Read Khoekhoegowab Markub 11 Bible Online

Markub 11 - Khoekhoegowab bible

Markub 11

¹Tsî Jerusalemsa gu ge ǀgūo, Betfages tsî Betanis tsîra tawa ǀKheraǃhommi tawa, ob ge ǁkhāǁkhāsabegu âb di ǀgamkha sî,

²tsî ǁîkha ǃoa ge mî: ǃGû sakho ǃoa ǃganu ǁgoe ǃāros ǃoa, o kho ge, ǂgâ kho kao, o ǁnātimîsi eselǂkhamrob ǃgaehe hâba nî hō, tātsē khoe-i xa ǂnû-aihe tamaba; xore î ūhā bi.

³Tsî khoe-i ga sakho ǃoa: Tarexa kho nēsa ra dī? ti mîo, o kho ge nî mî: ǃKhūb kom ǁîba ǂhâba hâo. Tsîb nî ǃhaese ǁkhawa nēxopa sî bi.

⁴O kha ge ǃgû, tsî eselǂkhamroba dao-ams ǃauga daob amǃgâ, ǃgaehe hâse hō tsî ge xore bi.

⁵Tsî ǀnîn ǁnāpa mân din ge ǁîkha ǃoa ge mî: Tare-e kho ra dī, o kho eselǂkhamroba ra xore?

⁶O kha ge ǁîna ge mîǀî, Jesub go mîmā kha khami, on ge ge ǃgû kai kha.

⁷Tsî kha ge eselǂkhamroba Jesub ǃoa ūhā tsî saran âkha ge ǁgui-ai bi, ob ge ǁîb ai ge ǂnû.

⁸Tsî ǂguin ge saran ana daob ai ge ǃā, tsî naun ge ǂgonaga haide xu ǁhā tsî daob ai ge tsoroǁgui.

⁹Tsî ais ai garun tsî saogarun tsîn ge ǂgai tsî ge mî: Hosiana, ǀkhaeheb ge hâ ǃgoaxaba ǃKhūb di ǀons ǃnâ!

¹⁰ǀKhaeheb hâ ǃgoaxa gaosib Abob, Davib diba, Hosiana ǀgapiseb ǃnâ!

¹¹Tsîb ge Jesuba Jerusalems tsî tempeli ǃnâ ge ǂgâ. Tsî hoanab ge kōtoa, tsî ǃui-i geo, ob ge disiǀgamǀagu ǀkha Betanis ǃoa ge ǂoa.

¹²Tsî nau tsē, Betanisa xu gu ge ǂoao, ob ge ge ǃâ.

¹³Tsî ǃnūseba xub ge ǀnomahai-e mûo, ǂgaena ūhâ-e, ob ge ge sī kō, iseb ǀnîsi xū-e ǁî-i ai hō tidesa. Tsî ǁîs tawab ge sīo, ob ge ǂgaen ǀguina ge hō, ǀnomaǂûn di ǁae tamab ao.

¹⁴Ob ge Jesuba ge mîǀî si: Tātsē i ge ǃaruǀî khoe-e sasa xu ǂû-e ǂû tide. Tsî gu ge ǁkhāǁkhāsabegu âba ǁîsa ge ǁnâu.

¹⁵Tsî gu ge Jerusalems tawa ge sī, tsî Jesub ge tempeli ǃnâ ǂgâo, ob ge tempeli ǃnâ ǁamaxū tsî gere ǁamana ge ǃhaeǂuitsoatsoa, tsî tāgu mariǂharugu-aon digu tsî ǂnabuna gere ǁamaxūn di ǂnû-aiǃnaodi tsînab ge ge dawaǃkhupu.

¹⁶Tsîb ge mā-am tama ge i khoe-i nî xū-e tempeli ǃnâ tanimasa.

