Read Khoekhoegowab Markub 10 Bible Online

Markub 10 - Khoekhoegowab bible

Markub 10

¹Tsîb ge ǁnāpa xu khâi tsî Judeab di ǀkharib ǃoa tsî Jordanǃāb nauǃanib di ǃhūgu ǃnâ ge hā. Tsî di ge ǂnubide ǁkhawa ǁîb tawa ge ǀhao; ob ge ǁkhawa ǁnaetib hâ khami ǁîna gere ǁkhāǁkhā.

²Tsî gu ge Farisega hā tsî ǃâitsâ bi rase ge dî bi, ise i ao-e mā-amhe hâsa ǁî-i tarasa xu ǀgorasa.

³Ob ge ǃeream, tsî ge mîǀî gu: Tare-eb ge Moseba sado mîmā?

⁴O gu ge ge mî: Moseb ge ǀgoraǂkhani-e xoa tsî ǁîsa xu ǀgorasa ge mā-am.

⁵Ob ge Jesuba ǃeream tsî ǁîgu ǃoa ge mî: Sago ǂgaob di karokarosens ǃaromab ge Moseba ǁnā ǂnûiǂgāsa ge xoa.

⁶Xawe tsoatsoas kurusaben disa xub ge Eloba aob ase tsî taras ase ǁîra ge kuru.

⁷ ǁNā-amagab ge khoeba ǁgûb tsî ǁgûs tsîra ǁnāxū, tsî taras âb ai nî ǂgāmâisen.

⁸Tsî ra ge ǁîǀgamra nî ǀgui ǁgan. ǁNā-amaga ra ge ǃaruǀî ǀgam tama tsî a ǀgui ǁgan.

⁹Elob xa ǁnâi ǃgaeǀhaohe hâ-e i ge khoe-e ǀgora tide.

¹⁰Tsî oms tawa gu ge ǁkhāǁkhāsabegu âba ǁkhawa ǁîs xa ge dîǃgâ bi.

¹¹Ob ge ǁîgu ǃoa ge mî: Taras âba xu ǀgora tsî ga ǀkharasa ǃgameb hoab ge ǁîs tawa ra ǃgamekhôa.

¹²Tsî taras ga aob âsa xu ǀgora tsî ga ǀkharaba ǃgame, os ge ra ǃgamekhôa.

¹³Tsîn ge ǀgôarona ǁîb ǃoa ge ūhā, îb ǁîna tsâǀkhā ti, o gu ge ǁkhāǁkhāsabega ǁîna ra hā-ūde ge ǃgabe.

¹⁴Tsî Jesub ge mûo, ob ge kaise ǂkhîoǃnâ tsî ǁîgu ǃoa ge mî: An ǀgôarona tita ǃoa hā, ǁîna tā ǂhani; nēti īn dib kom gaosib Elob dibao.

¹⁵Amase ta ra mîba du: ǀGôaro-i khami gaosib Elob diba ǃkhōǃoa tama ga i-i kom tātsē ǁîb ǃnâ ǂgâ tideo.

¹⁶Tsîb ge ǁîna ǁnam, tsî ǃomga ǁgui-ai tsî ge ǀkhae in.

¹⁷Tsî daob ǃoab ra ǂoa, hîab ge ǀguiba ǃkhoehā tsî ǁîb aiǃâ ǃhon tsî ge dî bi: ǃGâi ǁkhāǁkhā-aotse, tare-e dī tsî ta ǀamo ûiba nî ǀumi?

¹⁸Ob ge Jesuba ǁîb ǃoa ge mî: Tarexats “ǃgâi” ti ra ǂgai te? Khoe-i xare-i kom ǃgâi tamao, Elob ǀguib.

¹⁹Mîmādets ge a ǂan: ǃGamebats ge khôa tide; ǃgamts ge tide; ǃnarits ge tide; ǂkhabasets ge ǂgā-am tide; khoe-ets ge ǁkhâuǁnâ tide; saob tsî saos tsîrats ge nî ǃgôa.

