Read Khoekhoegowab Mateub 6 Bible Online

Mateub 6 - Khoekhoegowab bible

Mateub 6

¹ǂAnbasen re, î du sadu ausa tā khoen aiǃâ mā, ǁîn xa du nî mûhese; ǁnāti du ga dīo, o du kom sadu Îb ǀhommi ǃnâ hâb tawa amǃnâ-e ūhâ tamao.

²Ausats ga māo, tā sa aiǃâ xâi kai re, hînaxaǃnân ta dī khami sinagogegu ǃnâ tsî daogu ai, khoen xan nî ǃgôahese. Amase ta ra mîba du, amǃnâs ânan ūbē hâ ǃkhaisa.

³Tsîts ga satsa ausa māo, ab sa ǁareǀkhāb ǃomma ǀū, sa amǀkhāb ǃommi ra dīna.

⁴Îs aude mās âtsa ǂganǃgâsib ǃnâ ī, ob ge sa Îb ǂganǃgâsib ǃnâ ra mûba ǂhaisasib ǃnâ nî dīdawa-amba tsi.

⁵Tsî ǀgorets kao, ots hînaxaǃnân ra ī khami ī tide, sinagogegu ǃnâ tsî daogu ǁhôadi ai ra ǀgorena, khoen xan nî mûhese. Amase ta ra mîba du, amǃnâs ânan ūbē hâ ǃkhaisa.

⁶Sats ga ǁnâi ǀgoreo, ǃnā-oms ǃnâ ǂgâ, î dao-amsa ǂganam, î ǂganǃgâsib ǃnâ hâ ǁGûba ǃoa ǀgore, ob ge ǂganǃgâsib ǃnâ ra mû ǁGûba ǂhaisasib ǃnâ nî dīdawa-amba tsi.

⁷Tsî ǀgore du kao, tā ǀhomaxase ǀgore ǀūben xase, ǁîn di ǂgui mîden dīb ǃnâ nî ǁnâu-amhe tin ǂâi hâ xui-ao.

⁸Tā ǁnâi ǁîn khami ī. Sadu Îb kom ǂhâba du hâna a ǂan, sadu nî ǂgans aiǃâo.

⁹Nēti ǁnâi ǀgore du re: Sida Îtse ǀhommi ǃnâ hâtse, sa ǀonsa as khaihe re!

¹⁰Sa gaosiba ab hā re, sa ǂâisa as ī, ǀhommi ǃnâs ra īs ǁkhās khami ǁnāti ǃhūbaib on ai,

¹¹nētsē sida tsēkorobe pereba mā da,

¹²î sida ǀhapina ǀûba da, sida ǀhapixabena da ra ǁkhāti ǀûba khami.

¹³Î tā ǃâitsâb ǃnâ ǂgaeǂgui da, î ǂkhababa xu ore da. Gaosib tsî ǀgaib tsî ǂkhaisib tsîgu a sa ǀamosib ǃnâ xuige. Amen.

¹⁴Khoena du ga ǁîn di dāsāde ǀûbao, ob ge sadu ǀhomsi Îba sadu dide ǁkhāti nî ǀûba du.

¹⁵Tsî khoena du ga ǁîn di dāsāde ǀûba tama io, ob ge sadu Îba sadu dāsāde ǁkhāti ǀûba du tide.

¹⁶Tsî ǂûtama du ga hâo, o du sadu aide ǀkhuruǀkhuru tide, hînaxaǃnân ase; ǁîn ge aidi âna ī tama di hâ khami ra dī, ǂûtamahâs ǀkhan khoen xa nî mûhese. Amase ta ra mîba du, ǁîn amǃnâsan ūbē hâ ǃkhaisa.

¹⁷Sats ga ǁnâi ǂûtamahâo, danas âtsa ǀnau, î ais âtsa ǁā,

¹⁸khoen aiǃâts ǂûtamahâs ǀkha ǁgausen tidese, îts sa Îb ǂganǃgâsib ǃnâ hâb aiǃâ ǁgausen, ob ge sa Îb ǂganǃgâsib ǃnâ ra mûba ǂhaisasib ǃnâ nî dīdawa-amba tsi.

