Read Khoekhoegowab Markub 12 Bible Online

Markub 12 - Khoekhoegowab bible

Markub 12

¹Tsîb ge ǁîn ǃoa ǂkhōdi ǃnâ ge mîtsoatsoa: Khoeb ge ǂauxûiǂûǃhanaba ǂgā tsî ǁgâuǂnami bi, ǀāǃnâǃkhai-e khao tsî ǂgō-om-e ge om, tsî ǁîba ǃhanasîsenaoga ǃgaeba tsî ǃnū ǃhūb ǃoa ge dāǁnâ.

²Tsî ǁaeb ge hāo, ob ge ǃgāba ǃhanasîsenaoga ǃoa ge sî, ǂauxûiǂûǃhanab di ǂûn xab nî ǃhanasîsenaoga xu ǃkhōǃoaga.

³Xawe gu ge ǁîba ū tsî ǂnau tsî ǀkhaiǃomse ge sîbē.

⁴Ob ge ǁkhawa ǀnî ǃgāba ǁîgu ǃoa ge sî. O gu ge ǁîb ona ǀuin ǀkha danas ai ǂnoa, ǁgaisise sîsenū tsî ge sîbē.

⁵Ob ge ǁkhawa ǀnîba ge sî. O gu ge ǁîba ge ǃgam. Tsî naugu ǂguiga gu ge ǀnîga ǂnau tsî nauga ge ǃgam.

⁶Tsîb ge ganupe ǀgui ǀnamǀnamsa ǀgôaba ge ūhâ i. Ob ge ǁîb ona ǀunis ai ǁîgu ǃoa ge sî: Ti ôaba gu kom nî sâuo, ti mî tsî.

⁷Xawe gu ge ǁnā ǃhanasîsenaoga ge mîǀîgu: Nēb kom ǀumi-aobao, a ge ǁîba ǃgam, os ge ǀumisa nî sage di.

⁸O gu ge ū tsî ǃgam tsî ǃhanaba xu ǃaugab ǃoa ge aoǂui bi.

⁹Tare-eb ǁnâi ǀhonkhoeb ǁnā ǃhanab diba nî dī? Hā tsîb ge sîsenaoga ǃgam, tsî ǂauxûiǂûǃhanaba ǀkharaga nî mā.

¹⁰Tātsē du ǁnâi nē xoasa khomai tama hâ: ǁNā ǀuib, omǂnubi-aogu xa aoxūhe hâb ge go ǁhôas di danaǀui kai;

¹¹ǃKhūba xu i ge nē-e ge ǃnae, tsî i ge a buruxa sada mûǁae.

¹²O gu ge ǁîba gu nî ǃkhō ǃkhaisa ge ôa-am, xawe gu ge ǂnubisa ge ǃao; hōǃâ gu ge xui-ao, ǁîgu xab go nē ǂkhōsa mîsa. O gu ge ǁîba ǁnāxū tsî ge bē.

¹³Tsî gu ge ǀnîgu Farisegu tsî Herodeǁîgu diga ǁîb ǃoa ge sî, mîdi âb ǃnâ gu nî ǁîba ǃkhōse.

¹⁴O gu ge hā tsî ǁîb ǃoa ge mî: ǁKhāǁkhā-aotse, ǂan ge ge a ama-aits a tsî khoe-i ǀkhats ǁae tama ǃkhaisa; khoen ai-ets kōǀî tama tsî daob Elob dibats ra amab ǃnâ ǁkhāǁkhā xui-ao: ǁNâi mā-amhe i hâ, Kaesara ǁgui-aimarisa māsa? Mā-amhe tama i hâ? Mā da nî? Mā da tide?

¹⁵Tsî ǁîgu hînaxaǃnâsiba ǂan tsîb ge ǁîgu ǃoa ge mî: Tarexa go ra ǃâitsâ te? Denara hā-ūba te, î ta mû.

¹⁶O gu ge ge hā-ū. Ob ge ǁîgu ǃoa ge mî: Nē īb tsî xoamâis tsîra tari-i dira? O gu ge: Kaesari dira kom ao, ti ge mî.

¹⁷Ob ge Jesuba ǃeream tsî ǁîgu ǃoa ge mî: Kaesara ǁnâi mā Kaesari di-e, tsî Eloba Elob di-e. O gu ge ǁîb ǂama ge buru.

¹⁸Tsî gu ge Sadusega ǁîb ǃoa ge hā, khâi-i hâ tama ti ra mîga, tsî ǁîba dî tsî ge mî:

¹⁹ǁKhāǁkhā-aotse, Moseb ge sida ge xoaba: Khoeb di ǃgâsab ga ǁō tsîb ga tarasa ǁōǃgauo, ǀgôan ose, ob ge ǃgâsab âba tarasa nî ū, ǁîb ǃgâsabab nî suri-e ǀkhī kaibase.

²⁰O gu ge hû ǃgâsaga ge hâ i; tsîb ge ǂguroba tarasa ge ū, tsî ǁōb geo, ob ge suri-e ǁōǃgau tama ge i.

²¹Ob ge ǀgamǁîba ǁîsa ge ū tsî ge ǁō, tsîb ge ǁkhāti suri-e ǁōǃgau tama ge i. Tsî ǃnonaǁîb ǁnās ǁkhās khami.

²²Tsî gu ge hûga suri-e ǁōǃgau tama ge i. Hoagu khaoǃgâs ge taras tsîna ge ǁō.

²³Khâis ǃnâ, khâin kao, mâb ǁîgu dib di tarases nî ī? Hûgu hoagu kom ǁîsa taras ase ge ūhâ io.

