Read Khoekhoegowab Markub 1 Bible Online

Markub 1 - Khoekhoegowab bible

Markub 1

¹Nēs ge tsoatsoas Jesub Xristub ǃgâiǂhôas disa.

²Kēbo-aob Jesajab ǃnâ i xoahe hâ khami: “Mû, tita ge ti ǀhomǃgāba sa aiǃâ ra sî, daob âtsab nî sa ais aiǃâ ǂhomiba tsise.”

³Dommi ǂgai rab dib ge ǃgaroǃhūb ǃnâ hâ: “ǂHomi du re ǃKhūb di daoba, î du ǁîb di ǃganga dīǂhanuǂhanuba bi.”

⁴Johaneb ge khâi ǃgaroǃhūb ǃnâ tsî gere aoǁnâ ǁāǁnâs ǃhobasens dis, ǁoren ǀûbas ǃoa hâsa.

⁵On ge ǁîb ǃoa ge ǂoa Judeaǃhūb din hoan tsî Jerusalems din tsîna, tsîn ge ǁîb xa ge ǁāǁnâhe Jordanǃāb ǃnâ, ǁîn di ǁorena ra ǁguiǁnâse.

⁶Tsîb ge Johaneba ǃnaiǀûn ǀkha ge anahe hâ i tsî khōǃgaesenna ǁîb kamanab ai ge ūhâ i, tsî ǂhomn tsî ǃaub di daniba gere ǂû.

⁷Tsîb ge aoǁnâ tsî gere mî: Tita ǃgâ-ai ǁkhāb ge ti khaoǃgâ ǃgoaxab, ǁîb ǁharora di ǃhâurona ta ǃgamǃgâ tsî nî xoresa ta anu tamaba.

⁸Tita ge sado ǁgam-i ǀkha goro ǁāǁnâ; xaweb ge ǁîba ǃAnu Gagab ǀkha nîra ǁāǁnâ du.

⁹Tsî i ge ge ī, ob ge Jesuba ǁkhā tsēdi ǃnâ Nasarets Galileab disa xu hā tsî Johaneb xa Jordanǃāb ǃnâ ge ǁāǁnâhe.

¹⁰Tsî ǁnātimîsi, ǁgamma xub ge ǂoaxao, mû, ob ge ǀhomgu ra ǁkhowa-amsen tsî Gagab ra ǂnabu-i xase ǁîb ai ǁgôaxa ǃkhaisa ge mû.

¹¹Tsî dommi ge ǀhomga xu ge hā: Sats ge ti Ôats ǀnam ta ats, ǃgâiǃgâibasensa ta ūǃnâ hâtsa, ti.

¹²Tsî ǁnātimîsib ge Gagaba ǃgaroǃhūb ǃoa ge ǂgaeǂguiǂui bi.

¹³Tsîb ge ǁnāpa ǃgaroǃhūb ǃnâ hakadisi tsēde ge hâ i, Satanni xa ra ǃâitsâhese, tsîb ge ǀgurun ǀkha ge hâ i tsî gu ge ǀhomǃgāga gere ǃoaba bi.

¹⁴Tsî Johaneb ge māǁnâhe hâ is khaoǃgâb ge Jesuba Galileab tawa sī tsî Elob di ǃgâiǂhôasa aoǁnâ

¹⁵tsî gere mî: ǁAeb ge go ǀoa tsî gaosib Elob dib ge a ǀgū. ǃHobasen ǁnâi, î ǂgom ǃgâiǂhôas ǃnâ re.

¹⁶Tsî Galileahurirob xōǀkhāb ra ǃgû hîab ge ge mû Simonni tsî Andreab ǁîb ǃgâsab tsîkha ǀûidi âkha hurirob ǃnâ ra aoǂgā ǃkhaisa, ǁauna nî ǃkhōse.

¹⁷Ob ge Jesuba ǁîkha ǃoa ge mî: Tita sao re, o ta nî khoeǃkhō-aose dī kho.

¹⁸O kha ge ǁnātimîsi ǀûidi âkha ǁnāxū tsî ge sao bi.

¹⁹Tsî ǂkhariroseb ge aiǃâb ǃoa ǃgûo, ob ge Jakobub, Sebedeub ôab tsî Johaneb, ǁîb ǃgâsab tsîkha ǂgaus ǃnâ ǀûidi âkha ra dī-unuse ge mû.

²⁰Ob ge ǁnātimîsi ǁîkha ge ǂgai tsî kha ge ǁîkha îb Sebedeuba ǂgaus ǃnâ ǃgaesabegu ǀkha ǁnāxū, tsî ǁîba ge sao.

²¹Tsî Kapernaums ǃnâ gu ge ǂgâ, ob ge ǁnātimîsi sâtsēs ai sinagogeb ǃnâ ǂgâ tsî gere ǁkhāǁkhā.

²²On ge ǁîb di ǁkhāǁkhās xa ge ǃhuri kaihe; ǀgaiba ūhâb xaseb ǁîna gere ǁkhāǁkhā xui-ao tsî xoaǂansabegu khami tama.

