûitsama hîa mî mîsa: ǃNona tsēdi khaoǃgâ ta ge nîra khâi.

⁶⁴Mîmā ǁnâi re, ǀhobas nî ǃûihesa ǃnonaǁî tsēs kōse, î gu tā ǁîb ǁkhāǁkhāsabega ǀnîsi tsuxub ǃnâ hā, tsî ǁîba ǃnari tsî ǁaes ǃoa: ǁŌ hâna xub kom go khâio, ti mî, îb tā ǀuni ǂgaeǂhapuba ǂgurob ǃgâ-ai kai.

⁶⁵Ob ge Pilatuba ǁîgu ǃoa ge mî: Nē go ǃûisa ūhâ. ǃGû î ǃûi kai si, ǂan go a khami.

⁶⁶O gu ge ǃgû tsî ǀhobasa ge ǃûi, ǃûis hâ xawe ǁkhādi ǀuisa ǁgâiǂganam tsî.