Read Khoekhoegowab Markub 14 Bible Online

Markub 14 - Khoekhoegowab bible

Markub 14

¹Tsî ǀgam tsēra khaoǃgâb nî Pasxab tsî ǀkhuruǀkhuruhe tama pereb di kaitsēsa hâse i ge ge ī i. O gu ge ǀgapipristergu tsî xoaǂansabegu tsîga ge ôa-am, mati gu nî ǁîba gāxaǃnâsib ǀkha ǃkhō tsî ǃgam ǃkhaisa.

²O gu ge ge mî: Xawe tā Pasxatsēs ai ǁnāsa dī, îb tā ǂkhupiba ǁaes ǃnâ hā ti.

³Tsî Betanis tawa, Simonni, ǃomamaxab di oms ǃnâb hâ tsî tāb tawa ǂnôa, hîa i ge tara-e ge hā, alabaxaparo-i, ǃūmû tsî ǃgomǀgausa nardub hâǃnâ-i ǀkha; os ge xaparosa khôa tsî ǁîb danas ai ge ǂnâǂui.

⁴O gu ge ǀnîga ǁîgu ǃnâ ǀara tsî ge mî: Mâs ǃoas kha nē ǃgâihamxū-i di hîǀhuruhesa go ī?

⁵Nē ǃgâihamxū-i kom ga ǃnonakaidisi denarga ǃnā hâse ǁamaxūhe, tsî marina ǀgâsana māhe hâo. O gu ge ǁîsa ge ǃgabe.

⁶Ob ge Jesuba ge mî: ǁNāxū si re, tarexa go ǁîsa ra ǂhani? ǃGâi sîsennas kom tita tawa goro dīo.

⁷ǀGâsana du hugaǀgui sadu ǀkha ūhâ xui-ao, tsî ǂgao du karao, o du ǁîna ǃgâidī ǁkhā, xawe du kom tita hugaǀgui ūhâ tamao.

⁸ǁKhās as kōses ge ǁîsa goro dī; aiǃhaes go, ti sorosas nî ǁkhōs ǃoa ǂkhauǀkhāse.

⁹Amase ta ra mîba du, mapa ǀguis ga nē ǃgâiǂhôasa aoǁnâhe ǃhūbaib hoab ai, ǁnāpa i ǁkhāti ǁîs goro dīn xa nîra ǃhoahe, ǁîs di ǂâiǂâisensa ǃoasa.

¹⁰Ob ge Judab, Iskarioǁîb, disiǀgamǀagu di ǀguiba ǀgapipristergu ǃoa ge ǃgû, ǁîgu tawab nî ǀapexū bise.

¹¹Tsî ǁîgu ge ǁnâuo, o gu ge ǃgâiaǂgao tsî ge mîmâi, mari-e gu nî mā bisa. Ob ge ge ôa-am, matib nî ǁîba ǃgâiga ǁaeb ai māǁnâsa.

¹²Tsî ǂguro tsēs ǀkhuruǀkhuruhe tama peregu dis, Pasxaǁkhaob ǁîs ai nî ǂāhes ai gu ge ǁkhāǁkhāsabegu âba ǁîb ǃoa ge mî: Mâǀî ǃgû tsî ge nî Pasxaba ǂhomiba tsi ǂûts nîga, tits ra ǂgao?

¹³Ob ge ǁkhāǁkhāsabegu âb di ǀgamkha sî, tsî ǁîkha ǃoa ge mî: ǃGû ǃāsa ǃoa, ob ge khoeb ǁgamxapa-e tani hâba sakho nî ǃoa, ǁîba sao re;

¹⁴tsî mapab ga ǂgâs hoasa, ǁnāpa omǁgûb ǃoa mî re: ǁKhāǁkhā-aob ge ra dî: Mapa i hâǃkhai-e hâ, tita nî Pasxaba ti ǁkhāǁkhāsabegu ǀkha ǁî-i ǃnâ ǂû-e?

¹⁵Ob ge kai ǃnā-oms, ǂhomihe hâsa nî ǁgau kho; ǁnāpa ǂhomiba ge re.

¹⁶O kha ge ǁkhāǁkhāsabekha ge ǃgû, tsî ǃās tawa kha ge sī, o kha ge ǁîb go mîba kha khami ge hō, tsî kha ge Pasxaba ge ǁāǁā.