²⁴Ob ge Jesuba ǃeream tsî ǁîgu ǃoa ge mî: Nēs ǃaroma go ǁnâi ǁhabu tama hâ, xoasa go ǂan tama, tsî Elob ǀgaib tsîna go ǂan tamas ǃaroma?

²⁵ǁŌ hâna xun ga khâi on kom ǃgame tsî ǃgameb ǃoa māǂuihe tideo, tsî ǀhomǃgāgu ǀhommi ǃnâ hâ khami nîra io.

²⁶Tsî ǁō hân xasa, khâin ge nîra, ǁnâi khomai tama go hâ Moseb ǂkhanis ǃnâ, ǁnā ǁkhūhais xa, matib ge Eloba ǁîb ǃoa mîsa: “Tita ge Abrahammi Elota, tsî Isaki Elota tsî Jakob Elota?”

²⁷Elob kom ǁō hân di Elo tamao, tsîb kom a ûitsaman di Elo-o. O go kom kaise ra ǁhapuo.

²⁸Tsîb ge xoaǂansabegu di ǀguib, ǁîgu ǂnoagusa go ǁnâub, tsî ǃgâiseb go ǃeream gu ǃkhaisa go mûba hā, tsî ge dî bi: Mâsa ǂguros mîmādi hoadi disa?

²⁹Ob ge Jesuba ge ǃeream bi: Hoan xa ǂguro mîmās ge nēsa: ǁNâu Israelǁaese! ǃKhūb sada Elob ge ǀguri a ǃKhū,

³⁰tsîts ge ǃKhūb sa Eloba nî ǀnam sa ǂgaob hoab ǀkha, sa ǀoms hoas ǀkha, sa ǁnâuǃāb hoab ǀkha tsî sa ǀgaib hoab ǀkha. Nēs ge ǂguro mîmāsa.

³¹Tsî ǀgamǁîs ge nēsa: “Sa ǀgūkhoebats ge sats ǁkhāts khami nî ǀnam.” Nēra xa i ge ǀnî mîmā-i ǁîra xa kai-e hâ tama hâ.

³²Ob ge xoaǂansabeba ge mîǀî bi: ǁKhāǁkhā-aotse, ǃgâisets ge amaba go mî, ǀgui Elob ǀguib hâ, tsî ǀnîb hâ tama ǃkhaisa.

³³Tsî ǁîba ǂgaob hoab ǀkha tsî ǁnâuǃāb hoab ǀkha, tsî ǀoms hoas ǀkha, tsî ǀgaib hoab ǀkha ǀnams, tsî sa ǀgūkhoeba sats ǁkhāts khami ǀnams ge khauǁguibadi tsî hoa ǁguibade ǃnā hâ.

³⁴Tsî Jesub ge mû, gā-aiseb go ǃeream ǃkhaisa, ob ge ge mîǀî bi: Elob gaosiba xuts ge ǃnū tama hâ. Tsî i ge ǃaruǀî khoe-i xare-e dītsâ tama ge i, ǁîba xū-e dîsa.

³⁵Tsîb ge Jesuba tempeli ǃnâ ra ǁkhāǁkhāǃâ ǃeream tsî ge mî: Mati gu xoaǂansabega ra mî, Xristub a Davib ôa ǃkhaisa?

³⁶Davib ǂûb kom ǃAnu Gagab ǃnâ ge mîo: “ǃKhūb ge ti ǃKhūb ǃoa ge mî: ǂNû ti amǀkhāb ǁôab ai, sa khākhoena ta nî ǂaiǃnaos sa ǂaira dis ase ǁguis kōse.”

³⁷Davib ǂûb ge ǁîba: “ǃKhūb” ti ra ǂgai; matib kha a ǁîb di ôa? Tsî ǂgui khoen ge ǁîba ge ǁnâu ǂgao.

³⁸Tsîb ge ǁkhāǁkhās âb ǃnâ ǁîna ǃoa ge mî: Xoaǂansabega ǂanbasen re, gaxu saragu ǃnâ ǃgûmas, tsî ǁamaxūǃkhaidi tawa tawedehes xa ǃgâibahega,

³⁹tsî aiǂnûǃkhaide sinagogegu ǃnâ, tsî ǂguro ǂnûǃkhaide ǂûǁaedi ǃnâ ǀnamga,

⁴⁰ǃoataradi di omde ra hapuga tsî ǂhauǃnâdīsens ǃaroma gaxu ǀgorede ra dīga, ǁîgu ge ǃnāǂamsa ǀgoraǃgâ-e nîra hō.

⁴¹Tsîb ge Jesuba ǁuiǂgaes ǃoagu ǂnû tsî ge kō, matis ǁaesa mari-e ǁuiǂgaes ǃnâ ra aoǂgā ǃkhaisa; on ge ǂgui ǃkhū hâna ǂguina gere aoǂgā.

⁴²Tsîs ge ǀgui ǃoataras ǀgâsasa hā tsî ǀgam peningra ge aoǂgā, ǁnāra ge ǂkhari mariǃnôara.

⁴³Ob ge ǁîb ǁkhāǁkhāsabega ǂgaihā tsî ge mîǀî gu: Amase ta ra mîba go, nē ǀgâsa ǃoataras ǁuiǂgaes ǃnâ go aoǂgān hoan xa ǃnāsase go aoǂgā ǃkhaisa.

⁴⁴Hoan ge ǁîn di ǃnāǂamsiga xu go aoǂgā, xawes kom nēsa ǁîs di tôasiba xu ūs hân hoana go aoǂgāo, ǁîs di ûixū-i hoa-e.