Read Khoekhoegowab Mateub 8 Bible Online

Mateub 8 - Khoekhoegowab bible

Mateub 8

¹Tsî ǃhomma xub ge ǁgôaxa ǃnubais ge kai ǂnubisa ge sao bi.

²Tsî mû, ǃomamaxab ge hā ǀgoreǀî bi tsî ge mî: ǃKhūtse, ǂgaots ka ots ge a ǂgauǂgau te ǁkhā.

³Ob ge Jesuba ǃomma ǀhōǂui, tsî tsâǀkhā bi, tsî ge mî: ǂGao ta ra, xuige ǂgau! Ob ge ǁnātimîsi ǃomamasis âba xu ge ǂgau.

⁴Ob ge Jesuba ǁîb ǃoa ge mî: Kō, khoe-i xare-ets mîba tide, xawe ǃgû, ǁî-aitsama pristera sī ǁgausen, î Moseb ge mîmā ǁguibasa ǁguiba, ǁîgu di mîdansa ǃoa.

⁵Tsî Jesub ra Kapernaums ǃnâ ǂgâ hîab ge kaidisigu danakhoeba ǁîb ǃoa hā tsî ǀkhoma bi

⁶tsî ge mî: ǃKhūtse ti ǃgāb ge oms ǃnâ ǁgoe ǃhomsib xa, tsî kaise ra tsû.

⁷Ob ge Jesuba ǁîb ǃoa ge mî: Tita ge sī tsî nî ǂuruǂuru bi.

⁸Ob ge kaidisigu danakhoeba ǃeream tsî ge mî: Anu tama ta hâ, ti oms ǃnâts nî ǂgâ ǃkhaisa; îts ǀgui mîs ǀguisa mî, ob ge ti ǃgāba nî ǂgau.

⁹Tita on ge a khoe, ǂamkhoegu ǀgaib ǃnâ mâ ta, tsî ta ge toro-aoga ti ǃnaga ūhâ. Tsî nēb ǃoa ta ga: ǃGû ti mî, ob ge ra ǃgû, tsî naub ǃoa: Hā, ob ge ra hā tsî ǃgāb ǃoa: Dī nēsa, ob ge ra dī.

¹⁰Tsî Jesub ge ǁnâu, ob ge buru tsî sao bi ran ǃoa ge mî: Amase ta ra mîba du, tātsē ta Israelǁîn ǃnâ ǁnāti ī ǂgom-e hō tama hâ.

¹¹O ta ra mîba du, ǂguin ge aiǂoas tsî huriǂoas ǀkhāba xu nî hā, tsî Abrahammi tsî Isaki tsî Jakob tsîgu ǀkha gaosib ǀhommi dib ǃnâ nî ǂnû,

¹²xawe gaosib di ôan ge nî ǂhāǂuihe, ǃaugakam ǃkhaenab, ās tsî ǁaninǁgûs tsîra hâǃnâba ǃoa.

¹³Ob ge Jesuba kaidisigu danakhoeb ǃoa ge mî: ǃGû, î ǂgomts go khami ībahe! Ob ge ǃgāb âba ǁkhā ira xu ge ǂgau.

¹⁴Tsî Jesub ge Petrub oms ǃnâ sīo, ob ge Petrub ǀuiǁgûs ǁkhaisa ūhâse ǁgoe ǃkhaisa ge mû.

¹⁵Ob ge ǁîs ǃomma ge tsâǀkhā, tsîs ge ǁkhaisa ge ǁnāxū si; os ge khâi tsî ge ǃoaba bi.

¹⁶Tsîn ge ǃui-amǁae ǂguin ǁgâuab xa hâǃnâhena ǁîb ǃoa ūhā, ob ge gagaga mîs ǀkha ge aoǂui, tsî tsû hân hoana ge ǂgauǂgau,

¹⁷Jesajab kēbo-aob xa ge mîhes nî ǀoase: ǁÎb ge sada ǂkhabusasiga ge ūbasen, tsî sada ǀaesenga ge tani, ti ra mîba.

