Read Khoekhoegowab Mateub 9 Bible Online

Mateub 9 - Khoekhoegowab bible

Mateub 9

¹Tsî ǂgaus ǃnâ ǂgâ tsîb ge ǃgâuxa, tsî ǁîb ǃās ǃoa ge hā.

²Tsî mû, khoen ge ǃhom hāb, kharob ai ǁgoeba ǁîb ǃoa ge ūhā. Tsî Jesub ge ǁîn ǂgomsa mû, ob ge ǃhom hâb ǃoa ge mî: ǀGôatse, ǃgâiǂâisen re, ǁoren âtsats ge ǀûbahe hâ.

³Tsî mû, ǀnîgu xoaǂansabegu digu ge ǁîgu ǃnâ ge mî: Nēb ge Eloba ra ǃkhāǃkhā.

⁴Ob ge Jesuba ǂâidi âga ǂan tsî ge mî: Tarexa go ǂkhababa ra ǂâi sago ǂgaogu ǃnâ?

⁵Mâsa kha supu nēra xa: ǁOren âtsats ǀûbahe hâ, tsî: Khâi î ǃgû! ti mîs tsîra xa?

⁶Xawe ǂan go nîse, Khoen Ôab ǃhūbaib ai, ǁorenab nî ǀûbase ǀgaiba ūhâsa, ob ge ǃhom hâb ǃoa ge mî: Khâi, kharob âtsa ū, î ǁaru!

⁷Ob ge khâi tsî ge ǁaru.

⁸Tsî ǂnubidi ge mû, on ge buru tsî Elob, khoena nēti ī ǀgaiba ge māba ge kare.

⁹Tsî Jesub ge ǁnāpa xu ǃgû, ob ge khoeb mariǃkhōǃoa-ommi ǃnâ ǂnôab, Mateub ti ra ǂgaiheba mû, tsî ǁîb ǃoa ge mî: Sao te re! Ob ge khâi tsî ǁîba ge sao.

¹⁰Tsî i ge ge ī, Mateub oms ǃnâb tāb tawa ǂnôa hîa, mû, o gu ge ǂgui mariǃkhōǃoa-aogu tsî ǁore-aogu tsîga ge ǂnûǀhao, Jesub tsî ǁîb ǁkhāǁkhāsabegu tsîgu ǀkha.

¹¹Tsî Farisegu ge mû, o gu ge ǁîb ǁkhāǁkhāsabegu ǃoa ge mî: Tarexab kha ǁkhāǁkhā-aob âgo mariǃkhōǃoa-aogu tsî ǁore-aogu tsîgu ǀkha ra ǂû?

¹²Ob ge Jesuba, ǁnâub geo, ǁîgu ǃoa ge mî: ǂUrun ge ǂgauǂgau-aoba ǂhâba tama hâ, xawe ǀaesen hân ge ǂhâba bi hâ.

¹³ǃGû, î go ǁkhāǁkhāsen, tare-i asa: ǀKhomxaǂgaosiba ta ra ǂgao, tsî ǁguibas ǀguisa tama, ti mîsa. ǂHanu-aina ta nî ǂgaise ta ge hā tama hâ, xawe ǁore-aona ta ǃhobasens ǃoa nî ǂgaise ta ge ge hā.

¹⁴ǃNubai gu ge Johaneb ǁkhāǁkhāsabega ǁîb ǃoa hā tsî ge mî: Tarexa ge sige tsî Farisegu tsîge ǂûtama ra hâ, o gu sa ǁkhāǁkhāsabega ǂûtama a hâ ǁoa?

¹⁵Ob ge Jesuba ǁîgu ǃoa ge mî: Matin ǃgameǁâus khoena nî ǃoa, ǃgame-aob ganupe ǁîn ǀkha hâ hîa? Xawe di ge tsēde nî hā, ǃkhoeǂgâsabeb ǁîna xu nî ūbēhesa, on ge ǂûtama nî hâ.

¹⁶Tsî khoe-i xare-i ge ǁkhāti ǀasa ǃnabasa ǀoro sarab ai ǃnaba tama hâ; ǃnabas nî saraba ǀkhausen kai, ǀkhausenni go hâ is ǃgâ-ai xui-ao.

¹⁷Tsî khoe-i xare-i ge ǁkhāti ǀasa ǂauxûiba, ǀoro ǃgapagu ǃnâ ǂnâ tama hâ, ǁnās ga dīhe, o gu ge ǃgapaga nî doa, tsî ǂauxûiba nî ǀkhausen; tsî ǂauxûib nî ǂnâxūhe, o i ge khoe-e ǀasa ǂauxûiba ǂuru ǃgapagu ǃnâ ra ǂnâ, o kha ge hoakha ǂgause ra hâ.