¹⁷Tsî ǁkhāǁkhā tsîb ge ǁîn ǃoa ge mî: Xoahe tama i ǁnâi hâ: Ti ommi ge ǀgore-om ti nî ǂgaihe, hoa ǁaedi tawa, ti? Xawe du ge sado ǁîba ǃgamaon di ǁhāb ase dī hâ.

¹⁸Tsî ǀgapipristergu tsî xoaǂansabegu ge ǁnâu, o gu ge gere ôa-am mati gu nî ǁîba ǃgamsa; ǃao bi gu gere xui-ao, ǂnubis hoas ge ǁîb ǁkhāǁkhās ǂama burugâ hâ i amaga.

¹⁹Tsî ǃui i geo, ob ge ǃāsa xu ǃaugab ǃoa ge ǂoa.

²⁰Tsî ǃnauǁgoaga gu ra ǃgû-īǀkhā si hîa gu ge ǀnomahais ǃnomagu kōse ǂnâ hâ ǃkhaisa ge mû.

²¹Ob ge Petruba ǂâihō tsî ge mîǀî bi: Rabitse, mû ǀnomahais sats go ǀâxares kom go ǂnâo.

²²Ob ge Jesuba ǃeream tsî ǁîgu ǃoa ge mî: Elob ǃnâ ǂgomsa ūhâ re.

²³Amase ta ra mîba du, mâ-i hoa-i hîa ga nē ǃhommi ǃoa: Ūkhâisen î hurib ǃnâ aoǂgāsen ti a mî-i, tsî ga ǂgaob â-i ǃnâ îganǀgē tama i-i, tsî mî-i ra i nî ī ǃkhaisa ǂgom-i, ǁnā-i kom mî-i ra-i hoa-i xa nîra ībaheo.

²⁴ǁNā-amaga ta ra mîba du: ǀGores ǃnâ du ra ǂgan xūn hoan, ǁîna du nî ǃkhōǃoa ǃkhaisa du ga ǂgomo, on ge a sadu di.

²⁵Tsî mâ tsî du ga ǀgoreo, ǀûba re, khoe-i ǃoagu du ga xū-e ūhâo, îb ǁkhāti sadu îb ǀhommi ǃnâ hâba sadu ǃûǂamde ǀûba du.

²⁶Xawe sadu ga ǀûba tama io, ob komo ǁkhāti sadu îb ǀhommi ǃnâ hâba sadu ǃûǂamde ǀûba du tide o.

²⁷Tsî gu ge ǁkhawa Jerusalems ǃoa ge hā. Tsî tempeli ǃnâb ra ǃgûma hîa gu ge ǀgapipristergu gu tsî xoaǂansabegu tsî kaigu tsîga ǁîb ǃoa hā

²⁸tsî ge mîǀî bi: Mâ ǀgaiba xuts ra nēna dī, tsî tari-e ge satsa nē ǀgaiba mā, nēnats nî dīse?

²⁹Ob ge Jesuba ǃeream tsî ǁîgu ǃoa ge mî: Sago ona ta ge ǀgui xū-e nî dî; tsî ǃeream te go ga, o ta nî mîba go, mâ ǀgaiba xu ta nēna ra dīsa.

³⁰ǁĀǁnâs Johaneb disa ǀhomma xus hâ? Khoena xus hâ? ǃEream te.

³¹O gu ge ǁîgu ǃnâ ǂâiǂâisen tsî ge mî: Mî ge kao: ǀHomma xus, ob ge sage ǃoa nî mî: Tarexa go ǁnâi ǂgom bi tama hâ?

³²Tsî mî ge kao: Khoena xus, o ge ge ǁaesa ra ǃao; hoan ge Johaneba ama kēbo-aose ūhâ i amaga.

³³O gu ge ǃeream tsî Jesub ǃoa ge mî: ǂAn tama ge hâ. Ob ge Jesuba ǃeream tsî ge mîǀî gu: O ta tita ona sago mîba tide, mâ ǀgaiba xu ta nēna ra dīsa.