¹⁷Tsî ǃui-i geo, ob ge disiǀgamǀagu ǀkha ge hā.

¹⁸Tsî tāb tawa ǂnû tsî gu ra ǂû, hîab ge Jesuba ge mî: Amase ta ra mîba go, sago di ǀguib tita ǀkha ra ǂûb tita nîra ǀapexū ǃkhaisa.

¹⁹O gu ge ǃoatsoatsoa, tsî nēb nauba saogubes ai ǁîb ǃoa ge mî: Tita ǁnâi ǁî ta? Tsî nauba: Tita ǁnâi ǁî ta?

²⁰Ob ge ǁîgu ǃoa ge mî: Disiǀgamǀagu di ǀguib ge ǁîb tita ǀkha ǃomma ǃores ǃnâ nî ǂgāba.

²¹Khoen Ôab ge ǁîb xa xoahe hâ khami ra ǃgû, xawe tsūba bi ǁnā khoeb, ǁîb xab Khoen Ôaba nîra ǀapexūheba. ǁNā khoeb ge ga ǃgâibahe hâ, tātsēb ga ǃnae tama i hâo.

²²Tsî ǂû gu ra hîab ge Jesuba pereba ū, tsî ǀkhae, tsî ge khôa bi, tsî ǁîga mā tsî ge mî: Ū î go ǂû, nēs ge ti sorosa.

²³Tsî ǀgabisa ū tsîb ge gangan, tsî ǁîga ge mā. O gu ge hoaga ǁîs ǃnâ ge ā;

²⁴tsîb ge ǁîgu ǃoa ge mî: Nēb ge ti ǀaob ǀasa ǃgaeǀhaos dib, ǂguin ǃaroma ra ǂnâxūheba.

²⁵Amase ta ra mîba go, nēsisa xu ta tātsē ǂauxûiǂûhais di ǂû-i xa ā tidesa, ǀasase ta nî ǁî-e, gaosib Elob dib ǃnâ ā tsēs kōse.

²⁶Tsî gangantsanasa ǁnae tsî gu ge ǀKheraǃhommi ǃoa ge ǂoa.

²⁷ǃNubaib ge Jesuba ǁîgu ǃoa ge mî: Sago hoago ge nē tsuxub ǃnâ tita ǃnâ nî ǁgonǁgonǃnâsen, xoahe hâ xui-ao: ǃÛi-aoba ta nîra ǂnau, on ge gūna nîra ǀgaruǀgaruhe.

²⁸Xawe ti khâis khaoǃgâ ta nîra ai-aiba go Galileab ǃoa.

²⁹Ob ge Petruba ǁîb ǃoa ge mî: Tsî gu ga hoaga sats ǃnâ ǁgonǁgonǃnâsen xawe ta ge tita dī tide.

³⁰Ob ge Jesuba ǁîb ǃoa ge mî: Amase ta ra mîba tsi, nētsē nē tsuxub ǁkhāb ǃnâts kom anib ǀgam ǃnāra nî ās aiǃâ ǃnona ǃnāde tita nîra ǀūxūo.

³¹Ob ge ǁnās ǃgâ-ai ge mî: Tsî sats ǀkha ta ga ǁō, xawe ta ge tātsē ǀūxū tsi tide. ǁNās ǁkhās khami gu ge hoagu ona ge mî.

³²Tsî gu ge ǃhanab Getsemane ti ǀon hâb tawa ge sī. Ob ge ǁîb ǁkhāǁkhāsabegu ǃoa ge mî: ǂNû re nēpa, ǀgore ta sī ra hîa.

³³Ob ge Petrub tsî Jakobub tsî Johaneb tsîga ū, tsî ǃaoxaǃnâ tsî ge ǀhūtsoatsoa.

³⁴ǃNubaib ge ǁîgu ǃoa ge mî: Ti ǀoms ge ǃoa hâ ǁōb kōse, hâ nēpa, î go ǂkhaikari hâ!

³⁵Ob ge ǂkharirose aiǃâb ǃoa ǃgû tsî ǃhūb ai ǁnāǁgoe tsî ge ǀgore, ī ǁkhā-i kao, îb nē ira ǃgû-īǀkhā bi, ti.

