Read Khoekhoegowab Markub 16 Bible Online

Markub 16 - Khoekhoegowab bible

Markub 16

¹Tsî sâtsēs ge ǃkharuo, o di ge Maria Magdalenas, Marias, Jakobub îs tsî Salomes tsîde ǃgâihamxūna ge ǁama ǁîba di nî sī ǂkhause.

²O di ge ǂguro tsēs ai ǃnauǁgoaga ǀhobas tawa ge sī, sores ra ǁhai hîa.

³Tsî di ge ge dîgu: Tari-e nî sase ǀuisa ǀhobas amsa xu gababē?

⁴Tsî ǃgapakhâi di geo, o di ge ǀuisa gababēhe hâse ge mû; ama kais kom ge io.

⁵O di ge ǀhobas ǃnâ ǂgâ tsî ǂkhamkhoeba amǀkhāb ǁôab tawa ge mûǂnôa, gaxu ǃuri sarab ǀkha anasen hâba. O di ge ge ǃhuri.

⁶Ob ge ǁîdi ǃoa ge mî: Tā ǃhuri! Jesub Nasareǁîb, ǃgâuhe goba so ge ra ôa. Khâib go tsîb kom nēpa hâ tamao. Mû, ǁîban go ǁgui hâ i ǃkhaiba.

⁷Î ǃgû, î so ǁîb ǁkhāǁkhāsabegu tsî Petrub tsîga sī mîba, Galileab ǃoab nî aiǃgûba du ǃkhaisa, ǁnāpa du ge nîra mû bi, mîba dub ge khami.

⁸O di ge ǃnoesase ǀhobasa xu ge ǂoa, ǃhurib tsî ǀkhūb tsîkha xa di go ǃkhōhe xui-ao, tsî di ge khoe-i xare-e xū-i xare-e mîba tama ge i, ǃao di ge hâ i xui-ao.

⁹Tsî ǃnauǁgoaga ǂguro tsēs wekheb dis aib ge khâio, ob ge aibe Maria Magdalenas, hû ǁgâuagab ge ǃhaeǂuixūsa ge ǂhai.

¹⁰Os ge ǃgû, tsî ǁîb ǀkha ge hâ in, ǃoa tsî ra āna ge ǂhôa.

¹¹Tsî ǁîn ge ǁnâuo, ûib hâ tsîb go ǁîs xa mûhe ǃkhaisa, on ge ǂgom tama ge i.

¹²ǁNās khaoǃgâb ge ǁîn di ǀgamkha, ǃgû kha garu hîa, ǀkhara īsib ǃnâ ge ǂhai, ǃaub ǃnâ kha garu hîa.

¹³O kha ge ǁîkha ǁkhāti ǃgû tsî nauna ge ǂhôa, xawen ge ǁîkha tsîna ǂgom tama ge i.

¹⁴Ega, disiǀguiǀagu tāb tawa ǂnôa, hîab ge ǁîga ǂhai, tsî ǁîgu ǂgomoǃnâsib tsî karokarosens ǂgaogu dis tsîn ǃaroma ge ǃgabe, khâib go ǃkhaisa go mûna gu go ǂgom tama i amaga.

¹⁵Ob ge ge mîǀî gu: ǃGûǂoa ǃhūbaib hoaragab ǃnâ, î go aoǁnâ ǃgâiǂhôasa khoesib hoab ǃoa.

¹⁶ǂGom tsî ga ǁāǁnâhe hâ-i, ǁnā-i ge nîra ǃgâiǃō, xawe ǂgom tama ka i-i, ǁnā-i ge nîra ǀâxarexūhe.

¹⁷Tsî nē saodi ge nîra ǂgom karana sao: Ti ǀons ǃnân ge ǁgâuaga ǃhaeǂui, ǀasa namdi ǀkha ǃhoa,

¹⁸ǀaona ūkhâi tsî ǁōǁōsa xū-en ga ā, xawe i ge ǁîna ǂkhôadī tide; ǀaesen hânan ge nî ǃomma ǁgui-ai, on ge nîra ǂgau.

¹⁹Ob ge ǃKhūba ǁîgu ǀkhab ge ǃhoatoao, ǀhommi ǃoa ūǃapahe, tsî Elob amǀkhāb ǁôab ai ge ǂnû.

²⁰O gu ge ǁîga ǂoa tsî mâ ǃkhai-i hoa-i tawa gere aoǁnâ, tsîb ge ǃKhūba ǁîgu ǀkha gere sîsenǀhao tsî mîsa saoǃgon ra saodi ǀkha gere ǀgaiǀgai. Amen.