¹⁸Tsî Jesub ge ǂnubis di khoen hâ ǂnamipeb ai hâ ǃkhaisa ge mû, ob ge hurirob nau ǀkhāb ǃoa ǃgâusa ge mîmā.

¹⁹Tsîb ge ǂanǂansa xoaǂansabeba hā, tsî ǁîb ǃoa ge mî: ǁKhāǁkhā-aotse, satsa ta ra sao ǂgao, mâǀîts ga ǃgûs hoasa.

²⁰Ob ge Jesuba ǁîb ǃoa ge mî: ǀGirin ge āde ūhâ, tsî ǀhommi di anin ge omde ūhâ, xawe Khoen Ôab ge danasab nî ǂnûi-ai ǃkhai-e ūhâ tama hâ.

²¹Tsî ǀnîb ǁîb ǁkhāǁkhāsabegu dib ge ǁîb ǃoa ge mî: ǃKhūtse, mā-am te, î ta aibe ti îba sī ǁkhō.

²²Ob ge Jesuba ǁîb ǃoa ge mî: Sao te re satsa, în ǁō hâna ǁîn di ǁō hâna ǁkhō.

²³Tsî ǂgaus ǃnâb ge ǂgâ, o gu ge ǁîb ǁkhāǁkhāsabega ge sao bi.

²⁴Tsî mû, nētikō kai ǂoab ge hurirob ai ge ǃgom ǂgaus ge ǃgabigu xa apu-aihes kōse, xaweb ge ǁîba ge ǁom hâ i.

²⁵O gu ge ǁîb di ǁkhāǁkhāsabega sī ǂkhaiǂkhai bi tsî ge mî: ǃKhūtse, sâu ge re, kāǁō ge kom rao.

²⁶Ob ge ǁîgu ǃoa ge mî: Tarexa go ǃaoǃnâ, sa ǂkhariǂgomxaǃnâgo? Tsî khâi tsîb ge ǂoagu tsî hurirob tsîna ge ǃgabe, ob ge kai ǃnōsasiba ge hā.

²⁷On ge khoena buru, tsî ge mî: Mâ khoeǃnôaba kha nēb, ǂoagu tsî hurirob on xa ra ǁnâuǀnamheba?

²⁸Tsî nauǃani Gadareǁîn ǃhūb ǃnâb ge sī, o kha ge ǀgam khoekha ǁgâuab xa hâǃnâhekha ge ǃoa bi, ǀhobade xu ge ǀkhī tsî kaise ge ǁaixa i kha, khoe-i xare-i ǁnā daoba-ū ī ǁoas kōse.

²⁹Tsî mû, ǂgaiǂui tsî kha ge ge mî: Tare-e khom sikhoma sats ǀkha ǁae hâ, Jesu, Elob Ôatse? Ganupeb ǁaeba hā tama hîats ge go hā, tsûtsû khomts nîse.

³⁰Tsî ǃnūse ǁîkha xus ge kai ǃû ra hāgūn ǀhaosa ge hâ i.

³¹O kha ge ǁgâuakha ǀkhoma bi tsî ge mî: Sikhomats ga aoǂui ǂgao-o, mā-am khom, î khom hāgūn ǀhaos ǃnâ ǂgâ re.

³²Ob ge ǁîkha ǃoa ge mî: ǃGû! O kha ge ǂoa, tsî hāgūn ǃnâ ge ǂgâ. Tsî mû, os ge hāgūn ǀhaos hoasa ǁhoaba xu hurirob ǃnâ aoǁnâsen tsî ge āǁō.

³³O gu ge ǃûi-aoga ge ǃhū, tsî ǃās ǃnâ hoana ge sī ǂhôa, tsî ǁgâuab xa hâǃnâhekha ǀkha go īn ona ge sī ǂhôa.

³⁴Tsî mû, ǃās din hoan ge Jesuban nî ǃoase ge ǂoa; tsî ǁîban ge mû, on ge ge ǀkhoma bi, îb ǁîn di ǀkhariba xu bē, ti.