Read Khoekhoegowab Mateub 5 Bible Online

Mateub 5 - Khoekhoegowab bible

Mateub 5

¹Tsî Jesub ge ǂnubide mûo, ob ge ǃhommi ai ge ǃapa, tsî ǂnûb ge ǃnubai gu ge ǁkhāǁkhāsabegu âba ge hā.

²Tsîb ge ams âba khowa tsî, ǁkhāǁkhā ni tsî ge mî:

³ǃGâiǃōn ge hâ gagas ǃnâ ǀgâsana, ǁîn dib a gaosib ǀhommi diba amaga.

⁴ǃGâiǃōn ge hâ ǃoa hâna ǁkhaeǂgaohen nîra amaga.

⁵ǃGâiǃōn ge hâ tsamtsiǃnâna, ǁîn ǃhūbaiba nîra ǀumi amaga.

⁶ǃGâiǃōn ge hâ ǂhanu-aisiba ra ǃâ tsî ǁgâna ǁîn nîra ǁâ amaga.

⁷ǃGâiǃōn ge hâ ǀkhomxaǃnâna ǁîn nîra ǀkhomxaǃnâhe amaga.

⁸ǃGâiǃōn ge hâ ǂgaob ǃnâ ǃanuna ǁîn Eloba nîra mû amaga.

⁹ǃGâiǃōn ge hâ ǂkhîxaǃnâna ǁîn Elob ôan ti nîra ǂgaihe amaga.

¹⁰ǃGâiǃōn ge hâ ǂhanu-aisib ǃaroma ra ǃgôaǃgonhena, ǁîn dib a gaosib ǀhommi diba amaga.

¹¹ǃGâiǃō du ge hâ, khoen ga sado ǁgui-ai tsî ǃgôaǃgon, tsî ǂhumib ǀkha hoa ǂkhaba xūna sadu ǃoagu gowao tita ǃaroma.

¹²ǃGâiaǂgao î du dâ, amǃnâs âdu ǀhommi ǃnâ a kai xuige; ǁnātin kom sada aiǃâ ge hâ i kēbo-aoga gere ǃgôaǃgono.

¹³Sadu ge ǃhūbaib di ǂōdo; tsî i ga ǂō-e ǁkhoaoǃnâ, o tare-i ǀkha i kha nî ǁkhoaǁkhoahe? ǃAruǀî i kom xū-i xare-e harebe tamao, aoǂuihes tsî khoen xa dā-aihes ǀguisa i kom anu hâo.

¹⁴Sadu ge ǃhūbaib di ǃnâdo; ǃhommi ai ǂnôa ǃās kom ǂganǃgâsa ǁoao.

¹⁵Khoe-i kom ǃamamǀaesa ǃamam tsî ǃhoroǀguiroxapas ǃnaga mâi tamao, tsî i kom kandelari ai ra ǂgā sio, os oms ǃnâ hân hoana ra ǃnâba.

¹⁶ǁNāti ǃnâb âdo khoen aiǃâ ǃnâǃnâ, în sadu ǃgâi sîsenga mû, în sadu Îb ǀhommi ǃnâ hâba ǂkhaiǂkhai.

¹⁷ǂHanub tsî kēbo-aogu tsîga ta nî xorese ta ge hā, ti tā ǂâi re; xore ta nîse ta ge hā tama hâ, tsî ǀoaǀoa ta nîse ta ge ge hā.

¹⁸Amase ta ra mîba du xui-ao: ǀHommi tsî ǃhūbaib tsîkha nî ǃgû-ī, ǀgui ǂkhanimûros tsî saoros ǂhanub dis nî ǃgû-īs xa, hoan nî īs kōse.

¹⁹ǁÎ-i nē mîmādi hoadi xa ǂkhari mîmāsa ga ǁauǁau-i tsî ga khoena ǁnāti ǁkhāǁkhā-i ge gaosib ǀhommi dib ǃnâ hân hoan xa ǂkharise nî ǂgaihe, xawe dī tsî ga ǁîna ǁkhāǁkhā-i ge gaosib ǀhommi dib ǃnâ kaise nî ǂgaihe.

²⁰Mîba du ta ra xui-ao, sadu ǂhanu-aisib ga xoaǂansabegu tsî Farisegu tsîgu di ǂhanu-aisiba ǃnāǂam tama io, o du ge tātsē gaosib ǀhommi dib ǃnâ ǂgâ tide.

²¹ǁNâu du ge, kaigu ǃoa ge mîhesa: “ǃGamts ge tide! Tsî ǃgam ka ra-i hoa-i ge ǀgoraǃgâsa anu hâ-e.”

²²Xawe ta ra mîba du: Mâ-i hoa-i ǁî-i ǃgâsab ǃoagu ga ǁause ǁaixa-i, ǁî-i ge ǀgoraǃgâsa anu hâ, tsî mâ-i hoa-i ǁî-i ǃgâsaba ǃoa: Xūtamats ti ga mî-i, ǁî-i ge kai ǀapeǀhaosa anu hâ, tsî: Sa xorexusatse! ti ga mî-i, ǁî-i ge ǀamo ǀaeba anu hâ.

