Read Khoekhoegowab Markub 15 Bible Online

Markub 15 - Khoekhoegowab bible

Markub 15

¹Tsî ǃhaese ǃnauǁgoaga, ǀgapipristergu tsî kaigu tsî xoaǂansabegu tsî ǀapeǀhaos hoas ǀapesa ge dītoas khaoǃgâ gu ge Jesuba ǃgae tsî ūǃgû, tsî Pilatuba ge māǁnâ bi.

²Ob ge Pilatuba ge dî bi: Jodeǁîn gao-aotsa ǁnâi satsa? Ob ge ǃeream tsî ge mîǀî bi: Sats ra mî.

³O gu ge ǀgapipristerga ǁîba ǀgaisase ge ǀanaǃgâ.

⁴Ob ge Pilatuba ǁkhawa dî bi tsî ge mî: Xū-ets ǁnâi ǃeream tama hâ? Mû matikō xūna gu satsa ra ǂgā-am ǃkhaisa.

⁵Xaweb ge Jesuba ǃaruǀî xū-i xare-e ǃeream tama ge i, Pilatub ge burus kōse.

⁶Tsîb ge Pasxaǁâus ai ǀgui ǃkhōsab ǂgaon kab hoaba gere xūba.

⁷Tsîb ge ǀguiba ge hâ i Barabab ti ra ǂgaiheb, ǀnî khâikhâiǃnâ-aogu, khâikhâiǃnâdi ǃnâ ge ǃgamgu ǀkha ge ǃkhōheba.

⁸Os ge ǂnubisa ǃapa tsî ge ǂgantsoatsoa, hugab gere dī khamib nî ǁîna dībasa.

⁹Ob ge Pilatuba ǁîna ǃeream tsî ge dî: ǂGao du ǁnâi hâ Jodeǁîn di gao-aoba ta nî xūba dusa?

¹⁰ǂAnni ge i, ǀgapipristergu go ǁîba suriba xu a māǁnâsa.

¹¹O gu ge ǀgapipristerga ǂnubisa ge ǀapeǃnâ, îb Barababa ǁîna xūba.

¹²Ob ge Pilatuba ǃeream tsî ǁkhawa ǁîn ǃoa ge mî: Tsî mati du ǁnâi ǂgao hâ ǁîba ta nî sîsenūsa, Jodeǁîn gao-aob, ti du ǁîb xa ra mîba?

¹³On ge ǁkhawa ge ǂgai: ǃGâu bi, ti.

¹⁴Ob ge Pilatuba ǁîna ge mîǀî: Mâ ǂkhaba-eb ǁnâi dī hâ? Xawen ge ǃaruǀîǀgui: ǃGâu bi, ti ge ǂgai.

¹⁵Ob ge Pilatuba ǂnubis di ǂâisa dī ǂgao tsî ǁîna Barababa xūba, tsî Jesuba ge māǁnâ, ǂnauheb kas khaoǃgâb nî ǃgâuhese.

¹⁶Tsî gu ge toro-aoga ǂhanuǂhanu-ommi, Pretoriummi ti ra ǂgaiheb ǃnâ ūǂgā bi tsî toroǂnubis hoasa ge ǂgaiǀhû.

¹⁷Tsî purpursaraba ana bi, ǁkhūkronsa ǂgapu tsî ǀgapa bi,

¹⁸tsî ge tawede bi tsoatsoa: Tawede tsi Jodeǁîn gao-aotse! ti.

¹⁹Tsî ǂā-i ǀkha danas ai ǂnau bi, ǂara-ai bi tsî ǁnāǁgoe tsî ge ǀgoreǀî bi.

²⁰Tsî ǃhō bi gu ge, o gu ge purpursaraba ǁhû bi, tsî ǁîb di sarana ge ǂgaeǂgā bi, tsî ge ǂgaeǂguiǂui bi, ǃgâu bi gu nîse.

²¹O gu ge ǃgû-ī rab, ǂanǂansa Simonni Kireneǁîb, ǃauba xu ra hāb, Aleksanderi tsî Rufub tsîkha di îba ge ǁgari, ǃgâuhaibab nî taniba bise.

²²Tsî gu ge ǁîba ǃkhais Golgotas, Danaǂkhōs ǃkhais ti ra ǂnûiǃkhunihesa ǃoa ge ūsī.

²³Tsî gu ge ǁîba mirexûiba ge āsi, xaweb ge ǃkhōǃoa tama ge i.

²⁴Tsî ǃgâu bi gu geo, o gu ge ǁîb sarana ge ǀgoragu, ǂnōgusa ao tsî, tarib âgu nî mâ xū-e hōsa.

²⁵Tsîb ge ǃnonaǁî ir ge i, ǃgâu bi gu ge ǃnubai.