²³Tsî ǁnātimîsib ge ǁîn di sinagogeb ǃnâ khoeb, ǃanuoǃnâ gagaba ūhâba ge hâ i, tsîb ge ǃau

²⁴tsî ge mî: Tare-e ge sige sats ǀkha ǁae hâ, Jesu Nasareǁîtse? Hāts go, sigets nî hîkākāse? ǂAn ge ge a tarits a ǃkhaisa, Elob di ǃAnuts komo.

²⁵Ob ge Jesuba ǁîba ǃgabe tsî ge mî: ǃNō î ǁîba xu ǂoa!

²⁶Ob ge ǃanuoǃnâ gagaba ǁîba ǃgau, kai dommi ǀkha ǃau tsî ge ǂoaxu bi.

²⁷On ge hoana ǁnātikōse ge ǃhuri kaihe, ǀnîn nauna dîǃgâ tsî ge mîǀîgus kōse: Tare-e kha nē-e? ǀAsa ǁkhāǁkhā-ai-i ǀgaib ǀkha hâ i ge, ǃanuoǃnâ gagagab ra ǃgabe tsî gu ǁîba ra ǁnâuǀnam.

²⁸Ob ge gommi âba ǃhaese Galileab ǀkharib hoaragab ǃoa ge ǂoa.

²⁹Tsî ǁnātimîsi gu ge sinagogeba xu ǂoa, tsî Simonni tsî Andreab tsîkha di oms ǃnâ ge ǂgâ, Jakobub tsî Johaneb tsîkha ǀkha.

³⁰Tsîs ge Simonni ǀuiǁgûsa ǁkhais ǀkha ge ǁgoe i, tsîn ge ǁnātimîsi ǁîs xa ge mîba bi.

³¹Ob ge sī tsî ǃommi âsa ǃkhō tsî ge ūkhâi si; tsî ǁkhais ge ǁnāxū sio, os ge ǁîga ge ǃoaba.

³²Tsî ǃui i geo, sores ra ǂgâ hîa, on ge hoa tsû-aina ūhân tsî ǁgâuab xa hâǃnâhen tsîna ǁîb ǃoa ge ūhā.

³³Os ge ǃās hoaragasa dao-ams aiǃâ ge ǀhaoǀhaosen.

³⁴Tsîb ge ǂguin, ǃkharaga ǀaesenaina ǀaesen hâna gere ǂgauǂgau tsî ǂgui ǁgâuaga gere ǃhaeǂui, tsî ǁgâuaga ǃhoa gu nîsa mā-am tama ge i, ǂan bi gu a, ti gu nî mî ǃkhaisa.

³⁵Tsî ǃnauǁgoaga ganupe i a ǃkhae hîab ge khâi tsî ǂoa, tsî ǃnōsa ǃkhai-i ǃoa ǃgû tsî ǁnāpa sī gere ǀgore.

³⁶O gu ge Simonni tsî ǁîb ǀkha ge hâ iga ǁîba ge sao.

³⁷Tsî hō bi gu geo, o gu ge ge mîǀî bi: Hoan kom ra ôa tsio.

³⁸Ob ge ǁîga ge mîǀî: A ge nau ǃādi ǀgūse ǁgoedi ǃoa ǃgû, î ta ǁnāpa ǁkhāti aoǁnâ re, ǁîs ǃoa ta kom go ǃgûǂoao.

³⁹Ob ge ǁîn di sinagogegu Galileab ǃnâ hâgu hoagu ǃnâ gere aoǁnâ, tsî ǁgâuaga gere ǃhaeǂui.

⁴⁰Tsî ǃomamaxab ge ǁîb ǃoa hā tsî ǂgan bi tsî ǁîb aiǃâ ǃhon tsî ge mîǀî bi: ǂGaots ka ots kom a ǃanuǃanu te ǁkhāo.

⁴¹Ob ge Jesuba ǀkhomxa bi tsî ǁîb ǃomma ǀhōǂui, tsî tsâǀkhā bi tsî ǁîb ǃoa ge mî: ǂGao ta ra, ǃanu!

⁴²Tsî ǁnātimîsis ge ǃomamasisa ǁîba xu ge bē tsîb ge ge ǃanu.

⁴³Ob ge ǃkhâi bi tsî ǁnātimîsi ǁîba sîbē,

⁴⁴tsî ǁîb ǃoa ge mî: Kō îts tā khoe-e xū-e mîba, xawe ǃgû î sa-aitsama, pristera sī ǁgausen, î sa ǃanuǃanusis ǂama Moseb xa ǂnûiǂgāhe hâ-e ǁguiba ǁîgu mîdansa ǃoa.

⁴⁵Xaweb ge ǃgûǂoa tsî ǂguina ge ǃhoaba, tsî nē mîsa ge ǂapaǂoa kai; ob ge Jesuba ǃaruǀî ǂhaisase ǃās ǃnâ ǂgâ ǁoa ge i, tsî ǃauga ǃgaroǃkhaidi ǃnâ gere hâ, tsîn ge mâ ǃkhai-i hoa-e xu ǁîb ǃoa ge hā.