Read Khoekhoegowab Markub 13 Bible Online

Markub 13 - Khoekhoegowab bible

Markub 13

¹Tsî tempela xub ra bē hîab ge ǁkhāǁkhāsabegu âb di ǀguiba ǁîb ǃoa ge mî: ǁKhāǁkhā-aotse, mû mati ī ǀuidi tsî mati ī omǃnôaga!

²Ob ge Jesuba ǃeream tsî ǁîb ǃoa ge mî: Mûts ra nē kai omga? ǀGui ǀuis xawes nau ǀuis ai ǁnāxūhe tide, khôaǁnâhe tamase.

³Tsî ǀKheraǃhommi ai, tempeli ǃoagub ge ǂnôa i, ǃnubai gu ge Petrub, Jakobub, Johaneb tsî Andreab tsîga ǀguri ge dî bi:

⁴Mîba ge re mâǁaen nēna nîra ī ǃkhaisa tsî mâ-i a sao-e, mâǁaen nēna nîra ǀam ǃkhaisa?

⁵Ob ge Jesuba ǃeream gu tsî ge mîtsoatsoa: Kōbasen re, î-i tā khoe-e sago ǂgaeǂhapu.

⁶ǂGuin ti ǀons ǃnâ hā tsî nîra mî xuige: Tita ge Xristuta, tsî nîra ǂguina ǂgaeǂhapu.

⁷Tsî ǁnâu go kao, torogu xa tsî torogu gommi xa, tā ǃhuri, ǁnāti i kom nîra īo, xawes ge ganupe ǀam tama hâ.

⁸Nē ǁaes kom nau ǁaes ǃoagu nîra khâio, tsî nē gaosisa nau gaosis ǃoagu, tsî gu kom ǃhūǂgubiga ǃkharaga ǃkhaidi ai nîra īo, tsî gu kom ǃâtsūǀkhāga nîra hāo.

⁹Nēs ge tsûn di tsoatsoasa. ǂAnbasen du re, sadon nîra māǁnâ xuige ǁîn di ǀapeǀhaodi tsî ǁîn di sinagogegu ǃnâ, tsîn ge nîra ǂnau du, tsî du ge ǃāǃkhōmâi-aogu tsî gao-aogu aiǃâ nîra mâihe tita ǃaroma, ǁîn di mîdansa ǃoa.

¹⁰Tsîs ge ǃgâiǂhôasa aibe hoa ǁaedi ǃnâ nîra aoǁnâhe.

¹¹Tsîn ga ǂgaeǂgui tsî māǁnâ duo, tā aiǂhansen tare-e du nî ǃhoasa, î du ǁnā iri ǃnâ du nîra māhe-e ǃhoa; sa tamago kom ǁnā ǃhoa rago, tsî ǃAnu Gagab kom ǁîbao.

¹²Tsî nē ǃgâsab ge nau ǃgâsaba ǁōb ǃoa nîra māǁnâ, tsî ǁgûba ǀgôaba; tsîn ge ǀgôana ǁgûra ǃoagu khâi tsî ǁîra nîra ǃgam.

¹³Tsî du ge hoan xa nîra ǁkhanhe ti ǀons ǃaroma, xawe ǀunis kōse ga mâhō-i, ǁnā-i ge nîra ǃgâiǃō.

¹⁴Tsî ǁgaidīb hîǀhurus diba du ga mû, mâb tide ǃkhais aib ra mâ ǃkhaisa, (khomai ra-e a-i ǃgaoǃgâ!) ǃnubai an Judeab ǃnâ hâna ǃhommi ǃoa ǁhâ.

¹⁵Tsî oms ǂamais ai ga hâ-e a-i tā ǁgôaxa, xū-e i nî ǁî-i omsa xu ūbēse.

¹⁶Tsî ǃhanab ai ga hâ-e a-i tā oa, ǁî-i sarana nî ūkhâise.

¹⁷Xawe tsūba di ǀgamǀkhā hâdi tsî daisi radi tsîde ǁnā tsēdi ǃnâ.

¹⁸ǀGore ǁnâi re, îs sadu ǃhūsa tā saob ǃnâ ī.