¹⁹ǁUiba ǃhūbaib ai tā ǀhaoǀhaobasen, nēpa di ge ǁgurib tsî ǀgūb tsîkha xa ra hapuhe, tsî ǃnari-aon xa khaoǃkhopaǃgâhe tsî ǃnarihe.

²⁰Î du ǁuiba ǀhommi ǃnâ ǀhaoǀhaobasen, ǁnāpa di ge ǁgurib tsî ǀgūb tsîkha xa hapuhe, tsî ǃnari-aon xa khaoǃkhopaǃgâhe tsî ǃnarihe tide.

²¹ǁUib âdu hâpa, ǁnāpab kom ǂgaob âdu ona hâo.

²²Mûs ge soros di ǃamamǀaesa, tsîs ga mûs âtsa ǂhauǃnâo, os ge sa soros hoaragasa nî ǃnâ.

²³Tsîs mûs âts ga ǂkhabao, os ge sa soros hoaragasa nî ǃkhae; tsî ǃnâb sats ǃnâ hâb ga ǃkhaeo, matikōseb ǃkhaenab ǂûba nî kai.

²⁴Khoe-i xare-i ge ǀgam ǀhonkhoekha a sîsenba ǁoa; ǀguiba i ge nî ǁkhan, tsî nauba i ge nî ǀnam, tsî ǀguib ai i ge nî ǂgāmâisen, tsî nauba i ge nî ǃharaxū. Elob tsî ǃkhūsib tsîkha du a sîsenba ǁoa.

²⁵ǁNā-amaga ta ra mîba du: Tā sadu ûib xa ǂhansen, tare-e da nî ǂû, tsî tare-e da nî āsa, tsî sadu soros xa, tare-e da nî anasen, ti. Ûiba ǁnâi ǂûn ǂamai kai tamab hâ? Tsî sorosa ǁnâi anaǂamxūb ǂamai kai tamas hâ?

²⁶ǀHommi di anina ǃgaoǃgâ, tsoro tsî ǃgao tsî sâu-ommi ǃnâ in ǀhaoǀhao tama ǃkhaisa, xawen ge ǀhomsi Îb âdu xa ra ǂûmāhe. ǁÎna du ǁnâi īǂam tama hâ?

²⁷Tsî tari-e sadu ǃnâ, ǂhansens ǀkha ǁî-i di gaxusib tawa, ǀgui ela a ǁguiri ǁkhā?

²⁸Tsî tarexa du anaxūb xa ra ǂhansen? ǃAub di ǃkhārona ǃgaoǃgâ, matin ra ǀomsa; sîsen taman hâ, tsî ǀhôa taman hâ.

²⁹Mîba du ta ra, Salomob ǁîb di ǂkhaisib hoab ǃnâ ǁîn ǀgui-i khami ge anasen tama hâ i ǃkhaisa.

³⁰Tsî Elob ga ǃaub di ǀgâba ǁnāti anao, nētsē mâb tsî ǁari ǁganoms ǃnâ ra aoǂgāheba, ǁnās ǃgâ-aib ǁnâi sadu tawa dī tide, ǂkhariǂgomxaǃnâdo?

³¹Tā ǁnâi ǂhansen: Tare-e da nî ǂû, tsî tare-e da nî ā, tsî tare-e da nî anasen?

³²ǀŪben kom nēn hoana ra ôao. ǀHomsi Îb sadu dib ge a ǂan, nēn hoana du ǂhâba hâ ǃkhaisa.

³³ǂGurosa ǁnâi Elob di gaosib tsî ǁîb di ǂhanu-aisib tsîkha ôa, o du ge nēn hoana nî ǁguiribahe.

³⁴Tā ǁnâi ǁarikam ǁgoas xa ǂhansen, ǁarikam ǁgoas ǁîs dina nî ǂhansenba xuige. ǂÂu i kom hâo, mâ tsēs hoas ǁîs tsūba ūhâsa.