Read Khoekhoegowab Mateub 3 Bible Online

Mateub 3 - Khoekhoegowab bible

Mateub 3

¹Tsî ǁnā tsēdi ǃnâb ge Johaneb ǁĀǁnâ-aoba ge ǀkhī, tsî Judeab ǃgaroǃhūb ǃnâ aoǁnâ,

²tsî ge mî: ǃHobasen du re, gaosib ǀhommi dib ǀgūse hā hâ xuige.

³Nēb ge a ǁîb, kēbo-aob Jesajab ge ǁîb xa ǃhoa tsî a mîba: “Dommi ǂgai rab dib ǃgaroǃhūb ǃnâb ge ǁîba: ǂHomi du re daob ǃKhūb diba, î ǁîb di ǂgaroga ǂhauǂhau!”

⁴Tsîb ge nē Johaneba ǃnaiǀûn ǀkha dīhe hâ saraba ge ūhâ i, tsî khōǃgaesenna kamanab ai gere ǃgaesen, tsî ǁîb ǂûn ge ǂhomn tsî danib tsîna ge i.

⁵On ge Jerusalems tsî Judeab hoab din, tsî Jordanna ǁgoeǂnamipe hâ ǃhūb din hoana ǁîb ǃoa gere ǂoa,

⁶tsî ǁîb xa ge ǁāǁnâhe Jordanǃāb ǃnâ, ǁoren âna ǁguiǁnâ tsî.

⁷Tsî Farisegu tsî Sadusegu ǂguigu ǁîb ǁāǁnâs ǃoa ra hā ǃkhaisab ge mûo, ob ge ǁîgu ǃoa ge mî: Sa ǀaon ôado, tari-e sado ge ǁgau, ǃgoaxa ǁaiba du nî ǁhaixū ǃkhaisa?

⁸ǃHobasensa anu hâ ǂûna ǁnâi ūǀkhī.

⁹Î du tā ǂâi sadu ǃnâ mîsa: Abrahamma da kom sida îb ase ūhâo. Mîba du ta ra, Elob a ǁkhā ǃkhaisa nē ǀuina xu Abrahamma ǀgôana ǀkhī kaibasa.

¹⁰Tsîs ge ǀnai ǃōsa ǁguihe hâ haidi ǃnomab tawa. Mâ hai-i hoa-i ǃgâi ǂûna tani tama-i ge ǁhāǂuihe tsî ǀaes ǃnâ nî aoǂgāhe.

¹¹Tita ge ǁgam-i ǀkha ra ǁāǁnâ du ǃhobasensa ǃoa, xawe ti khaoǃgâ nîra hāb ge ti ǃgâ-ai a ǀgaisa, ǁîb ǁharora ta nî taniǃgon bisa ta anu tamaba, ǁîb ge ǃAnu Gagab tsî ǀaes tsîra ǀkha nîra ǁāǁnâ du.

¹²Tsaoǃoreba ǁîb ǃommi ǃnâ ūhâb, tsî dāǃnâǃkhais âba nîra ǃanuǃanub, tsî ǁîb ǃhoroba sâu-ommi ǃnâ ǀhaoǀhao tsî ǀhōba ǀarihe ǁoasa ǀaes ǀkha nî khauǃkhūba.

¹³ǃNubaib ge Jesuba Galileaba xu Jordanǃāb ǃoa ge hā, Johaneb xab nî ǁāǁnâhese.

¹⁴Ob ge Johaneba ǂkhā bi tsî ge mî: Tita kom sats xa ǁāǁnâhesa ǂhâba hâo, ots satsa tita ǃoa ra hā?

¹⁵Ob ge Jesuba ǃeream, tsî ǁîb ǃoa ge mî: ǀÛ nēsi, ǁnāti khom sakhoma anu hâ, ǂhanu-aisib hoaba ǀoaǀoasa xuige. Ob ge ge ǀûsenba bi.

¹⁶Tsî Jesub ge ǁāǁnâhe, ob ge ǁnātimîsi ǁgamma xu ge ǂoaxa, tsî mû, ǀhomgu ge ge ǁkhowa-amsenba bi, tsîb ge Elob Gagaba ǂnabu-i ase ǁgôaxa tsî ǁîb ǂama ra hāse ge mû.

¹⁷Tsî mû, dom-i ge ǀhomma xu ge ǀkhī, nēti ra mî-e: Nēb ge ti ǀgôab, ǀnam ta aba, ǃgâiǃgâibasensa ta ūǃnâ hâba.