¹⁹ǁNā tsēdi ǃnâ gu nēti ī ǂōǂōsiga nîra hâ xuige, kurusaben Elob ge kurun di tsoatsoasa xu nēs kōse hâ tama hâ ge iga, tsî tātsē hâ tidega.

²⁰Tsî ǃKhūb ga ǁnā tsēde ǃnubuǃnubu tama io, o i ga ǀgui ǁgan-i xare-e ǃgâiǃō tama hâ. Xawe ǃkhōǂuisaben, Elob ge ǃkhōǂuibasenn ǃaromab ge ǁnā tsēde ge ǃnubuǃnubu.

²¹Tsî ǁnāǃnubai i ga khoe-e sadu ǃoa mîo: Mû, nēpab ge Xristuba hâ, tamas ka io: Naupab ge hâ ti, o tā ǂgom.

²²ǂHumi Xristugu tsî ǂhumi kēbo-aogu tsîgu kom nîra khâio tsî saodi tsî buruxan tsîna nîra dīo, ī ǁkhā i ka, on ǃkhōǂuisaben tsîna nî ǂgaeǂhapuhes kōse.

²³Î du ǁnâi kō, hoana ta go aimîba du xuige.

²⁴Tsî ǁnā tsēdi ǃnâ, ǁnā ǂōǂōsib khaoǃgâs ge soresa nîra ǃkhaeǃkhaehe, tsî ǁkhâb ge ǂkhaib âba mā tide.

²⁵Tsî ǀgamiron ge ǀhomma xu nîra ǁnā, tsî ǀgaigu ǀhommi digu ge nîra gongonhe.

²⁶ǁNāǃnubain ge Khoen Ôaba kai ǀgaib tsî ǂkhaisib tsîkha ǀkha ǃgoaxase nîra mû.

²⁷Tsî ǁnāǃnubaib ge ǁîb ǀhomǃgāga nîra sî, tsî nîra ǁîb di ǃkhōǂuisabena ǀhaoǀhao haka ǂoade xu, ǃhūbaib di ǀamsa xu ǀhommi di ǀams kōse.

²⁸ǀNomahais tawa ǂkhō-e ǁkhāǁkhāsen. ǁÎs di ǂgonagu ga ǃumi tsî ǂgaen ga ǀkhī, o du kom a ǂano ǁkhunab ra ǀgū ǃkhaisa.

²⁹ǁNāti du ge ǁkhāti a ǂan, nēn ra ī ǃkhaisa du ga mûo, ǀgūseb dao-ams aiǃâ hâ ǃkhaisa.

³⁰Amase ta ra mîba du: Nē ǃhaos ge ǃgû-ī tide, nēn hoan nîra īs kōse.

³¹ǀHommi tsî ǃhūbaib tsîkha ge nîra ǃgû-ī, xawe di ge ti mîde tātsē ǃgû-ī tide.

³²Tsî ǁnā tsēs tsî iri tsîn xa i ge khoe-i xare-e ǂan tama hâ, ǀhomǃgāgu ǀhommi ǃnâ hâgu kas, ǀGôab kas hoasa; ǁGûb ǀguib ge a ǂan.

³³ǂAnbasen, ǂkhaikari hâ, mâ ǁaeb nî ǁaeba hā ǃkhaisa du a ǀū xuige.

³⁴Khoeb, ǃgûdaob ai hâb khami ī xui-ao, oms âba ge ǁnāxūb, tsî ǃgāgu âba mā-am tsî mâb hoaba ǁîb sîsenna ge māb, tsî dao-ams ǃûi-aoba ǂkhaikarib nî hâsa ge mîmāba.

³⁵ǂKhaikari ǁnâi hâ re, ǀū du a xuige, mâ ǁaeb oms ǀhonkhoeba nî hāsa; ǃui-amǁaeb ais kas, tsuxuǃgâb ais kas, anib ās ǀkhas kas, ǃnauǁgoagas kas hoasa.

³⁶Îb tā, ǃnapetamaseb ga hāo, ǁom hâse hō du.

³⁷Tsî mîba du ta rasa ta ge hoana ra mîba: ǂKhaikari du hâ re!