²⁶Tsî xoamâis ǁîb ǁguiǂams dis ge ǁîb ǂamǃnâ ge xoahe hâ i: “Jodeǁîn di Gao-aob” ti.

²⁷Tsî ǁîb ǀkha gu ge ǀgam ǃgamaokha ge ǃgâu, ǀguiba ǁîb di amǀkhāb ai, tsî nauba ǁîb di ǁareǀkhāb ai.

²⁸ǃNubais ge xoasa ge ǀoa: “ǂKhabadī-aon ǀkhab ge ǃgôahe hâ” ti ra mîsa.

²⁹Tsî ǃgûǃkharu ran ge ǁîba ǃhō tsî ǃnabindana tsî ge mî: Haha, sats tempela khôaǁnâ tsî ǃnona tsēdi ǃnâ ǁîba ra omkhâitsa,

³⁰ǁî-aitsama huisen î ǃgâuhaiba xu ǁgôaxa.

³¹ǁNās ǁkhās xase gu ge ǀgapipristergu ona xoaǂansabegu ǀkha ǁîgu ǃnâ ǃhō bi tsî ge mî: Naunab ge ge hui, xaweb kom ǁî-aitsama a huisen ǁoao!

³²Xristub Israeli gao-aob kao, ab ǁnâi nēsi ǃgâuhaiba xu ǁgôaxa, î da mû tsî ǂgom. Tsî ǁîb ǀkha ge ǃgâuhekha on ge ge ǃkhāǃkhā bi.

³³Tsî ǃnaniǁî iri ge hāo, o i ge ǃkhaena-e ǃhūbaib hoab ai ge hā, khoeseǁî iri kōse.

³⁴Tsî khoeseǁî iri aib ge Jesuba kai dommi ǀkha ǂgai tsî ge mî: Eloi, Eloi, lama sabaxtani? ǁNās ge: Ti Elotse, ti Elotse, tarexats go ǁnāxū te? ti mîsa.

³⁵Tsî ǀnîn ǁnāpa mân din ge ǁnâu, on ge ge mî: Eliabab kom ra ǂgaio.

³⁶Ob ge ǀguiba ǃkhoe tsî sponsa ǀkhuruxûib ǀkha ǀoaǀoa, tsî ǂāb ai ǃkhā si tsî āsi bi tsî ge mî: ǁNam, î ge mû īseb nî Eliaba hā tsî ūǁnâ bi ǃkhaisa.

³⁷ǃNubaib ge Jesuba ǃgari dommi ǀkha ǂgai tsî gagasa ge mā.

³⁸Ob ge ǂgāmâisab tempeli diba ge doaǃā, ǀgapiseba xu ǃnagab kōse.

³⁹Tsî danakhoeb, ǁîb ǃoagu mâb ge mû, nēti ī dommi ǀkhab go gagasa mā ǃkhaisa, ob ge ge mî: Amase nē khoeb ge Elob Ôa go i.

⁴⁰Tsî di ge ǁkhāti tarade ǃnūseba xu gere ǃgapa; ǁîdi ǃnâ di ge Maria Magdalenas tsî Marias, Jakobub ǂkhammi tsî Joseb tsîkha di îs, tsî Salomes tsîde ge hâ i,

⁴¹ǁîba gere saode Galileab ǃnâb hâ hîa tsî ǁîba gere ǃoabade, tsî ǀnîdi ǂguidi, ǁîb ǀkha Jerusalems ǃoa gere ǃapade.

⁴²Tsî ǀnai i ge ǃui hâ io, aiǂhomisentsēs hâ hîa, ǁnās ge a aisâtsē,

⁴³ǃnubaib ge Joseb Arimateas dib, ǃgôa-anusa ǀapemā-aob, aitsama ǁkhāti Elob gaosiba ra ǃâuba ge dītsâ Pilatub tawa ǂgâ tsî Jesub sorosa ǂgansa.

⁴⁴Ob ge Pilatuba buru ǀnaib go ǁō ǃkhais xa tsî danakhoeba ǂgai tsî ge dî bi iseb ǀnai ǁō hâsa.

⁴⁵Tsî danakhoeba xub ge ǁnâuǃāo, ob ge Joseba sorosa ge mā.

⁴⁶Ob ge ǃuri ǃkhai-i xa ǁama tsî ūǁnâ bi, ǃuri ǃkhaib ǃnâ ǃgami bi, tsî ǁaos, ǃhao-i ǃnâ ǁhāǂgāhe hâs ǃnâ ǁgui bi, tsî ǀui-e ǀhobas ams ai ge gabaǂnûi.

⁴⁷Tsî Maria Magdalena tsî Marias Joseb îs tsîra ge ge kō, mapab ra ǁguihe ǃkhaisa.