Read Khoekhoegowab Mateub 4 Bible Online

Mateub 4 - Khoekhoegowab bible

Mateub 4

¹ǃNubaib ge Jesuba Gagab xa ǃgaroǃhūb ǃoa ge ǂgaeǂguihe, ǁgâuab xab nî ǃâitsâhese.

²Tsî hakadisi tsēdi tsî hakadisi tsuxugu tsînab ge ǂûtama hâo, ob ge ǀunis ai ge ǃâ.

³Ob ge ǃâitsâ-aoba ǁîb ǃoa hā tsî ge mî: Elob Ôats kao, nē ǀuidi ǃoa: Pere kai! ti mî.

⁴Ob ge ǃeream tsî ge mî: Nēti xoahe hâ: “Pereb ǀguiba xu i ge khoe-e ûi tide, tsî i ge Elob amsa xu ra ǂoa mîs hoasa xu nî ûi.”

⁵Ob ge ǁgâuaba ge ǃgû-ū bi ǃanu ǃāsa ǃoa, tsî tempeli ǂamais ai ge mâi bi,

⁶tsî ǁîb ǃoa ge mî: Elob Ôats kao, ǁnāǁnāsen re! Xoahe hâ xuige: “ǀHomǃgāgu âbab nî sats ǃaroma mîmā, ǃomgu ai gu nî tani tsi ǃkhaisa, ǂais âtsats tātsē ǀui-i tawa ǃom tidese.”

⁷Ob ge Jesuba ǁîb ǃoa ge mî: ǁKhawa xoahe hâ: “ǃKhūb sa Elobats ge ǃâitsâ tide.”

⁸ǁKhawab ge ǁgâuaba kaise ǀgapi ǃhommi ǃoa ge ūǃapa bi, tsî hoa gaosigu ǃhūbaib diga ge ǁgau bi ǁîgu ǂkhaisib ǀkha,

⁹tsî ǁîb ǃoa ge mî: Nēn hoana ta nî mā tsi, ǁnāǁgoe tsîts ga tita ǀgoreǀîo.

¹⁰Ob ge Jesuba ǁîb ǃoa ge mî: Bēxū te, Satantse! Nēti xoahe hâ xuige: “ǃKhūb sa Elob ǀguibats ge nî ǀgoreǀî tsî ǁîb ǀguiba ǃoaba.”

¹¹ǃNubaib ge ǁgâuaba ge ǀûsen, tsî mû, ǀhomǃgāgu ge hā tsî ge ǃoaba bi.

¹²Tsî Jesub ge ǁnâu, Johaneb ge māǁnâhesa, ob ge Galileab ǃoa ge ǃgû.

¹³Tsî Nasaretsa xu doe, tsîb ge Kapernaums hurirob tawa ǁgoes ai ge hā ǁan, Sebulonni tsî Naftalib tsîkha di ǃhūǀkharib ǃnâ.

¹⁴Kēbo-aob Jesajab xa ge mîhes nî dīǀoaǀoahese:

¹⁵Sa ǃhūts Sebulonni tsî Naftalib tsîkha dits, hurirob daob tawa Jordanǃāb nauǃani ǁgoets, ǀūben di Galileatse!

¹⁶ǃKhaenab ǃnâ ǂnôa ǁaes ge kai ǃnâba ge mû, tsî ǁîn ǁōb di ǃhūb tsî sommi ǃnâ ǂnôan ge ǃnâb xa ge ǁhaiǂamhe.

¹⁷ǁNā ǃnūba xub ge Jesuba aoǁnâtsoatsoa tsî ge mî: ǃHobasen du re, gaosib ǀhommi dib ǀgūse hā hâ xuige.

¹⁸Tsîb ge Jesuba Galileahurirob amǃgâb garu hîa, ǀgam khoeǃgâgukha, ǁauǃkhō-aokha ge mû, Simonni, Petrub ti ra ǂgaiheb tsî Andreab ǁîb ǃgâsab tsîkha; ǁîkha ge ǀûisa hurirob ai ge aoǂui, ǁauna nî ǃkhōse.

¹⁹Ob ge ǁîkha ǃoa ge mî: Sao te kho re, o ta ge khoeǃkhō-aose nîra dī kho.

²⁰O kha ge ǁnātimîsi ǀûide ǁnāxū tsî ge sao bi.

²¹Tsî ǁnāpa xub ge ǃgû, ob ge ǀnî khoeǃgâgukha ge mû, Jakobub, Sebedeub ôab, tsî Johaneb ǁîb ǃgâsab tsîkha, ǂgaus ǃnâ kha ǁîkha îb Sebedeub ǀkha ǀûidi âga ra dī-unu hîa tsî ge ǂgai kha.

²²O kha ge ǁnātimîsi ǂgaus tsî ǁîkha îb tsîna ǁnāxū, tsî ge sao bi.

²³Tsîb ge Jesuba Galileab hoaragaba ge ǃgûǃnâǃganu, tsî ǁîn di sinagogegu ǃnâ gere ǁkhāǁkhā tsî ǃgâiǂhôas gaosib disa gere aoǁnâ, tsî mâ ǀaesenai-i tsî mâ tsû-ai-i hoa-i tsîna ǁaes ǃnâ gere ǂuruǂuru.

²⁴Tsî gommi âb ge Siriab hoaragab ǃnâ ǂoa, on ge hoa ǀaesen hân, ǃkharaga ǀaesenain, tsû-ain xa ǃkhōhe hân, ǁgâuab xa hâǃnâhen, ǁkhâǀaesen hân tsî ǃhom hân tsîna ǁîb ǃoa ge ūhā, tsîb ge hoana gere ǂgauǂgau.

²⁵Tsî ǀoatsi ǂnubidi ge ge sao bi, Galileab din, Dekapolib din, Jerusalems din, Judeab din tsî Jordanǃāb nauǃanib din tsîna.