¹⁸Nēnab ge ǁîgu ǃoa mîo, mû, danakhoegu di ǀguib ge ǁîb ǃoa hā, ǃhonaiǃâ bi tsî ge mî: Ti ôas ge ǀase go ǁō, xawe sī, î sa ǃomma ǁîs ai ǁgui, os ge nî ûi.

¹⁹Ob ge Jesuba khâi, tsî ǁîb ǁkhāǁkhāsabegu ǀkha ge sao bi.

²⁰Tsî mû, taras disiǀgamǀa kuriga ǀaoǂnâba ge ūhâ is ge ǃgâbǀkhāba xu hā, tsî ǂomamǃgâb ǁîb sarab diba ge tsâǀkhā.

²¹ǁÎs ge ǁîs ǃnâ mî xui-ao: Sarab âb ǀguiba ta ga tsâǀkhā, o ta ge nî ǂgau.

²²Tsî Jesub ge ǂnan, tsî ǁîsa mû, ob ge ge mî: ǃGâiǂâisen re, ǀgôase, ǂgoms âs go hui si xuige. Os ge tarasa ǁnā ira xu ge ǂgau.

²³Tsî Jesub ge danakhoeb oms ǃnâ sī, tsî ǂnuni ra tsî ǂkhupi ra ǁaesa mû.

²⁴Ob ge ǁîn ǃoa ge mî: Bē du, ǀgôaros ǁō tama, tsî ǁom hâ xuige. On ge ge âiǂui bi.

²⁵Tsî ǁaesab ge ǃhaeǂui, ob ge ǂgâ, tsî ǀgôaros ǃomma ge ǃkhō; os ge ǀgôarosa ge khâi.

²⁶Tsî nē gommi ge ǁnā ǃhūb hoab ai ge ǂoa.

²⁷Tsî Jesub ge ǁnāpa xu ǃgû, o kha ge ǀgam ǂgī hâkha ge sao bi, ǂgaiǂui tsî ra mîkha: Sikhoma ǀkhom re, Davib ôatse!

²⁸Tsî oms ǃnâb ge sī, o kha ge ǂgī hâkha ǁîb ǃoa ge hā. Ob ge Jesuba ǁîkha ǃoa ge mî: ǂGom kho ra, ǁnāsa ta a dība kho ǁkhā ǃkhaisa? O kha ge ǁîb ǃoa ge mî: Ā, ǃKhūtse.

²⁹Ob ge mûdi âkha tsâǀkhā tsî ge mî: Sakho ǂgoms ǃoa a-i ība kho.

³⁰O di ge mûdi âkha ge khowahe, tsî Jesub ge ǁkhōse ǃkhâi kha tsî ge mî: Kō, î-i tā khoe-e nēsa ǂan.

³¹Xawe ǂoa kha geo, o kha ge ge gom kai bi ǁnā ǃhūb hoab ai.

³²Tsî nēkha ge ǂoao, mû on ge khoena ǃgome tsî ǁgâuab xa hâǃnâhe khoeba ǁîb ǃoa ge ūhā.

³³Tsî ǁgâuab ge ǃhaeǂuihe, ob ge ǃgomeba ge ǃhoa. Os ge ǂnubisa buru tsî ge mî: Tātsē i ge nēti ī xū-e Israelǁîn ǃnâ mûhe tama hâ.

³⁴Xawe gu ge Farisega ge mî; ǁGâuagu di ǂamsab ǃnâb kom ǁgâuaga ra aoǂuio.

³⁵Tsîb ge Jesuba kaiǃādi tsî ǃādi hoade ǃgûǃnâ, tsî gere ǁkhāǁkhā ǁîn di sinagogegu ǃnâ, tsî ǃgâiǂhôas gaosib disa gere aoǁnâ, tsî hoa ǀaesengu tsî tsû-ain tsîna gere ǂuruǂuru ǁaes ǃnâ.

³⁶Tsî ǂnubideb ge mû, ob ge ǁîna ge ǀkhom, tsau hâ tsî ǁnāxūhe hâ gūn, ǃûi-ao-i ose hân khamin ge ī i amaga.

³⁷Ob ge ǁîb di ǁkhāǁkhāsabegu ǃoa ge mî: ǃGaos ge a kai, xawe sîsenaogu ge a ǀoro.

³⁸ǁNā-amaga ǃKhūb ǃgaos diba ǂgan, îb sîsenaoga sîǂui ǁîb di ǃgaos ǃoa.