³⁶Ob ge ge mî: Abba, ǁnās ge Abotse, hoanats a ǁkhā satsa, xuige as nē ǀgabisa ǃgû-īǀkhā te! Xawe tita ra ǂgao khami tama i tsî, sats ra ǂgao khami a-i ī.

³⁷Ob ge hā tsî ǁîga ǁom hâse ge hō; ob ge Petrub ǃoa ge mî: Simontse ǁomts hâ? ǁKhā tamats ǁnâi hâ, ǀgui irats nî ǂkhaikari hâsa?

³⁸ǂKhaikari hâ î ǀgore re, î go tā ǃâitsâb ǃnâ ǂgâ; gagas a māsenxa, xawes ǁgansa a ǂkhabusa xuige.

³⁹Tsî ǁkhawab ge ǃgû tsî ǁkhā mîdi ǁkhāde ge ǀgore.

⁴⁰Tsî oab ge, ob ge ǁkhawa ǁom hâse ge hō gu; mûdi âgu ǂoms xa ǃgom hâ, tsî tare-e gu nî ǃeream bisa gu ge ǀū i xui-ao.

⁴¹Ob ge ǃnonaǁî ǃnās ai hā, tsî ge mîǀî gu: Aiǃâb ǃoa ǁom tsî go ra sâ? ǂÂu go! Iri kom go hāo! Mû, Khoen Ôab ge ǁore-aon di ǃomgu ǃnâ ra māǁnâhe.

⁴²Khâi î ge ǃgû; kō, tita ra ǀapexūb a ǀgū xuige.

⁴³Tsî ǁnātimîsi, ganupeb ra ǃhoa hîab ge Judab Iskarioǁîb, disiǀgamǀagu di ǀguiba ge hā, tsî ǁîb ǀkhas ge kai ǂnubisa ge hā gôagu tsî haigu ǀkha, ǀgapipristergu tsî xoaǂansabegu tsî kaigu tsîgu xa go sîhesa.

⁴⁴Tsî ǀapexū-aob ge ǂanǂansa sao-e māgu tsî ge mî: ǁOa ta nîb ge ǁîba; ǃkhō bi, î sâusase ūǃgû bi.

⁴⁵Tsî hāb geo, ob ge ǁnātimîsi ǁîb tawa sī tsî: Rabitse! ti mî tsî ge ǁoa bi.

⁴⁶O gu ge ǃomga ǁîb ai ǁgui tsî ge ǃkhō bi.

⁴⁷Ob ge mâǂnamipe hân di ǀguiba gôaba ǂgaeǂui, tsî ǀgapipristeri di ǃgāba ǂnau, tsî ǂgaes âba ge ǂnauǁnâ.

⁴⁸Ob ge Jesuba ǃeream tsî ǁîn ǃoa ge mî: ǃGamaob ǃoa ra ǃgû khami du go ǂoa, gôagu tsî haigu tsîgu ǀkha, tita du nî ǃkhōse?

⁴⁹Tsēkorobe ta ge sadu ǀkha tempeli ǃnâ hâ i, tsî gere ǁkhāǁkhā, tsî du ge ǃkhō te tama hâ i; xawe nēn ge go ī, Xoadi nî ǀoaǀoahese.

⁵⁰O gu ge ǁkhāǁkhāsabegu hoaga ǁnāxū bi tsî ge ǁhâ.

⁵¹Tsî ǀgui ǂanǂansa ǂkhamkhoeb ge ǁîba ge sao, ǃuri ǃkhaib ǀkha ǀōǀkhā soros âb ai anasen hâba; o gu ge ge ǃkhō bi.

⁵²Ob ge ǃuri ǃkhaiba ǁnāxū, tsî ǀōǀkhāse ǁîga xu ge ǃkhoeni.

⁵³Tsî gu ge Jesuba ǀgapipristeri ǃoa ge ūǃgû. O gu ge ǀgapipristergu tsî kaigu tsî xoaǂansabegu hoaga ge ǀhao.

⁵⁴Tsîb ge Petruba ǃnūseba xu ǁîba ge sao, ǀgapipristeri di ai-oms ǃnâs kōse. Tsîb ge ǃgān tawa ǂnûǀhao tsî ǀaesa gere sâ.