²⁰Ob ge ǃeream tsî ge mîǀî bi: ǁKhāǁkhā-aotse, nēn hoana ta ge ge ǃkhōǀgaipe ti ǂkhamsisa xu.

²¹Tsî Jesub ge ǁîba kō, tsî ǀnam bi, tsî ǁîb ǃoa ge mî: ǀGui-ets ganupe tôasi hâ: ǃGû, î ūts hân hoana ǁamaxū, î ǁîna ǀgâsana mā, ots ge ǀhommi ǃnâ ǁui-e nî ūhâ, î nēxopa hā, î tita sao.

²²Ob ge nē mîs ǂama tsûaǂgao, tsî ǃoa hâse ge bē, ǂgui xūnab ge ūhâ i xui-ao.

²³Ob ge Jesuba kōǂnamipe, tsî ǁîb ǁkhāǁkhāsabegu ǃoa ge mî: Matikō ǃgomsen kha xūna ūhâna gaosib Elob dib ǃnâ nî ǂgâ.

²⁴O gu ge ǁîb ǁkhāǁkhāsabega ǁîb mîdi xa ge ǃhuri. Ob ge Jesuba ǁkhawa ǃeream tsî ǁîgu ǃoa ge mî: ǀGôado, matikōse i a ǃgom, xūn ai ra mûmâinǃgân nî gaosib Elob dib ǃnâ ǂgâsa?

²⁵Supu i ge a, ǃnai-i nî nali di mûros ǃnâ ǃgûǃkharusa, ǃkhū hâ khoe-i nî gaosib Elob dib ǃnâ ǂgâs xa.

²⁶O gu ge ǁnās ǃgâ-ai ǃhuri tsî ge mîǀîgu: Tari-e ǁnâi a ǃgâiǃō ǁkhā?

²⁷Ob ge Jesuba ǁîga kō, tsî ge mî: Khoen tawa i ge a īǁoa, xawe Elob tawa i kom īǁoa tamao; hoan kom Elob tawa a īǁkhāo.

²⁸Ob ge Petruba ǁîb ǃoa ge mîtsoatsoa: Mû, sige kom hoana ǁnāxū, tsî satsa ge sao-o.

²⁹Ob ge Jesuba ǃeream tsî ge mî: Amase ta ra mîba go, khoe-i ga ǁnāxū oms tsî ǃgâsagu tsî ǃgâsadi tsî ǁgûb tsî ǁgûs tsî ǀgôan tsî ǃhanagu tsîna, tita tsî ǃgâiǂhôas ǃaroma,

³⁰o-i ge ǁî-e kaidisi ǃnādi kōse nîra ǃkhōǃoa nēsi nē hâ ǁaeb ǃnâ: Omdi tsî ǃgâsagu tsî ǃgâsadi tsî ǁgûdi tsî ǀgôan tsî ǃhanagu tsîna ǃgôaǃgondi ǀkha, tsî ǃgoaxaǁaeb ǃnâ ǀamo ûiba.

³¹Xawe ǂgui ǂguron ge nî ǀuniga tsî ǀunigan ge nî ǂguro.

³²Tsî gu ge daob ai hâ Jerusalems ǃoa ra ǃapase, ob ge Jesuba ǁîga ge aiǃgûba, o gu ge ǃhurigâ tsî sao bi rana ge ǃao kai. Tsîb ge ǁkhawa disiǀgamǀaga ūbasen, tsî hāǂam bi nîra xūn xa ǁîga ge mîbatsoatsoa:

³³Mû, Jerusalems ǃoa ge ge ra ǃapa tsîb ge Khoen Ôaba nîra māǁnâhe, ǀgapipristergu tsî xoaǂansabegu tsîga, tsî gu ge ǁîba ǁōb ǃoa nîra ǀgoraǃgâ, tsî ǁîba ǀūbena nîra māǁnâ;

³⁴on ge ǁîba ǃhō, ǂara-ai, ǂnau, tsî nîra ǃgam; tsî ǃnona tsēdi khaoǃgâb ge nîra khâi.

