Read Khoekhoegowab Mateub 28 Bible Online

Mateub 28 - Khoekhoegowab bible

Mateub 28

¹Tsî sâtsēs khaoǃgâ, ǂguro tsēs wekheb dis di ǁgoas ge ǃnâtsoatsoa ǃnubai ra ge Maria Magdalenas tsî nau Marias tsîra ge sī, ǀhobasa nî kōse.

²Tsî mû, kai ǃhūǂguwib ge ge ī; ǃKhūb di ǀhomǃgāb ge ǀhomma xu ǁgôaxa, tsî sī tsî ǀuisa ǀhobasa xu garibē tsî ǁîs ai ǂnû xui-ao.

³Tsî ǁîb īsib ge napab khami ge ī, tsî ǁîb saran ge ǃuri ge i, tsamaros khami.

⁴O gu ge ǃûi-aoga ǃaob xa ge ǀkhū tsî ǁō hâgu xase ge ī.

⁵Ob ge ǀhomǃgāba tarara ǃoa ge mî: Tā ǃao ro re ǂan ta a, Jesub ǃgâuhe goba ro ra ôa ǃkhaisa xuige.

⁶Nēpab hâ tama; khâib kom go, mîb ge khami. Nēpa hā, î ǁgoe-aib go hâ i ǃkhaisa kō re.

⁷Î ǃhaese ǃgû î ǁîb ǁkhāǁkhāsabega sī mîba re, ǁō hâna xub go khâi ǃkhaisa; tsî mû, ai-aiba dub ra Galileaba ǃoa, ǁnāpa du ge nîra mû bi; kō, mîba du ta go.

⁸O ra ge ǃhaese ǀhobasa xu ǂoa, ǃaob tsî kai ǃgâiaǂgaob ǀkha, tsî ge ǃkhoe ǁîb ǁkhāǁkhāsabega ra nî sī ǂhôase.

⁹Tsî mû, Jesub ge ǁîra ǃoa tsî ge mî: Tawede ro ta ra. O ra ge sī tsî ǁîb ǂaira ǃkhō tsî ge ǀgoreǀî bi.

¹⁰Ob ge Jesuba ǁîra ǃoa ge mî: Tā ro ǃao re; ǃgû î ti ǃgâsaga sī ǂhôa, î gu Galileab ǃoa ǃgû, o gu ge nî ǁnāpa mû te.

¹¹Tsî ǃgû ra ra hîa, mû o gu ge ǀnîgu ǃûis diga ǃās ǃnâ sī tsî ī gon hoana ǀgapipristerga ge ǂhôa.

¹²O gu ge kaigu ǀkha ǀhao tsî ǀapeǀhaosa ge dī tsî gu ge toro-aoga kai mari-e mā,

¹³tsî ge mî: O go ge nî mî, ǁîb ǁkhāǁkhāsabegu ge tsuxub ǃnâ hā tsî ǁîba go ǃnari sige ǁom hâ hîa.

¹⁴Tsî nēs ga ǃāǃkhōmâi-aob tawa ǁnâuheo, o ge sige ǁîba ǂkhîǂkhî, tsî nî sago ǂhanseno kai xuige.

¹⁵Tsî marina gu ge ǃkhōǃoao, o gu ge mîmāhe gu go khami ge dī. Os ge nē mîsa Jodeǁîn tawa ge gom nētsēs kōse.

¹⁶Tsî disiǀguiǀa ǁkhāǁkhāsabegu ge Galileab ǃoa, Jesub ge ǁîga haisiba ǃhommi ǃoa ge ǃgû.

¹⁷Tsî mû bi gu ge, o gu ge ǁîba ge ǀgoreǀî, xawe gu ge ǀnîga ge îganǀgē.

¹⁸Ob ge Jesuba hā tsî ǁîgu ǃoa ǃhoa tsî ge mî: Māhe ta hâ tita hoa ǀgaiba ǀhommi ǃnâ tsî ǃhūbaib ai.

¹⁹ǁNā-amaga ǃgûǂoa, î go hoa ǁaede ǁkhāǁkhāsabedī, î go ǁîna ǁāǁnâ, ǁGûb, ǀGôab, tsî ǃAnu Gagab ǀons ǃnâ.

²⁰Î go ǁîna ǁkhāǁkhā sago ta gere mîmān hoana ǃkhōǀgaipesa. Tsî mû, tita ge hoa tsēde sago ǀkha nîra hâ nē hâ ǁaeb di ǀams kōse.