Read Khoekhoegowab Mateub 7 Bible Online

Mateub 7 - Khoekhoegowab bible

Mateub 7

¹Tā ǀgoraǃgâ, ǀgoraǃgâhe du tidese.

²ǀGoraǃgâ du ra ǀgoraǃgâs ǀkha du ge nîra ǀgoraǃgâhe tsî ǀguiro-ū du ra ǀguirob ǀkha du nî ǀguirohe xuige.

³Tsî matits ra ǀapoba sa ǃgâsab di mûs ǃnâ mû, tsîts sa mûs ǃnâ hâ ǃnao-e hōǃâ tama hâ?

⁴Tsî matits ra sa ǃgâsab ǃoa mî: ǁNam î ta ǀapoba sa mûsa xu ūǂui, tsî mû, ǃnao-i ge sa mûs ǃnâ ǁgoe.

⁵Sa hînaxaǃnâtse, aibe ǃnaoba sa mûsa xu ūǂui, ots ge ǃgâise nî mû, matits ǀapoba sa ǃgâsab di mûsa xu nî ūǂuisa.

⁶ǃAnusiba tā arina mā, î du sadu ǃamde tā hāgūna ǁgui-aiǃâ, în tā ǂaidi ǃnâ dāǂgā ni, în tā dawasen tsî sado ǀkhauǃā.

⁷ǂGan, o du ge nîra māhe; ôa, o du ge nîra hō; ǃgubu-am, o du ge nîra ǁkhowa-ambahe.

⁸ǂGan ra-i hoa-i ge ra ǃkhōǃoa, ôa ra-i hoa-i ge ra hō, ǃgubu-am ra-i hoa-i ra ǁkhowa-ambahe xuige.

⁹Mâ khoeb sadu diba kha, ǁîb ôasab ga pere-e ǂgan bio, ǀui-e nî mā bi?

¹⁰Tsî ǁau-eb ga ǂgano, ǀao-e nî mā bi?

¹¹Sadu hîa ǂkhaba du ga a ǂano, sadu ôana ǃgâi xūna māsa, matikōseb ǁnās ǂamai sadu Îb, ǀhommi ǃnâ hâba, ǂgan bi rana ǃgâina nî mā?

¹²Hoan ǁnâi, khoen nî sado dī-ū, ti du ga ǂgaon, ǁîna sadu ona ǁnās ǁkhās xase dī-ū; nēs ǃnân ǂhanub tsî kēbo-aogu tsîna hâ xuige.

¹³ǂGâ du re ǂō dao-ams ǃnâ; harab ge ǁāb, tsî ǂhapab ge daob, kāǁōsib ǃoa garuba tsî ǂguin a ǁîb ai ra ǃgûna xuige.

¹⁴Tsî ǂōs ge dao-ams, tsî ǀuib ge daob, ûib ǃoa garuba, tsî ǀoron ge ǁîba ra hōna.

¹⁵ǂKhaba kēbo-aogu, gūsaran ǃnâ sadu ǃoa ra hāga ǃûisen, ǃnāb ǃnâ gu ǃnari ra ǂhiragu ase ī xuige.

¹⁶ǁÎgu ǂûn ai du ge nî mûǂan gu. ǁKhūdi tawa ǂauxûiǂûhais ǂûna ǃora da ra, tsî ǁkhūxa haidi tawa ǀnomas ǂûna ǃora da ra?

¹⁷ǁNās ǁkhās xase i ge ǃgâi hai-e ǃgâi ǂûna ra ūǀkhī, xawe ǁgao hâ hai-i ge ǁkhoa tama ǂûna ra ūǀkhī.

¹⁸ǃGâi hai-i kom ǁkhoa tama ǂûna a ūǀkhī ǁoao, tsî ǁgao hâ hai-i kom ǃgâi ǂûna a ūǀkhī ǁoao.

¹⁹Mâ hai-i hoa-i, ǃgâi ǂûna ūǀkhī tama-i ge ǁhāǂuihe tsî ǀaes ǃnâ ra aoǂgāhe.

²⁰ǁNā-amaga ǁîgu ǂûn tawa du nî mûǂan gu.

²¹Mâ-i hoa-i: ǃKhūtse, ǃKhūtse ti ra mîǀî te-i ge gaosib ǀhommi dib ǃnâ ǂgâ tide, xawe ti Îb ǀhommi ǃnâ hâb di ǂâisa ra dī-i ge nî ǂgâ.

²²ǂGuin ge ǁnā tsēs ai tita ǃoa: ǃKhūtse, ǃKhūtse ti nî mî, sa ǀons ǃnâ kha kēbo tama da hâ, tsî sa ǀons ǃnâ kha ǁgâuaga aoǂui tama da hâ, sa ǀons ǃnâ kha ǂgui buruxana dī tama da hâ?

²³ǁNāǃnubai ta ge nî ǁkhoase mîǀî ni: Tātsē ta ǂan du tama, xuige tita xu bē, sa ǂkhaba sîsenaodo!

²⁴Mâ-i hoa-i ǁnâi, ti mîde ǁnâu tsî ǁîde ra dī-i ge nî gā-ai khoeb ǀkha ǂkhōhe, oms âba ǃhaob ai ge ǂnubiba.

²⁵Tsî kai ǀapib ge hā, tsî ǃāgu ge dâu, tsî ǂoagu ge ǃgom tsî ǁnā oms ai ge ǂnapisen, xaweb ge ǁnā tama ge hâ, ǃhaob aib ge ǂnubihe hâ i amaga.

²⁶Tsî mâ-i hoa-i, ti mîde ǁnâu tsî ǁîde dī tama-i ge gâ khoeb ǀkha nî ǂkhōhe, ǁîb omsa ǀgopab ai ge ǂnubiba.

²⁷Tsî kai ǀapib ge hā, tsî ǃāgu ge dâu, tsî ǂoagu ge ǃgom, tsî oms ai ge ǂnapisen, ob ge ge ǁnā, tsî ǁnās âb ge kai ge i.

²⁸Tsî i ge ge ǃnae, Jesub ge nē mîde mîtoao, os ge ǂnubisa ge ǃhuri ǁîb di ǁkhāǁkhās ǂama.

²⁹ǁKhāǁkhās âb ge ǀgaiba ge ūhâ i, tsî xoaǂansabegu dis khami ī tama ge hâ i amaga.