⁵⁵Tsî ǀgapipristergu tsî ǀape-aogu di ǀhaos hoas ge ǀhûǀguitimî-e Jesub ǃoagu ge ôa, ǁîba gu nî ǃgamse, xawe gu ge hō tama ge i.

⁵⁶ǂGuin ge ǁîb ǃoagu ǂkhabase ge ǃkhō-am, xawe di ge ǃkhō-amdi âna ǀgui tama i xui-ao.

⁵⁷On ge ǀnîna khâi, tsî ǂkhabase ǁîb ǃoagu ǃkhō-am tsî ge mî:

⁵⁸Sida kom ge ǁnâuo, ǁîb ra mîsa: Tita ge nē tempeli ǃomgu ǀkha dīhe hâba khôaǁnâ tsî ǀkharab ǃomgu ǀkha dīhe tamaba ǃnona tsēdi ǃnâ nî omkhâi.

⁵⁹Xawe ǁkhāti ǁnātis ge ǃkhō-ams âna ǀgui tama ge i.

⁶⁰Ob ge ǀgapipristera ǁaegub ǃnâ khâi tsî Jesuba dî tsî ge mî: Xū-ets ǁnâi ǃeream tama? Tare-en ra nēna sats ǃoagu ǀhûǀguitimî?

⁶¹Xaweb ge ǁîba ǃnō tsî xū-i xare-e ǃeream tama ge i. Ob ge ǀgapipristera ǁkhawa dî bi tsî ǁîb ǃoa ge mî: Xristuts, ǀGapiǃgôasab di ôatsa ǁnâi satsa?

⁶²Ob ge Jesuba ge mî: ǁÎ ta kom titao. Khoen Ôaba du ge Elob amǀkhāb tawa ǂnôase, tsî ǀhommi ǀnanudi ai ǃgoaxase nîra mû!

⁶³Ob ge ǀgapipristera sarab âba ǀkhau tsî ge mî: Mâ ǀhûǀguitimî-aona ge gorose ǂhâba hâ?

⁶⁴Eloǃkhāǃkhāsa go kom go ǁnâuo, mati go ra ǂâi? O gu ge hoaga ǁîba ǁōba anu hâse ge ǀgoraǃgâ.

⁶⁵O gu ge ǀnîga ǂara-ai bi tsoatsoa, tsî ais âba ǃgū-ai tsî ǃomdi ǀkha ǂnau bi tsî ge mî: Kēbo re! Tsî gu ge ǃgāga ǁîba gere ǁapu.

⁶⁶Tsî Petrub ai-oms ǃnâ hâ hîas ge ǀgapipristeri ǃgādi di ǀguisa ge hā.

⁶⁷Tsî Petrubas ge mûo, sâb ra hîa, os ge ǃgapalî bi tsî ge mî: Sats on kom Jesub Nasareǁîb ǀkha go hâ io.

⁶⁸Xaweb ge ǀoa tsî ge mî: ǂAn tama ta hâ tsî ta ǁkhāti ǁnâuǃā tama, sas ra mî-e. Tsî ai-oms ǃoab ge ǂoa ǃnubaib ge aniba ge ā.

⁶⁹Tsî ǃgās ge ǃgapalî bio, os ge mâǂnamipe hân ǃoa ǁkhawa ge mîtsoatsoa: Nēb kom ǁîgu di ǀguibao.

⁷⁰Xaweb ge ǁkhawa ge ǀoa. Tsî ǂkharirose ǁnās khaoǃgân ge ǁnāpa mâna ǁkhawa Petrub ǃoa ge mî: Amase ǁîgu di ǀguits komo, Galileaǁîts komo tsî sa gowab kom ǁnāti īo.

⁷¹Ob ge ǁî-aitsama ǀâxarexūsen tsî ge nūtsoatsoa: ǂAn tama ta hâ khoeb kom nēb sadu ra mîbao, ti.

⁷²Ob ge aniba ǁnātimîsi ǀgamǁî ǃnāsa ge ā. Ob ge Petruba Jesub go ǁîb ǃoa mî mîs xa ge ǂâi; Anib ǀgam ǃnāra ā tama hîats ge ǃnona ǃnādi kōse nî ǀūxū te, ti. Ob ge ǂâihō tsî ge ā.