²³Sa māsats ga altars ǃoa sī-ū, tsîts ga ǁnāpa ǂâihō, ǃgâsa-i âts sa ǃoagu ǀauxū-e ūhâsa,

²⁴ǁnâi mās âtsa altars aiǃâ ǁnāxū î ǃgû, î aibe ǃgâsa-i âts ǀkha ǀûbagusa dī, îts ǁnāǃnubai sa māsa hā ǁguiba.

²⁵Îts ǃhaese sa mâǃoa-aoba ǃgâiǂâixaba, ganupets daob ai hâǀkhā bi hîa, îb tā mâǃoa-aoba ǂhanuǂhanu-aoba māǁnâ tsi, îb tā ǂhanuǂhanu-aoba sîsaba māǁnâ tsi îts tā ǃkhō-oms ǃnâ aoǂgāhe.

²⁶Amase, ta ra mîba tsi, ǁnāpa xuts ge tātsē ǂoa tide, ǀuni marirosats nî matares kōse.

²⁷ǁNâu du ge, kaigu ǃoa ge mîhesa: “ǃGamebats ge khôa tide.”

²⁸Xawe ta ra mîba du, mâb hoab, tarasa ga kōǀîb, tura si nîse, ǁnāb ge ǀnai ǂgaob âb ǃnâ ǃgameba ge khôaǀkhā si.

²⁹Amǀkhāb mûs âts ga ǁgonǁgonǃnâ tsio, ǁhoreǂui î aoxū si, harebeba tsi hâ, ǀgui-i sa uniǁaen di-i nî kāsa, sa soros hoas nî ǀamo ǀaeb ǃnâ aoǂgāhes xa xuige.

³⁰Tsî amǀkhāb ǃommi âts ga ǁgonǁgonǃnâ tsio, ǁhāǁnâ î aoxū bi, harebeba tsi hâ, ǀgui-i sa uniǁaen di-i nî kāsa, sa soros hoas nî ǀamo ǀaeb ǃnâ aoǂgāhes xa xuige.

³¹ǁKhāti ge mîhe: “Taras âba ga ǁnāxūb hoab ge ǀgoraǂkhanisa nî mā si.”

³²Xawe ta tita ra mîba du: Taras âba ga ǁnāxūb hoab, ǀaiba xu i ga ī tama io, ǁnāb ge ǁîsa go ǃgamekhôa kai, tsî ǁnāxūhe hâsa ga ǃgameb hoab ge ǁkhāti ra ǃgamekhôa.

³³ǁKhawa du ge ǁnâu kaigu ǃoa ge mîhesa: “ǂKhabasets ge nū tide, î nūs âtsa ǃKhūba ǃkhōǀgaipeba.”

³⁴Xawe ta ra mîba du, hoaragase du nū tidesa, ǀhommi ǃnâs kara o, ǁîb a Elob di tron amaga;

³⁵tsî ǃhūbaib ais karao, ǁîb di ǂaiǃnaob a amaga; tsî Jerusalems tawas kara o, ǁîs a kai gao-aob di ǃā amaga;

³⁶î danas âts tawa ǁkhāti tā nū; ǀgui ǀû-ets a ǃuriǃuri tsî ǂnūǂnū ǁoa amaga.

³⁷Os ge mîs âdo: Ā, ā, hî-î, hî-î ti nî ī, nēn ǂamai hân ǂkhababa xu hâ xui-ao.

³⁸ǁNâu du ge: “Mûs ama mûsa, ǁgûb ama ǁgûb” ti ge mîhesa.

³⁹Xawe ta tita ra mîba du, ǂkhababa tā mâǃoa; amǀkhāb xōb ai ga ǁapu tsi-e, naub tsîna unuba.

⁴⁰Tsî khoe-i ga ǂhanub aiǃâ ūsī tsi ǂgao, sa anaxūsa nî ūǀhana tsise, ǁnâi ǁkhāti anaǂamxūba mā i.

⁴¹Tsî ǀgui mailsats nî ǁnūse ga ǁgūǀkhā tsi-e, ǀgam mailra ǃgû-ū.

⁴²ǂGan tsi ra-e mā, î sa tawa ra ǀkhupi ǂgao-e tā ǀgî.

⁴³ǁNâu du ge: “Sa ǀgūkhoebats ge nî ǀnam tsî sa khākhoebats ge nî ǁkhan” ti ge mîhesa.

⁴⁴Xawe ta ra mîba du, sadu khākhoena ǀnam, î ǀâxare du rana ǀkhae, î ǁkhan du rana ǃgâidība, î ǁguiǂam tsî ra ǃgôaǃgon duna ǀgoreba.

⁴⁵Î du ǀhommi ǃnâ hâ ǁgûb ôan ase ī, ǁîb soresa ǃgâin tsî ǂkhaban tsîn ǂama ra ǁhai kaiba, tsî ǂhanu-ain tsî ǂhanuoǃnân tsîn ǂama ra ǀapi kaiba.

⁴⁶Sado ǀnam hân ǀguina du ga ǀnamo, mâ amǃnâ-e du ǁnâi ūhâ? ǁNāsan kha mariǃkhōǃoa-aona ǁkhāti dī tama hâ?

⁴⁷Tsî sadu ǃgâsan ǀguina du ga tawedeo, mâ xū-e du kha naun ǂamai ra dī? ǀŪbena kha ǁnās ǁkhās ase dī taman hâ?

⁴⁸ǀOa hâse ǁnâi ī du re, sadu îb ǀhommi ǃnâ hâb ǀoa hâse īs ǁkhās xase.