³⁵O kha ge Jakobub tsî Johaneb tsîkha, Sebedeub ôakha, ǁîb ǃoa hā, tsî ge mî: ǁKhāǁkhā-aotse, ǂgao khom ra ǂgan tsi khom nî-ets nî sikhoma dībasa.

³⁶Ob ge ge mîǀî kha: Tare-e ta nî dība khosa kho ra ǂgao?

³⁷O kha ge ǁîb ǃoa ge mî: Sikhoma mā re, î khom ǀguiba sa amǀkhāb ai tsî nauba sa ǁareǀkhāb ai ǂnû, sa ǂkhaisib ǃnâ.

³⁸Ob ge Jesuba ǁîkha ǃoa ge mî: ǀŪ kho a, tare-e kho ra ǂgaosa; ǁkhā kho a ǁnâi, tita ra ā ǀgabisa kho nî āsa, tsî tita ra ǁāǁnâ-ūhe ǁāǁnâs ǀkha kho nî ǁāǁnâhesa?

³⁹O kha ge ge mîǀî bi: ǁKhā khom a. Ob ge Jesuba ǁîkha ǃoa ge mî: ǀGabis tita ra āsa kho nîra ā, tsî ǁāǁnâs tita ra ǁāǁnâ-ūhes ǀkha kho nîra ǁāǁnâhe,

⁴⁰xawe ti amǀkhāb tsî ti ǁareǀkhāb ai ǂnûsa mās ge ti tamasa, tsîs ge ǂhomibahe hâna nîra māhe.

⁴¹Tsî disigu ge ǁnâuo, o gu Jakobub tsî Johaneb tsîkha ǂama ge ǀara.

⁴²Ob ge Jesuba ǁîga ǂgaihā tsî ge mîǀî gu: ǂAn go a, ǁaedi di gaosagu ǁîna ra gaoǂam ǃkhaisa, tsî ǁîn di kaigu ǁîn ǂama ǀgaiba ra sîsenǂui ǃkhaisa?

⁴³Xawe sago ǃnâ i ge ǁnāti ī tide; sago ǃnâ ga kai ǂgaob ge nî sago di ǃgā kai.

⁴⁴Tsî sago ǃnâ ga ǂguro ǂgaob ge nî sago di ǃgā kai.

⁴⁵Khoen Ôab on kom hā tamao sîsenbaheb nîse, xaweb kom sîsenba tsîb nî ǁîb ûiba māse ge hāo, ǂguin di xoremarib ase.

⁴⁶Tsî gu ge Jerixos tawa ge sī. Tsî Jerixosa xub ge ǂoa, ǁîb ǂûb tsî ǁîb ǁkhāǁkhāsabegu tsî kai ǂnubis tsîn, ob ge Timeub ôab, Bartimeub, ǂgī ǀkhope-aoba daob tawa ge ǂnôa i.

⁴⁷Tsî ǁnâub geo, Jesub Nasareǁîb a ǃkhaisa, ob ge ǂgai tsî ge mîtsoatsoa: Jesu, Davib Ôatse, ǀkhomxa te re!

⁴⁸On ge ǂguina ge ǃkhâi bi îb ǃnō. Xaweb ge ǃaruǀîǀgui ge ǂgai: Davib Ôatse, ǀkhomxa te re!

⁴⁹Ob ge Jesuba mâ tsî ge mî: ǂGai bi. On ge ǂgī hâba ǂgai, tsî ge mîǀî bi: ǃGâiǂâixa re, khâi ǂgaihets ra xuige.

⁵⁰Ob ge sarab âba aoxū tsî khâi tsî Jesub ǃoa ge hā.

⁵¹Ob ge Jesuba ǃeream tsî ǁîb ǃoa ge mî: Tare-e ta nî dība tsi ǃkhaisats ra ǂgao? Ob ge ǂgī hâba ge mîǀî bi: Rabitse, mû kai te re.

⁵²Ob ge Jesuba ge mîǀî bi: ǃGû, ǂgoms âts go hui tsi xuige. Ob ge ǁnātimîsi mû tsî daob ai ge sao bi.